පොලිස් වෙඩි පහරින් පෙබරවාරි 10 වැනිදා ඝාතනයට ලක් වු සිත්තන්කේනියේ ඇල්පිනෝ අයුබ්රාජ් අරුල් ෆයස්ට යුක්තිය ඉල්ලා අල්ලපිඩ්ඩි පොලිස් ස්ථානය ඉදිරිපිටදී 2026 මාර්තු 10 වැනිදා දියත් කළ විරෝධතාවයට ඔහුගේ පවුලේ ඥාතීන් මෙන්ම සිවිල් සංවිධාන ක්‍රියාකාරීන් ද එක්ව සිටි බවයි පළාත් බද වාර්තාකරුවන් පවසන්නේ.
සිය පුතනුවන්ගේ රූපයක් බදාගෙන හඬා වැටෙන අරුල් ෆයස් මාතාව ද විරෝධයට එක්වී සිටිනු මාධ්‍යවේදීන්ගේ කැමරාවේ සටහන්ව තිබුණි.
පොලිස් මාධ්‍ය කොට්ඨාසය 2026 පෙබරවාරි 11 වැනිදා පැය 0400 ට නිකුත් කළ මාධ්‍ය නිවේදනයක සදහන්ව තිබුනේ පෙබරවාරි 10 වැනිදා පොලීසිය විසින් වෑන් රථයකට වෙඩි තැබීමෙන් මියගියේ 19 හැවිරිදි වැඩිහිටියකු බවයි.
එහෙත් මරුමුවට පත් සිත්තන්කේනියේ ඇල්පිනෝ අයුබ්රාජ් අරුල් ෆයාස් 2008 නොවැම්බර් මස 09 වැනි දින උපත ලද්දකු බව ඔහුගේ උප්පැන්නයේ මෙන්ම මරණ පරීක්ෂණ වාර්තාවේ ද සඳහන් වේ.
මිය ගිය සැකකරු මත් ද්‍රව්‍ය භාවිතා කර ඇති බවට රජයේ වෛද්‍ය නිලධාරියා විසින් දන්වා ඇති බවටත් පොලිස් මාධ්‍ය කොට්ඨාසය පෙබරවාරි 11 වැනිදා පැය 0400 ට නිකුත් කළ මාධ්‍ය නිවේදනයේ සදහන්ව තිබුනි.
එහෙත් වෙඩි පහරින් ඝාතනය වු දරුවාගේ සිරුරේ කිසිදු මත්ද්‍රව්‍යයක් තිබු බවක් මරණ පරීක්ෂණ වාර්තාවේ නොතිබීමෙන්, ‘මියගිය සැකකරු වෛද්‍ය පරීක්ෂණයකට ලක් කිරීමේදී ඔහු අයිස් සහ හෙරොයින් භාවිතා කර ඇති බවට රජයේ වෛද්‍ය නිලධාරියා විසින් දන්වා ඇත,” යි පොලිස් මාධ්‍ය කොට්ඨාසය විසින් පෙබරවාරි 11 වැනිදා කරන ලද නිවේදනය අභියෝගයට ලක්ව තිබේ.
විශේෂඥ අධිකරණ වෛද්‍ය නිලධාරි රුද්‍රපසුපති මයෝදරන් විසින් මහේස්ත්‍රාත් MNN හුසේන් වෙත 2026 පෙබරවාරි 10 දා යවන ලද මරණ පරීක්ෂණ වාර්තාවේ දැක්වෙන්නේ පොලිස් වෙඩිල්ලෙන් මරුමුවට පත් 17 හැවිරිදි ඇල්පිනෝ අරුල් ෆයාස් ගේ මරණයට හේතුව “රයිෆල් ගිනි අවියකින් පිටවූ උණ්ඩයකින් මෂ්තිෂ්කය විදාරණය වීම” බවයි.
සිත්තන්කේනියේ ඇල්පිනෝ අයුබ්රාජ් අරුල් ෆයාස් ඝාතනයට කර මාසයක් ගත වී ඇතත් ඝාතනයට වග කිව යුත්තන් මෙතෙක් අත්අඩංගුවට ගෙන අධිකරණයට ඉදිරිපත් කර නොමැති බවට චෝදනා කළ විරෝධතා කරුවන් බලධාරීන්ට බල කර තිබුනේ වැරදි කරුවන් වහා අත්අඩංගුවට ගෙන ඔවුන්ට එරෙහිව නීතිය ක්‍රියාත්මක කරන ලෙසයි.
සබැඳි පුවත් :
ඔලුවට වෙඩිතබා දරුවකු මරාදැමු පොලිස් නිලධාරීන් නිදැල්ලේ: යාපනයේ විරෝධතාවක්
වෙඩි තබා දරුවකු මැරූ බව යටපත් කිරීමට වෙර දරන පොලිස් මෙහෙයුමක් එළිවේ
