මුලතිව් දිස්ත්‍රික්කයෙන් හමු වු ශ්‍රී ලංකාවේ අලුත්ම සමූහ මිනීවලේ කැනීම් කටයුතු යළි ආරම්භ කළ තෙවැනි දිනයේ දී ගොඩගත් මානව ශේෂ හා ඇදුම් කොටස් විමුක්ති කොටි සංවිධානයේ හිටපු සාමාජිකාවන්
දෙදෙනකුගේ බවට විශ්වාසය පලවී තිබේ.
යාපනය විශ්ව විද්‍යාලයේ උපාධි අපේක්ෂක අපේක්ෂිකාවන් සමූහයක් කැනීම් නිරීක්ෂණයට පැමිණ සිටි අවස්ථාවේ ඡායාරූප ගැනීමේ යෙදුනු මාධ්‍යවේදීන් දෙදෙනකුගේ රාජකාරියට පොලිසිය බාධා කිරීම නිසා පරීක්ෂණවල පාරදෘශ්‍ය භාවය පිළිබඳව පළාතේ මාධ්‍ය සංවිධාන තුලින් මතුවී ඇත්තේ සැකයකි.
කැලෑ ඇඳුමින් සැරසුණු ආරක්ෂක අංශ සාමාජිකයන් වලට බැස අත්වැසුම් රහිතව ගොඩගන්නා ශේෂ අතපත ගෑම ද දැකගන්නට ලැබිණි.
සැප්තැම්බර් 8 වැනි සිකුරාදා කැනීම් කටයුතු නිමා විමෙන් පසුව, සිරුරු ගොඩගැනීමේ කටයුතු නිරීක්ෂණය කරමින් සිටි නීතිඥ වී එස් නිරංජන් ප්‍රදේශයේ මාධ්‍යවේදීන් හා කියා සිටියේ මානව අස්ථි කොටස් සමග කාන්තා ඇදුම් ද හමු වු බවයි. එමෙන්ම ඔවුන්ගේ ඇඳුම් වල හදුනාගැනිමේ අංකයක් පැවැති බවත් ඔහු වැඩි දුරටත් සඳහන් කර ඇත.
"මීට පෙර හඳුනාගත් මිනිස් අස්ථි කොටස්වල පළමුවැන්න ගොඩ ගත්තා. දෙවැනි මිනිස් අස්ථි කොටස් ශේෂයත් ගොඩ ගත්තා. ඒ ටික එල්.ටී.ටී.ඊ සංවිධානයේ සාමාජිකාවන්ගේ කියලා විශ්වාස කරනවා. පළවෙනි අස්ථි කොටස්වල පතුරමක් හමුවෙලා තියනවා. පළවෙනි අස්ථි කොටස්වල කොළපාට දිග කලිසමක 3204 ඉලක්කම තියනවා. අත් දිග කමිසයක් 3174, කාන්තාවන්ගේ යට කලිසමක්, තනපටක්, ගොඩගත්තා. දෙවැනි අස්ථි කොටසුත් ගොඩ ගත්තා. මේ මිනිස් අස්ථි කොටසුන් කළින් කියපු වගේ කොළපාට දිග කලිසමක්, කමිසයක්, ඒ වගේ කාන්තාවන්ගේ යට කලිසමක 1564 ඉලක්කම දාලා තියෙන්නේ. මේ දෙක ගත්තා. ඒ දෙක මැද පතුරම් සොයා ගත්තා."
යුද්ධයෙන් වැඩිම හානියට පත් මුලතිව් දිස්ත්‍රික්කයේ කොක්කුතොඩුවායි හිදී මාස දෙකකට ඉහත මතුවූ සමූහ මිනීවලේ කැනීම් කටයුතු අධිකරණ නියෝග මත සැප්තැම්බර් 6 වැනිදා උදෑසන සිට යළි ආරම්භ කර තිබුනි.
කැනීම්වලට නිළ වශයෙන් සම්බන්ධ පුද්ගලයන් හැර වෙනත් කිසිවකුටත් සමූහ සුසාන භූමියට ඇතුල් වීමට අවසර නොදෙන බව සැප්තැම්බර් 5 වැනිදා සහකාර පොලිස් අධිකාරිවරයකු විසින් විනිසුරුවරයාට දැනුම් දී තිබුනද කැනීම් කටයුතු ආරම්භ කළ 6 වැනිදා සවස් කාලයේ පොලිස් රැකවල් තිබියදීම, පරීක්ෂණ භූමියට සිවිල් ඇදුමින් ඇතුල් වී ඡායාරූප ගැනීම ට ශ්‍රී ලංකා පොලිසියේ හා විශේෂ කාර්ය බලකායේ සාමාජිකයන් කටයුතු කළ ආකාරය ප්‍රදේශයේ මාධ්‍යවේදීන් විසින් වීඩියෝ ගත කර තිබුනි.
ඒ සම්බන්ධයෙන් නීතිඥයන් මුලතිව් මහේස්ත්‍රාත් ටි. ප්‍රදීපන් ට දැන්වීමෙන් පසුව මහේස්ත්‍රාත්වරයා පොලීසියට නියෝග ලබා දී ඇත්තේ පිටස්තර පුද්ගලයන්ට එම ස්ථානයට ඇතුළු වීමට ඉඩ ලබා නොදෙන ලෙසයි.
ප්‍රදේශයේ මාධ්‍යවේදීන් පවසන පරිදි සමුහ මිනී වලේ කැනීම් කටයුතු වාර්තාකරමින් සිටි මාධ්‍යවේදී විජයරත්නම් සරවනන්ට සහ බාලනාදන් සතීස්ට සැප්තැම්බර් 7 වැනිදා පොලිස් නිලධාරීන් බාධා පමුණුවා තිබේ.
ඒ සම්බන්ධයෙන් ද නීතීඥයන් මහේස්ත්‍රාත් ටි. ප්‍රදීපන් ට දැන්වීමෙන් පසුව මහේස්ත්‍රාත්වරයා පොලීසියට යළි නියෝග ලබා දී ඇත්තේ කොක්කුතොඩුවායි සමුහ කැනීම් කටයුතු වාර්තා කිරීම සදහා මාධ්‍යවේදීන්ට අවසරය ලබා දී ඇති බැවින් ඔවුන්ට බාධාවකින් තොරව සිය රාජකාරිට ඉටු කරගැනීමට අවස්ථාව ලබා දෙන ලෙසයි.
කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස් අහම්බයෙන් හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.
මිනිස් සිරුරු කොටස් සහ ඇඳුම් කොටස් ජුනි 29 වැනිදා අහම්බයෙන් හමුවු කොක්කුතුඩුවායි භුමිය ජුනි 30 වැනිදා නිරීක්ෂණය කරමින් මහේස්ත්‍රාත් ටී. සරවනරාජා දුන් නියෝගය අනුව ජුලි 6 වැනිදා භූමියේ කැනීම් කටයුතු ආරම්භ කරන ලදී.
එදින අවම වශයෙන් මිනිස් අස්ථි කොටස් දහයකට වැඩි ප්‍රමාණයක් දැකගන්නට ලැබුන බව කැනීම් කටයුතු ඇසින් දුටුවෝ පවසති.
