වන්නියේ දෙමළ මිරිදිය ධිවරයන් ජීවිකාව සවි කර ගැනීම සදහා මසුන් මැරීමට යොදා ගන්නා බෝට්ටු කිහිපයක්
මෙතෙක් හදුනා නොගත් පිරිසක් විසින් ගිනි තබා සම්පුර්ණයෙන්ම විනාශ කර තිබේ.
පළාත් බද වාර්තාකරුවන් පවසන්නේ තන්නිමුරිප්පු වැවේ මසුන් මැරීමේ නිරත දෙමළ ධිවරයන්ට අයත් ධිවර බෝට්ටු හතරක් ගිනි තබා ඇත්තේ අගෝස්තු 20 වැනිදා රාත්‍රි කාලයේදී බවයි.
මුලතිව්, තන්නිමුරිප්පු වැවේ අනවසරයෙන් මසුන් මරමින් සිටි සිංහල ධිවරයන් 38 දෙනකු අගොස්තු 6 වැනිදා ඔට්ටුසුඩාන් පොලීසියට අල්ලා දීමට ප්‍රදේශයේ මුස්ලිම් සහ දෙමළ ජනයා කටයුතු කර තිබුනි.
ඔවුන් අතරින් 9 දෙනකු පොලිස් අත්අඩංගුවෙන් මිදී පළා ගොස් තිබු අතර මුලතිව් දිස්ත්‍රික් ලේකම් කාර්යාලය ඉදිරිපිටදී අගෝස්තු 7 වැනිදා විරෝධතා දියත් කළ පළාත් වාසී ධීවර ජනයා දිස්ත්‍රික් ලේකම්වරියගෙන් ඉල්ලා තිබුනේ මුස්ලිම් සහ දෙමළ ජනයාට අයත් සම්පත් පිටස්තරයන්ට බලහත්කාරයෙන් අත්පත්කරගැනීමට ඉඩ සලසා නොදෙන ලෙසයි.
තන්නිමුරිප්පු වැවේ මසුන් මැරීමේ අයිතිය පවතින්නේ කුමුලමුනෙයි, තන්නිපුරම් හා හිජ්රාපුරම් දෙමළ සහ මුස්ලිම් වැසියන්ට පමණක් යැයි දිස්ත්‍රික් සංවර්ධන කමිටුව විසින් තිරණය කර ඇති බවයි ප්‍රදේශවාසී ධිවරයන් පවසන්නේ.
සිංහල ධීවරයන් අල්ලා දීමට කටයුතු කළ දෙමළ සහ මුස්ලිම් ධිවරයන් 17 දෙනකුට ප්‍රකාශ ලබා දීම සදහා පොලීසියට කැදවා ඔවුන් සියල්ලන්ම අත්අඩංගුවට ගැනීමට ඔට්ටුසුඩාන් පොලීසිය පසුගිය 6 වැනිදා කටයුතු කර කළේය.
අත්අඩංගුවට ගත් සිංහල ධිවරයන් 29 දෙනාත් දෙමළ හා මුස්ම් ධිවරයන් 17 දෙනාත් අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග කර තිබුනි.
මුලතිව්, තන්නිමුරිප්පු වැවේ මසුන් මැරීමේ අයිතිය පවතින දෙමළ සහ මුස්ලිම් ජනයා චෝදනා කර තිබුනේ ගජබාපුර, සම්පත් නුවර, ජනකපුර හා කල්‍යාණපුර සිට පැමිණි සිංහල ජනයා මේ මස මුලදී අනවසරයෙන් තන්නිමුරිප්පු වැවේ මසුන් මැරීමේ නිරත වු බවටයි.
