ශ්‍රී ලංකාවේ සමූහ සුසාන කැනීම් ඉතිහාසයේ අපරාධය සිදුවූ ස්ථානයක් ලෙස වර්ගීකරණය කරන ලද පරිශ්‍රයේම එයාකාරයෙන් මහජන දායකත්වයෙන් හඳුනාගැනීමක් සිදුකෙරෙන පළමු අවස්ථාව අධිකරණ නියෝගය ප්‍රකාරව 2025 අගෝස්තු 5 වැනිදා පස්වරු 1.30 සිට හවස 5 වන තෙක් සිත්තුපාත්ති සමූහ සුසාන භුමියේ දී සිදු කිරීමට නියමිතය.
එම අවස්ථාව වාර්තාකිරීම ජනමාධ්‍යවේදීන්ට තහනම් කර ඇත.
චෙම්මනි සිත්තුපාත්ති සමූහ සුසානයෙන් මිනිස් අස්ථි සමගම මේ වන තෙක් ගොඩගන්නා ලද පාරිහාරික වස්තු අතර ළදරු කිරි බෝතල්, බෝනික්කකු ඇතුළු සෙල්ලම් බඩු, ළමා පාවහන් සහ පාසල් බෑග් ද වෙයි.
පළාත් බද වාර්තාකරුවන් පවසන්නේ එලෙස ගොඩ ගන්නා ලද පාරිහාරික භාණ්ඩ ප්‍රමාණය 50 ට අධික බවයි.
පාරිහාරික වස්තුන් හදුනා ගැනීමේ අවස්ථාවේදී අනුගමනය කළ යුතු ක්‍රමවේදයන්
අගෝස්තු 5 වැනිදා පස්වරුවේ පාරිහාරික වස්තුන් හදුනා ගැනීමේ අවස්ථාවේදී අනුගමනය කළ යුතු ක්‍රමවේදය සම්බන්ධයෙන් යාපනය මහේස්ත්‍රාත් ඒ.ඒ.ආනන්දරාජා විසින් අගෝස්තු 2 වැනිදා නියෝගයක් නිකුත් කර තිබුනි. අතුරුදහන් වුවන්ගේ ඥාතීන්ට ප්‍රමුඛත්වය ලැබෙන එම පෙරෙට්ටුවේදී පහත සදහන් කරුණු අටට යටත්ව ක්‍රියා කරන ලෙස මහේස්ත්‍රාත් නියෝගයේ වැඩි දුරටත් සදහන් කර තිබේ.
1. ඉහත ක්‍රියා පටිපාටිය අධිකරණ ක්‍රියා පටිපාටියක් ලෙස සලකනු ලබන බැවින්, ක්‍රියා පටිපාටියට සහභාගී වන පුද්ගලයන් විසින් අධිකරණ ක්‍රියා පටිපාටියේ ගෞරවය පවත්වා ගත යුතුය.
2. අතුරුදහන් වූවන් සම්බන්ධයෙන් පැමිණිලි ගොනු කර ඇති ඥාතීන්ට ප්‍රමුඛතාවය දෙනු ලැබේ. ඔවුන්ගේ ඥාතීන් අතුරුදහන් වීම තහවුරු කරන ලියවිල්ලක් ඉදිරිපත් කිරීම අවශ්‍ය වේ. සපයන ලද දත්ත මත පදනම්ව අනෙකුත් පුද්ගලයන් ඇතුළත් කර ගැනීම තීරණය කරනු ලැබේ.
3. නම, හැඳුනුම්පත් අංකය (හෝ විදේශ ගමන් බලපත්‍ර අංකය හෝ රියදුරු බලපත්‍ර අංකය). ඉහත ක්‍රියා පටිපාටියට සහභාගී වන පුද්ගලයන්ගේ ලිපිනය අධිකරණ නිලධාරීන් විසින් සටහන් කරනු ලැබේ.
4. වයස අවුරුදු විසිඑක (21) ට වැඩි පුද්ගලයන්ට පමණක් ඉහත ක්‍රියා පටිපාටියට සහභාගී වීමට අවසර දෙනු ලැබේ.
5. සහභාගී වන පුද්ගලයන්, ඉහත අධිකරණ ක්‍රියාමාර්ග හෝ ප්‍රදර්ශන පටිගත කිරීම හෝ කිසිදු විද්‍යුත් උපකරණයක් රැගෙන යාම හෝ තහනම්ය.
6. ඉහත ක්‍රියාමාර්ගවලට සහභාගී වන අතුරුදහන් වූවන්ගේ ඥාතීන්ට නීතිඥයකු සමඟ පෙනී සිටීමට අධිකරණය අවසරය හිමි වේ.
7. ප්‍රදර්ශන භාණ්ඩ ස්පර්ශ කිරීමට හෝ හැසිරවීමට අවසර නැත.
8. ඉහත ක්‍රියාදාමය අධිකරණ ක්‍රියාදාමයක් ලෙස සලකනු ලබන බැවින්, ඉහත ක්‍රියාදාමය පටිගත කිරීම තහනම් වේ. එබැවින්, මෙම ක්‍රියාදාමය අතරතුර කිසිදු මාධ්‍යවේදියකුට අරියාලෙයි සිත්තුපාත්ති හින්දු සුසාන භූමිය තුළ පටිගත කිරීමට අවසර නැත.
දෙවැනි අදියරේ කැනිම් කටයුතු සිදු කළ 29 වැනි දිනය වු අගෝස්තු 3 වැනි ඉරිදා දහවල් වන විට චෙම්මනි සිත්තුපාත්ති සමූහ සුසානයේ කරන ලද කැනීම්වලින් මේ වන විට කුඩා දරුවන්ගේ ඇතුළු මිනිස් ඇටසැකිලි 120 ක් ගොඩ ගෙන ඇති අතර මතු කරගත් සමස්ත ඇටසැකිලි ගණන 130 ක් බව කැනීම් කටයුතු වාර්තාකරණයේ යෙදී සිටින පළාත් බද වාර්තාකරුවෝ පවසති.
