සියවස් දෙකක් තිස්සේ මෙරට ජීවත් වන මලය රටේ දෙමළ ජනතාවගේ අතීත උරුමය විදහා දක්වන ප්‍රදර්ශනයක් යාපනය විශ්ව විද්‍යාලයේ දී සංවිධානය කර තිබේ.
යාපනය විශ්වවිද්‍යාලයේ ලලිත කලා අධ්‍යන අංශයේ ප්‍රදර්ශන ශාලාවේ පැවැත්වෙන එම ප්‍රදර්ශනය අගෝස්තු 31 වැනිදා දක්වා දැක බලා ගැනීමේ අවස්ථාව ඇති බවයි සංවිධායකයන් පවසන්නේ.
"පාරාදීසයක බර - මලෛයග කතාන්දර ප්‍රදර්ශනය" යන්න තේමා කරගනිමින් පැවැත්වෙන ප්‍රදර්ශනයේදී මෙරට තුළ වසර 200 ක ඉතිහාසයකට උරුමකම් කියන මලය රටේ දෙමළ ජනතාව තමන්ට ආවේනිකව භාවිත කළ ඉවුම් පිහුම් උපකරණ, අත් ඔරලෝසු, පැරණි ලිපි, පැරණි ඡායාරූප, තේ කුඩ, ආගමික කටයුතු වෙනුවෙන් භාවිත කළ උපාංග දැක ගත හැකිය.
දකුණු ඉන්දීය සම්භවයක් සහිත දෙමළ ජාතිකයන් ශ්‍රී ලංකාවට වතු කම්කරුවන් ලෙස ගෙන්වා වසර 200ක් සම්පූර්ණ වන මොහොතේ එම ජනතාවගේ ජීවිතය, කලාව, සංස්කෘතිය සහ පුජා විධි වත්මන් පරපුරට කියා දීම මෙන්ම උඩරට ද්‍රවිඩ ජනතාවගේ ජීවන රටාව, ශ්‍රී ලාංකීය දෙමළ ජනතාවගේ ඊළඟ පරම්පරාවට කියා දීමද මෙම ප්‍රදර්ශනයේ අරමුණ වී තිබේ.
ලක්දිවට පා තබා වසර 200 ක් තිස්සේ මෙරට ජීවත් වන මලය රටේ දෙමළ ජනතාව ශ්‍රී ලංකාවේ අර්ථවත් පුරවැසියන් වීම සදහා රජයට ඉල්ලීම් 11 ක් ඉදිරිපත් කරමින් ජුලි 28 වැනිදා තලෙයිමන්නාරමේදී සමාරම්භක උත්සවය පැවැත්වු මලෛයහ දෙමළ ජනයා ජුලි 29 වැනිදා උදෑසන තලෙයිමන්නාරමෙන් ආරම්භ කළ පා ගමන කිලෝ මීටර 300 ට ආසන්න දුරක් ගෙවා දමමින් මාතලේට පැමිණිමෙන් අනතුරුව නිමා කර තිබුනේ අගෝස්තු 12 වැනි දිනයි.
ශ්‍රී ලංකාවේ විශාලතම සමූහ සුසාන හමුවූ දිස්ත්‍රික්ක දෙක වන්නේද මන්නාරම හා මාතලේයි.
සිය ඉතිහාසය අරගලය සහ දායකත්වය පිළි ගැනීම, අනෙකුත් ප්‍රධාන ප්‍රජාවන් හා සමානව වෙනමම අනන්‍යතාව සහිත නිදහස් ශ්‍රී ලංකාවේ ජන කොටසක් ලෙස පිළි ගැනීම, ජාතික මට්ටමේ සාමාන්‍යය හා සමාන මට්ටමක් ළඟාකර ගැනීමට අධ්‍යාපනය සෞඛ්‍යය සහ සමාජ ආරක්ෂණයන් සම්බන්ධ සාධනීය ක්‍රියාමාර්ග, ජීවත්වීමට සරිලන වැටුපක් ගෞරවනීය රැකියා නෛතික ආරක්ෂාව සහ පිරිමි හා කාන්තා කම්කරුවන්ට සමාන වැටුප්, නිවාස සහ ජීවනෝපාය සඳහා සුරක්ෂිත හිමිකමක් සහිත ඉඩම්, දෙමළ භාෂාව සමාන ලෙස භාවිතය සහ ඒ සඳහා සමාන තත්වයක්, රාජ්‍ය සේවා වෙත සමාන ප්‍රවේශය, වැවිලි අංශයේ ජනාවාස නව ගම්මාන ලෙස සීමා නීර්ණය කිරීම, ගෘහස්ථ සේවකයන් ආරක්ෂා කිරීම, මලෛයහ සංස්කෘතිය සංරක්ෂණය හා ප්‍රවර්ධනය කිරීම, රාජ්‍ය පාලනයේ සෑම මට්ටමකදීම අර්ථවත් පාලන කාර්යභාරයක් හිමිවන පරිදි සමානාත්මතාව සහිත සහ අන්තර්කරණය වූ මැතිවරණ ක්‍රමයක් සහ බලය බෙදීමක්, ශ්‍රී ලංකාවේ අර්ථවත් පුරවැසියන් වීම සදහා මලෛයහ දෙමළ ජනතාව ඉල්ලා සිටින මුලික ඉල්ලීම් වේ.
.
