සමාජ මාධ්‍යවල වේගය හමුවේ 'වීව්ස්' (Views) හඹා යෑම පසෙකලා, දශක ගණනාවක් පුරා ගොඩනඟා ගත් මහජන විශ්වාසය ආරක්ෂා කරගැනීමට පියවර ගන්නා ලෙස සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස විද්‍යුත් මාධ්‍ය ආයතනවලින් ඉල්ලා සිටියි.
කොළඹ සිනමන් ලේක්සයිඩ් හෝටලයේ පැවති 'ශ්‍රී ලංකා විද්‍යුත් විකාශකයින්ගේ සංසදයේ 2026 වාර්ෂික ජාත්‍යන්තර සමුළුව' අමතමින් අමාත්‍යවරයා මේ බව ප්‍රකාශ කළේය.
අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් ආරම්භ වූ මෙම සමුළුවේදී, වත්මන් මාධ්‍ය ක්ෂේත්‍රය මුහුණ දෙන තීරණාත්මක අභියෝග පිළිබඳව පුළුල් කතිකාවක් ගොඩනැගුණි.
සංඛ්‍යාතයකින් ඔබ්බට ගිය සන්නාමය
විද්‍යුත් විකාශන ආයතනයක් යනු හුදෙක් ගුවන් විදුලි හෝ රූපවාහිනී සංඛ්‍යාතයක් පමණක් නොවන බව අමාත්‍යවරයාගේ අදහසයි.
ජාතික උත්සවවලදී මෙන්ම හදිසි ආපදා අවස්ථාවලදීත් ජනතාව නිවැරදිව දැනුවත් කරමින්, ප්‍රජාවන් එකිනෙකාට සම්බන්ධ කිරීමට මෙරට විද්‍යුත් මාධ්‍ය ඉටු කළ මෙහෙවර සුවිශේෂී වේ. එම කාලයත් සමඟ ගොඩනැගුණු 'මහජන විශ්වසනීයත්වය' ඔවුන් සතු ප්‍රබලතම අවියයි.
AI තාක්ෂණය සහ ව්‍යාජ පුවත් අවදානම
යූටියුබ්, ෆේස්බුක් සහ ටික්ටොක් වැනි නව වේදිකා සමඟ අද වන විට ප්‍රධාන ධාරාවේ මාධ්‍යයට දැඩි තරගයකට මුහුණ දීමට සිදුව තිබේ.
මෙම තරගයට මුහුණ දීම සඳහා සාම්ප්‍රදායික විකාශන මාධ්‍ය සහ ඩිජිටල් වේදිකා එකිනෙකට ප්‍රතිවිරුද්ධ ක්ෂේත්‍ර ලෙස නොසලකා, එකිනෙකට අනුපූරක වේදිකා (Complementary platforms) ලෙස භාවිත කළ යුතු බව අමාත්‍යවරයා පෙන්වා දෙයි.
"කෘත්‍රිම බුද්ධිය (AI) අන්තර්ගත නිෂ්පාදනයට සහ තොරතුරු ගවේෂණයට නව මාවත් විවර කර තිබෙනවා. එහෙත් සංස්කරණය කළ ව්‍යාජ වීඩියෝ (Deepfakes) සහ ව්‍යාජ ශ්‍රව්‍ය පට හරහා සමාජය නොමඟ යැවීමේ බරපතළ අවදානමක් ද පවතිනවා."
එවැනි වටපිටාවක පුවතක් මහජනතාව වෙත මුදා හැරීමට පෙර එහි සත්‍යතාව තහවුරු කිරීම ප්‍රධාන ධාරාවේ මාධ්‍ය සතු ප්‍රමුඛ වගකීම බව වෛද්‍ය නලින්ද ජයතිස්ස අවධාරණය කළේය.
විවේචනය සහ නොමඟ යැවීම අතර වෙනස
අර්බුදයක් වාර්තා කිරීම සහ වාර්තාකරණය හරහා අලුත් අර්බුදයක් නිර්මාණය කිරීම යනු එකිනෙකට හාත්පසින්ම වෙනස් ක්‍රියාවන් දෙකකි.
* රජයේ තීරණ විවේචනාත්මකව ප්‍රශ්න කිරීම ප්‍රජාතන්ත්‍රවාදී මාධ්‍ය භාවිතයක සාධනීය ලක්ෂණයකි.
* අසත්‍ය තොරතුරු මගින් ජනතාව නොමඟ යැවීම මාධ්‍ය ආචාරධර්ම බරපතළ ලෙස උල්ලංඝනය කිරීමකි.
නිදහස්, ස්වාධීන හා වගකීම්සහගත මාධ්‍ය පරිසරයක් උදෙසා සියලු පාර්ශ්ව සමඟ එක්ව කටයුතු කිරීමට රජය සූදානම් බව ද අමාත්‍යවරයා මෙහිදී සඳහන් කළේය.
මෙම අවස්ථාවට රජයේ ප්‍රවෘත්ති අධ්‍යක්ෂ ජනරාල් හර්ෂ බණ්ඩාර, ශ්‍රී ලංකා විද්‍යුත් විකාශකයින්ගේ සංසදයේ සභාපති අසංග ජයසූරිය, ලේකම් ලක්සිරි වික්‍රමගේ, භාණ්ඩාගාරික ශානිල් මෙන්ඩිස් සහ කැඳවුම්කරු නුවන් ලියනගේ යන මහත්වරුන් ඇතුළු මාධ්‍ය ආයතන ප්‍රධානීන් රැසක් එක්ව සිටියහ.
