යුද්ධය නිමා වීමත් සමග ශ්‍රී ලංකා යුද හමුදාවට බාර දුන් නෑසියන්ට අත් වු ඉරණම හෙලි කරන ලෙස බලකරමින් වන්නියේ දී විරෝධතා දියත් කළ අතුරුදහන් කරනු ලැබුවන්ගේ ඥාතීන්ගේ සංවිධානය විසින් ජාත්‍යන්තර මානව හිමිකම් දිනය ශෝක දිනයක් ලෙසින් සමරා තිබේ. 


නැගෙනහිර පළාත තුළ මානව හිමිකම් දිනය සමරා ඇත්තේ එම පළාත තුළ සිදු වන සියළුම ආකාරයේ මානව හිමිකම් උල්ලංඝන නතර කරන ලෙස බල කරමින් මානව හිමිකම් කොමිෂන් සභාවේ මඩකලපුව ප්‍රාදේශිය කාර්යාලය ඉදිරිපිට දී විරෝධතා දියත් කරමිනි. 

පළාත් බද වාර්තාකරුවන් පවසන පරිදි දෙසැම්බර් 10 වැනි ඉරිදා මුලතිව්, වව්නියා සහ කිලිනොච්චි දිස්ත්‍රික්කයන්හි අතුරුදහන් කරනු ලැබුවන්ගේ ඥාතීන්ගේ සංවිධාන විසින් විරෝධතා පවත්වා එක් හඬින් ඉල්ලා ඇත්තේ දාහතර වසරකට වැඩි කාලයක් තිස්සේ අතුරුදහන් කර සිටින සිය සමීපතමයන් වෙනුවෙන් යුක්තිය ඉටු කරන ලෙසයි. 

යුද්ධය අවසානයේ ශ්‍රී ලංකා ආරක්ෂක හමුදාවලට බාරදුන් තම දරුවන් ඇතුළු නෑ හිතවතුන් පිළිබඳ සත්‍යය කවදා හෙළි කරගන්නට ලැබේද යන්න එම විරෝධතාවලදී ඇසුණු ප්‍රධාන ප්‍රශ්නය විය.

 

යුද්ධයෙන් වැඩිම හානියට පත් මුලතිව් දිස්ත්‍රික්කයේ බලහත්කාරයෙන් අතුරුදහන් කරන ලද්දවුන්ගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී මාතාව විරෝධතාවයෙන් පසු මාධ්‍ය වෙත අදහස් දක්වමින් සඳහන් කළේ තම සමීපතමයන්ට යුක්තිය ඉටු වන තෙක් ජාත්‍යන්තර මානව හිමිකම් දිනය යනු ශෝක දිනයක් බවයි. 

 

"අපේ ඥාතීන් අපිට හම්බවෙන්නේ කවදාද? එහෙම නැතිනම් අපිට යුක්තිය හරියට ඉටුවන දවස තමයි අපි ජාත්‍යන්තර මානව හිමිකම් දිනය කියලා කෙලින් හිටිගන්න පුළුවන්. එතෙක් අපට මේක ශෝක දිනයක්." 

ඇය එහිදී වැඩි දුරටත් සදහන් කර තිබුනේ ශ්‍රී ලංකාවේ දෙමළ ජනයාට යුක්තිය ඉටු කිරීමට එක්සත් ජාතීන්ගේ සංවිදානයද අසමත් වු බවයි. 

"ජාත්‍යන්තරේටවත් දෙමළ ජනතාව වන අපිට යුක්තිය ලබා දෙන්න බැරි උනා. ඔවුන් වෙන රටවල විශේෂයෙන් යුක්රේනයේ යුද්ධය සම්බන්ධයෙන් කදුළු සලමින් එක්සත් ජාතීන්ගේ සංවිධානයත් ඒක ගැන තමයි අවධානය යොමු කරන්නේ. කෙසේ වෙතත් ලංකාවේ විතරක් දෙමළ අයව ඝාතනය කරලා වලවල් වලට දානකල් බලාගෙන හිටියා. එදා ඔවුන් මේක අත ඇරියත් මේ වෙලාවේ හරි අපිට සාධාරණයක් ඉටු කර දීමට එයාලා පසුබට වන්නේ ඇයි කියන ප්‍රශ්නය අපිට පැන නගිනවා." 

