සංවිධානාත්මක අපරාධකරුවෙකු සහ මහ පරිමාණ මත්ද්‍රව්‍ය ජාවාරම්කරුවෙකු වූ හරක් කටාට රහස් පොලිසියේ රැඳී සිටි කාලය තුළ නිලධාරීන්ගේ සහය ලැබී ඇත්දැයි සෙවීමට ඔහු සම්බන්ධයෙන් විමර්ශන
සිදුකරන ඒකකයේ සියලු නිලධාරීන්ගේ ජංගම දුරකතන වාර්තා ලබා ගෙන සියුම් පරීක්‍ෂණයක් ඊයේ ආරම්භ කර ඇති බව අපරාධ පරීක්‍ෂණ දෙපාර්තමේන්තු ආරංචි මාර්ග සඳහන් කරයි.
හරක් කටා රහස් පොලිසිය භාරයේ සිටියදී ඔහු සම්බන්ධයෙන් විමර්ශන සිදුකරන නිලධාරීන්ගේ දුරකතන දත්ත පිරික්සීම මීට පෙර ද සිදුවුණ ද, හරක් කටාට උදවු උපකාර කළ බව කියන කොස්තාපල්වරයාගේ පළා යාමත් සමග හරක් කටා සම්බන්ධ විමර්ශන කෙරෙන සෙසු නිලධාරීන්ගේ දුරකතන දත්ත වාර්තා ලබා ගෙන ඒ සැක සහිත දුරකතන අංක සම්බන්ධයෙන් පුළුල් පරීක්‍ෂණයක් ඊයේ දියත් කර ඇත.
කෙසේ වෙතත් හරක් කටාට උදවු කළ බව කියන සැකකාර කොස්තාපල්වරයා ඊයේ හවස් වරුව වන විටත් සොයා ගැනීමට විමර්ශන නිලධාරීන්ට හැකියාව ලැබී නැත.
විමර්ශන නිලධාරීන් පවසන්නේ උපපොලිස් පරීක්‍ෂකවරයාගේ ගිනිඅවිය උදුරා ගැනීමෙන් පසු හරක් කටා ඔහුට උදවු කළ බව කියන මෙම කොස්තාපල්වරයා සමග පළා යාමට සැලසුම් සකස් කර තිබූ බවට මේ වන විට අනාවරණය වී ඇති බව ය.
සබැඳි පුවත් :
හරක් කටා ගිනි අවියක් පැහැර ගන්න CIDයේ යකා නටලා !
