ජනතාවගෙන් 50%කට වැඩි පිරිසක් පාස්කු ප්‍රහාරයට දේශීය දේශපාලන බලවේග සම්බන්ධ බව
කියන්නේ යැයි සමීක්ෂණයකින් හෙළි වේ.
ප්‍රතිචාර දැක්වූ අයගෙන් 40% කට ආසන්න ප්‍රමාණයක් තම මතය ප්‍රකාශ කිරීම ප්‍රතික්ෂේප කළ හෝ ඔවුන්ට මේ පිළිබඳ කිසිදු අදහසක් නොමැති බව කියයි.
පාස්කු ඉරුදින එල්ලවූ බෝම්බ ප්‍රහාරයට දේශපාලන හස්තවල සම්බන්ධයක් නොමැති බවට විශ්වාස කරන්නේ ශ්‍රී ලංකාවේ ජනගහණයෙන් සියයට 8 ක ප්‍රමාණයක් බව පසුගිය ඔක්තෝබර් මස සිදුකළ සමීක්ෂණයකින් හෙළි වූ බව 'වෙරිටේ රිසර්ච්' ආයතනය ප්‍රකාශ කරයි.
2019 වර්ෂයේ පාස්කු ඉරුදින එල්ල වූ බෝම්බ ප්‍රහාරයට, දේශීය දේශපාලන බලවේග සම්බන්ධ බවට ශ්‍රී ලංකාවේ ජනගහනයෙන් අඩකටත් වඩා වැඩි ප්‍රමාණයක්, එනම් 53%ක් විශ්වාස කරන බව පසුගිය ඔක්තෝබර් මාසයේ දී සිදු කරන ලද Syndicated surveys සමීක්ෂණයකින් අනාවරණය වී තිබේ.
සමීක්ෂණයට සහභාගීවූවන් වෙත ප්‍රහාරය පිටුපස සිටින්නේ කවුරුන්ද යන්න පිළිබඳව රටේ ප්‍රචලිත මත තුනක් ඉදිරිපත් කෙරුණු අතර, ඒවා අතරින් වඩාත්ම එකඟවන මතය තෝරා ගැනීමට අවස්ථාව ලබාදීම සිදුවිය.
එම මතයන් පහත පරිදිය.
1) එය සිදු කරනු ලැබුවේ අන්තරායකර විදේශ බලවේග සමඟ කටයුතු කළ ශ්‍රී ලාංකීය අන්තවාදීන් විසිනි.
2) එය දේශීය දේශපාලන බලවේග සමඟ කටයුතු කළ ශ්‍රී ලාංකීය අන්තවාදීන් විසින් සිදු කරන ලද්දකි.
3) දේශීය දේශපාලන බලවේග සහ අන්තරායකර විදේශ බලවේග යන දෙකම සමඟ කටයුතු කරන ලද ලාංකීය අන්තවාදීන් විසින් එය සිදු කරන ලදී.
53% ක් විශ්වාස කළේ දේශීය දේශපාලන බලවේග මෙයට සම්බන්ධ බවයි.
මේ තුළවූ 30% ක් දෙවන පිළිතුර තෝරා ගත් අතර 23% ක් තුන්වන පිළිතුර තෝරා ගත්හ. එය දේශීය දේශපාලන බලවේගවල මැදිහත්වීමකින් තොරව සිදු කරන ලද්දක් බව විශ්වාස කළේ 8% ක් පමණි (පළමු පිළිතුර). 39%ක් වූ ඉහළ ප්‍රතිශතය කියා සිටියේ තමන්ට මේ පිළිබඳව කිසිදු මතයක් නොමැති බව හෝ අදහස් දැක්වීම ප්‍රතික්ෂේප කරන බවයි.
2019 අප්‍රේල් 21 පාස්කු ඉරිදා දිනයේ ශ්‍රී ලංකාවේ කතෝලික හා ක්‍රිස්තියානි දේවස්ථාන තුනක් ද, කොළඹ සුඛෝපභෝගී හෝටල් තුනක් ද ඉලක්කකර ත්‍රස්තවාදී මරාගෙන මැරෙන බෝම්බ ප්‍රහාර මාලාවක් එල්ල වූ අතර එහිදී පුද්ගලයින් 269 දෙනෙකු ජීවිතක්ෂයට පත් විය.
සමීක්ෂණ ක්‍රමවේදය:
ඉහත දක්වා ඇති සොයාගැනීම් දීප ව්‍යාප්ත, ජාතික වශයෙන් නියෝජනය වන ශ්‍රී ලංකා වැඩිහිටි පුරවැසියන් 1,029 දෙනෙකුගේ ප්‍රතිචාර මත පදනම් වේ. සමීක්ෂණ නියැදිය සහ ක්‍රමවේදය සැළසුම් කර ඇත්තේ 95% විශ්වාසනීය මට්ටමක් සහ උපරිම වැරදි ආභිතය (error margin) ±3% මට්ටමක පැවතෙන පරිදි ය.
