රජයේ ඉඩම් පරිපාලනය බාර බලධාරීන්ගේ අනුමැතියකින් තොරව කිලිනොච්චි නගරයේ පිහිටි පොදු උද්‍යානයක ඉදිකිරීම් කටයුතු සිදු කරන බවට
ශ්‍රී ලංකා යුද හමුදාවට චෝදනා එල්ල වී තිබේ.
යුද ස්මාරකයකට යාබදව පිහිටි පොදු උද්‍යානයක කෙරෙන මෙම ගොඩනැගීම් හමුදා කඳවුරක් ස්ථාපිත කිරීමේ උත්සාහයක්දැයි දෙමළ දේශපාලකයෝ සැක පහල කරති.
එම ස්ථානය නිරීක්ෂණයේ යෙදුනු දෙමළ ජාතික ජනතා පෙරමුණේ නීතිඥ කනගරත්නම් සුගාස් කියා සිටින්නේ කරච්චි ප්‍රාදේශීය සභාවේ අනුමැතියකින් තොරව යුද හමුදාව විසින් කිලිනොචිචියේ චන්ද්‍රන් පොදු උද්‍යානයේ කරන අනවසර ඉදිකිරීම් වහාම නතර කළ යුතු බවයි.
“මහජන උද්‍යානයක් වන චන්ද්‍රන් උද්‍යානයේ අනවසර ඉදිකිරීම් හමුදාව විසින් ආරම්භ කරලා තියනවා. එය මහජනතාව සතු පොදු උද්‍යානයක්. කිසියම් ඉදිකිරීමක් සිදු කරනවා නම් එය කළ හැක්කේ කරච්චි ප්‍රාදේශීය සභාවෙන් අවසර ලබා ගත්තට පස්සේ. ඒකත් හමුදාවට කරන්න බැහැ. මේක වහාම නතර කරන්න කියලා ඉල්ලා සිටිනවා.”
නීතිඥ කනගරත්නම් සුගාස් ප්‍රදේශයේ මාධ්‍යවේදීන් සමග අවධාරණය කර ඇත්තේ පසුගිය කාලය පුරා කිලිනොච්චිය දිස්ත්‍රික්කයේ ඉඩම් අල්ලා ගැනීමට ‘ආක්‍රමණ’ කිහිපයක්ම සිදු වු බවයි.
“කිලිනොච්චිය දිස්ත්‍රික්කය ඉලක්ක කර ගනිමින් පසුගිය කාලයේ විවිධ ප්‍රදේශවල ආක්‍රමණ සිදුවුණා. පොන්නවේලියේ දෙමළ ජනතාවගේ ඉඩමක කැණීම් කටයුතු ආරම්භ කරලා තිබෙනවා. රුද්‍රපුරමේ දී බෞද්ධ විහාරස්ථානයක් තිබෙනවා කියන මුවාවෙන් ආක්‍රමණයක් සිදු වෙලා තිබෙනවා. නාච්චිකුඩා දෙමළ ඉස්කෝලේ නම වෙනස් කරලා. ඊට පස්සේ දැන් චන්ද්‍රන් උද්‍යානයට අත තියලා.”
දෙමළ ජනයාගේ ඉඩම් අත්පත්කරගනිමින් එම ප්‍රදේශ තුළ සිංහල බෞද්ධ ආධිපත්‍යය බලෙන් පටවන බවටත් නීතිඥයා තව දුරටත් චෝදනා කර තිබේ.
“මෙයින් පෙන්නුම් කරන්නේ කුමක්ද? රාජ්‍ය යාන්ත්‍රණය කිලිනොච්චිය දෙසට යොමු වෙලා තියනවා. කිලිනොච්චිය ආක්‍රමණය කිරීමේ උත්සාහය උග්‍ර වෙලා තියනවා. අපි මේකට විරුද්ධව ඉතා දැඩිව ක්‍රියා කරන්න යනවා. ළඟදීම දැවැන්ත උද්ඝෝෂණයක් පවත්වනවා. ජනතාව ඒ ගැන සිතා බැලිය යුතුයි. කිලිනොච්චියේ කේන්ද්‍රය නැති වුණොත් ඒක තවත් උග්‍ර වෙනවා. දෙමළ ජනයාගේ සියලු ඉඩම් අල්ලාගෙන සිංහල බෞද්ධ ආධිපත්‍යය බලෙන් පටවනවා. එයට ඉඩ දෙන්න බෑ.”
යුද හමුදාව විසින් කිලිනොච්චිය චන්ද්‍රන් උද්‍යානයේ කිසියම් ඉදිකිරීම් කටයුත්තක් සිදු කරන ආකාරය දැක්වෙන ඡායාරූප හතරක් සිය X ගිනුමේ පළ කරමින් මැයි 4 වැනිදා දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් ද ප්‍රශ්න කර තිබුනේ යුද හමුදාව මෙම ඉදි කිරීමේ කටයුතු සිදු කරන්නේ කාගේ අනුමැතියෙන්ද, යන්නයි.
“කිලිනොච්චි චන්ද්‍රන් උද්‍යානය ස්ථිර හමුදා කදවුරක් බවට පත්වෙමින් තිබෙනවාද? එතැන විහාරයක් හැදීමේ උත්සාහයක්ද? වර්ග සංහාරක හමුදාව විසින් ඉදි කිරීමේ කටයුතු සිදු කරන්නේ කාගේ අනුමැතියෙන්ද? සියල්ල වහාම නැවැත්විය යුතුයි. හමුදාව වහාම ඉවත් විය යුතුයි.”
සුවිශාල හමුදා ගහනයක් ඇති වන්නියේ ජනතාව ආරක්ෂක විසින් යුද්ධයෙන් අත්පත් කර ගන්නා ලද ඉඩම් ආපසු ලබාගැනීම සඳහා යුද්ධාවසානයෙන් අවුරුදු 15ක් ගතවූ පසුවත්, තවමත් අරගල කරමින් සිටිති.
