පස් මසකට ඉහත දී අහඹු ලෙස වන්නියෙන් මතුවූ සමූහ මිනීවලේ තෙවැනි අදියරේ කැනීම් කටයුතු සිදු කළ සිව්වැනි දිනයේදී තවත් පුද්ගලයන්
තිදෙනකුට අයත් ඇටසැකිලි ගොඩ ගෙන තිබේ.
නොවැම්බර් 23 වැනිදා කැනීම් කටයුතු නිමා කිරීමෙන් පසු සිරුරු ගොඩගැනීම මෙහෙයවන මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව සදහන් කළේ මිනිස් අස්ථි වලට අමතරව පතොරම් සහ හැඳිනුම් තහඩු හමුවු බවයි.
"මිනිස් ඇටසැකිලි තුනක් අද ගොඩ ගත්තා. තවත් ඇටසැකිලි දෙකක කොටස් ගොඩ ගත්තා. මේකත් එක්ක පතොරම්, බෝම්බ කොටස් සහ අංක තහඩුවක් සොයා ගෙන තියනවා." ඔහු ඊයේ පැවසිය.
පුද්ගලයන් දාහත් දෙනකුට අයත් අස්ථි කොටස් ගොඩ ගෙන තිබියදී සැප්තැම්බර් 15 වැනි දා කැනීම් කටයුතු තාවකාලිකව නිමා කළ කොක්කුතොඩුවායි සුසානයේ කැනීම් මාස දෙකකට වැඩි කාලයකින් පසු නොවැම්බර් 20 වැනි සදුදා මුලතිව් මහේස්ත්‍රාත් ධර්මලිංගම් ප්‍රදීපන්ගේ අධික්ෂණය යටතේ යළි ආරම්භ කෙරුනි.
ඊයේ දිනයේ කැනීම් කටයුතු නිමා කිරීමෙන් පසු මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව වැඩි දුරටත් සදහන් කළේ සුසාන භුමියේ ප්‍රමාණය තීරණය කිරීම රේඩාර් උපකරණ භාවිතයෙන් සිදු කිරීමට අද දිනයේ ආරම්භ කරන බවයි.
කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.
