හිටපු ජනාධිපති මහින්ද රාජපක්ෂ මහතාගේ පෞද්ගලික ආරක්ෂක නිලධාරියකු ලෙස කටයුතු කළ සම්පත් මනම්පේරි ඇතුළු විත්තිකරුවන් සිව්දෙනෙකුට එරෙහිව පවරා ඇති නඩුවක තීන්දුව ලබන නොවැම්බර් 03 වැනිදා ප්‍රකාශයට පත් කරන බව කොළඹ මහාධිකරණය නියෝග කළේය.
කොළඹ මහාධිකරණ විනිසුරු රශන්ත ගොඩවෙල මහතා ඉදිරියේ මෙම නඩුව කැඳවූ අවස්ථාවේදී අදාළ නියෝගය නිකුත් විය.
නාරාහේන්පිට මංසන්ධියේදී වූ කොල්ලය
මෙම නඩුවට පාදක වන්නේ 2009 වසරේ අගෝස්තු මස 12 වැනිදා සිදුවූ බව කියන සිද්ධියකි.
නැගෙනහිර පළාතේ සිට කොළඹ බලා සහල් ප්‍රවාහනය කරමින් සිටි සෙල්වදොරෙයි කෝලවෙන්නාදන් නමැති ව්‍යාපාරිකයා නාරාහේන්පිට මංසන්ධිය ආසන්නයේදී නවතා, පොලිස් නිලධාරීන් ලෙස පෙනී සිටිමින් බියගන්වා සහල් පිරවූ ලොරියක්, මුදල් සහ ජංගම දුරකථනය කොල්ලකෑම සම්බන්ධයෙන් විත්තිකරුවන්ට චෝදනා එල්ල වී ඇත.
එවකට අගමැති ආරක්ෂක අංශයේ සේවය කළ ඉන්දික දොළවත්ත ඇතුළු පිරිසක් සමඟ එක්ව රුපියල් ලක්ෂ 100ක (රුපියල් මිලියන 10ක) පමණ වටිනාකමකින් යුත් සහල් තොගයක් කොල්ලකෑම ඇතුළු අධිචෝදනා හතක් යටතේ නීතිපතිවරයා විසින් මෙම නඩුව ගොනු කර තිබේ.
විත්තිකරුවන් රක්ෂිත බන්ධනාගාරයේ පසුවන බව හෙළිවීම
ඉකුත් සැප්තැම්බර් 30 වැනිදා මෙම නඩුව කැඳවූ අවස්ථාවේදී ප්‍රධාන විත්තිකරු වන සම්පත් මනම්පේරි අධිකරණය හමුවට ඉදිරිපත් කර නොසිටි බැවින් විනිසුරුවරයා ඔහුට එරෙහිව වරෙන්තු නිකුත් කිරීමට පියවර ගත්තේය.
එහිදී විත්තිකරු වෙනුවෙන් පෙනී සිටි නීතිඥ කල්ප පෙරේරා මහතා අධිකරණයට දන්වා සිටියේ, මිද්දෙණිය ප්‍රදේශයේ අයිස් මත්ද්‍රව්‍ය නිෂ්පාදනයට යොදාගන්නා රසායනික ද්‍රව්‍ය අඩංගු බහාලුම් (Containers) දෙකක් සඟවා තබාගැනීමේ සිද්ධියකට අදාළව තම සේවාදායකයා දැනටමත් රක්ෂිත බන්ධනාගාර භාරයේ පසුවන බවයි.
එමෙන්ම සිව්වැනි විත්තිකරු වන නේරංජන් පෙරේරා ද අයිස් මත්ද්‍රව්‍ය ළඟ තබාගැනීමේ චෝදනාවකට රක්ෂිත බන්ධනාගාරගතව සිටින බව නීතිඥ රාහුල් ජයතිලක මහතා එදින අධිකරණයට කරුණු දක්වමින් තහවුරු කළේය.
ඉදිරිපත් වූ කරුණු සලකා බැලූ මහාධිකරණ විනිසුරුවරයා, නඩුවේ තීන්දුව ප්‍රකාශයට පත් කිරීම සඳහා ලබන නොවැම්බර් 03 වැනිදා නඩුව නැවත කැඳවීමට නියම කළේය.