2027 අයවැය: පාසල් ඩිජිටල්කරණයට සහ ගුරු දීමනාවලට විශේෂ ප්‍රමුඛතාවක්

රටේ අනාගත පරපුර වෙනුවෙන් පාසල් සහ විශ්වවිද්‍යාල පද්ධතිය නවීකරණය කිරීමට 2027 අයවැයෙන් දැවැන්ත මුදලක් වෙන් කිරීමට ජනාධිපති අනුර කුමාර දිසානායක අද (12) පියවර ගත්තේය.

මුදල් අමාත්‍යවරයා ලෙස අයවැය යෝජනා ඉදිරිපත් කරමින් ඔහු සඳහන් කළේ, ලබන වසරේ සිට 2 වන සහ 6 වන ශ්‍රේණි සඳහා නව අධ්‍යාපන ප්‍රතිසංස්කරණ ක්‍රියාත්මක කරන බවයි.

පාසල් පද්ධතිය ඩිජිටල්කරණයට රුපියල් බිලියන 35ක්

දිවයිනේ සියලුම ද්විතීයික පාසල්වලට අන්තර්ජාල පහසුකම් ලබා දීම රජයේ ඉලක්කයයි. දැනටමත් පාසල් 6,225කට අන්තර්ජාල සබඳතා ලබා දී ඇති අතර, ඉතිරි පාසල් 750ට ද කඩිනමින් එම පහසුකම් ලබා දී ප්‍රාථමික පාසල් වෙතද මෙම වැඩසටහන ව්‍යාප්ත කෙරේ.

පාසල් ඩිජිටල්කරණය, ගුරුවරුන්ගේ තාක්ෂණික දැනුම ඉහළ නැංවීම, විද්‍යාගාර සහ ගුරු නිවාස සංවර්ධනය ඇතුළු සමස්ත පාසල් යටිතල පහසුකම් වෙනුවෙන් 2027 වසර සඳහා රුපියල් මිලියන 35,000ක් (රුපියල් බිලියන 35ක්) වෙන් කර ඇත.

ඉදිරි වසර 5 තුළ ඩිජිටල් අධ්‍යාපන වැඩසටහන් සඳහා ඇස්තමේන්තු කර ඇති මුළු මුදල රුපියල් මිලියන 96,500කි (රුපියල් බිලියන 96.5කි). එහි මූලාරම්භය වෙනුවෙන් මෙම වසරේ වෙන් කළ රුපියල් මිලියන 4,000ට අමතරව තවත් රුපියල් මිලියන 3,000ක් වෙන් කිරීමට ද යෝජනා වී තිබේ.

විශ්වවිද්‍යාල පද්ධතිය සහ "දිට්වා" සුළි කුණාටුවෙන් හානි වූ ගොඩනැඟිලි

උසස් අධ්‍යාපන ක්ෂේත්‍රයේ ගොඩනැඟිලි සහ සිසුන්ගේ සුබසාධන පහසුකම් ඉහළ නැංවීමට ද අයවැයෙන් විශේෂ ප්‍රතිපාදන වෙන් වී තිබේ.

වෛද්‍ය පීඨ සංවර්ධනය:
පේරාදෙණිය සහ වයඹ විශ්වවිද්‍යාලවල අංගසම්පූර්ණ වෛද්‍ය පීඨ සහ සායනික ගොඩනැඟිලි ඉදිකිරීමේ රුපියල් මිලියන 8,000ක ව්‍යාපෘතිය වෙනුවෙන් 2027 වසර සඳහා රුපියල් මිලියන 450ක් වෙන් කෙරේ.

ශිෂ්‍ය සුබසාධනය සහ යටිතල පහසුකම්:
විශ්වවිද්‍යාල සිසුන්ගේ සුබසාධන වැඩසටහන් සඳහා රුපියල් මිලියන 6,250ක් (අපජල පිරිපහදු පද්ධති සංවර්ධනයට වෙන් කළ මිලියන 717 ද ඇතුළුව) සහ අධ්‍යයන ගොඩනැඟිලි සංවර්ධනයට රුපියල් මිලියන 2,250ක් වෙන් කර ඇත. වව්නියා විශ්වවිද්‍යාලයේ කාර්ය මණ්ඩල නිල නිවාස ව්‍යාපෘතිය (රුපියල් මිලියන 2,050) ලබන වසරේ ආරම්භ කෙරේ.

ආපදා ප්‍රතිසංස්කරණ:
පසුගියදා බලපෑ "දිට්වා" සුළි කුණාටුවෙන් පේරාදෙණිය විශ්වවිද්‍යාලයට සිදු වූ හානිය පිළිසකර කිරීමට රුපියල් මිලියන 6,150ක් ඇස්තමේන්තු කර ඇත. ඒ ඇතුළුව හානි වූ උසස් අධ්‍යාපන ආයතන ප්‍රතිසංස්කරණය වෙනුවෙන් ලබන වසර සඳහා රුපියල් මිලියන 700ක් වෙන් කිරීමට යෝජනා වී තිබේ.

ගුරු සිසුන්ගේ සහ දහම් පාසල් දීමනා ඉහළට

පාසල් පද්ධතියේ ගුණාත්මකභාවය ඉහළ නැංවීම වෙනුවෙන් ගුරු පුහුණු සිසුන්ට, පිරිවෙන් සිසුන්ට සහ ස්වේච්ඡා දහම් පාසල් ගුරුවරුන්ට ලබා දෙන දීමනා ඉහළ නැංවීමට යෝජනා වී තිබේ.

ගුරු විද්‍යාල සිසුන්:
මෙතෙක් ලබා දුන් රුපියල් 10,500ක මාසික දීමනාව 2027 අප්‍රේල් සිට රුපියල් 20,000 දක්වා වැඩි කෙරේ.

පිරිවෙන් අධ්‍යාපනය:
භික්ෂු සිසුන්ට ලබා දෙන රුපියල් 15ක දෛනික දීමනාව රුපියල් 50 දක්වා ද, ගිහි සිසුන්ගේ රුපියල් 5ක දීමනාව රුපියල් 25 දක්වා ද ඉහළ නැංවේ.

දහම් පාසල් ගුරුවරු:
ස්වේච්ඡා දහම් පාසල් ගුරුවරුන්ගේ වාර්ෂික දීමනාව රුපියල් 7,500 සිට රුපියල් 12,000 දක්වා වැඩි කරන අතර, චීන රජයෙන් ලැබෙන පාසල් නිල ඇඳුම් රෙදි ඉදිරියටත් එලෙසම ලබා දේ.


වැඩිදුර තොරතුරු ඇතුළත් විශ්වාසනීය මූලාශ්‍ර සබැඳි

අයවැය කතාවේ සජීවී විකාශය නරඹන්න:


අයවැය කතාවේ සාරාංශ සටහන