"හමුදාවට බාරදුන්නු අයට මොකද උනේ" යනුවෙන් දෙමළ, ඉංග්‍රීසි සහ සිංහල භාෂා ත්‍රිත්වයෙන් සදහන් බැනරයක් පෙරටු කරගනිමින් කිලිනොච්චි දිස්ත්‍රික්කයේ බලහත්කාරයෙන් අතුරුදහන් කරන ලද්දවුන්ගේ ඥාතීන් ජගත් මානව හිමිකම් දිනයේ දී විරෝධතා දියත් කර තිබුනේ බලහත්කාරයෙන් අතුරුදහන් කළ සිය සමීපතමයන්ගේ ඡායාරූප ද අතැතිවයි. 

Ki 02Ki 03
අතුරුදහන් කළවුන්ට යුක්තිය ඉල්ලා වව්නියාවේ දියත් කෙරෙන අඛණ්ඩ විරෝධතාවයට දෙසැම්බර් 10 වැනිදාට දින 2485 ක් සම්පුර්ණ වී තිබුනි. 

මයිලත්තමඩු, මාදවනෙයි පිහිටි තෘණ භුමිය බලහත්කාරයෙන් අල්ලාගෙන සිටින සිංහල ගොවීන් ඉවත් කර, නැගෙනහිර පළාත තුළ සිදු වන සියළුම ආකාරයේ මානව හිමිකම් උල්ලංඝන නතර කරන ලෙස බල කරමින් දෙසැම්බර් 10 වැනිදා මානව හිමිකම් කොමිෂන් සභාවේ මඩකලපුව ප්‍රාදේශීය කාර්යාලය ඉදිරිපිට දී සිවිල් සංවිධාන ක්‍රියාකාරීන්ගේ සහභාගීත්වයෙන් විරෝධතාවයක් දියත් කර තිබුනි. 

 

එම විරෝධතාවයට එක්ව සිටි මයිලත්තමඩු මාදවනෙයි කිරි ගොවි සමිතියේ සභාපති සීනිතම්බි නිමලන් ප්‍රදේශයේ මාධ්‍යවේදීන් සමග පවසා තිබුනේ තෘණ භුමිය බලහත්කාරයෙන් අල්ලාගෙන සිටින සිංහල ගොවීන් ඉවත් කරන ලෙස ඉල්ලමින් මඩකලපුව සිත්තාන්ඩි පාසල ඉදිරිපිටදී සැප්තැම්බර්15 වැනි සිකුරාදා දෙමළ කිරි ගොවීන් ආරම්භ කළ විරෝධතාවයට දෙසැම්බර් 10 වැනිදා වන විට දින 87 ක් සම්පුර්ණ වන අතර එම කාලය තුලදී කිරි ගවයන් 150 ට වැඩි ප්‍රමාණයක් ඝාතනය කර ඇති බවයි. 

 

"හරකුන්ට එක දිගට වෙඩි තියනවා, කපනවා, සොරකම් කරනවා. මේක තමයි වැඩේ. එහේ පොලිස් පෝස්ට් එකක් නමට දාලා තියනවා. හරක්ට වෙඩි තිබ්බා කියලා කිව්වොත් කරදියනාරු පොලීසියට ගිහින් පැමිණිල්ලක් දාන්න කියනවා. පොලීසියේ පැමිණිල්ලක් කරලා ඇවිල්ලා කිව්වොත් නිකං බලන් ඉන්නවා. මෙහෙමයි අපිට යුක්තිය ඉටු වෙන්නේ. අපට යුක්තිය ලැබෙන්නේ නෑ. අපේ හරක් 153 ක් නැති උනා. ඒකෙ වටිනාකම බලන්න. තවම මේකට විසදුමක් නෑ. ජනාධිපති විසඳුමක් ලබා දෙනවා කිව්වට තාම මුකුත් සිදු වෙලා නෑ. හැමෝම අපිව මේ විදියට රවට්ටනවා.” 

නැගෙනහිර පළාත තුළ සිදුවන මානව හිමිකම් උල්ලංඝන සදහා යුක්තිය ලබා දෙන ලෙසත්, රඳවා තබාගෙන සිටින දේශපාලන සිරකරුවන්ට නිදහස ලබා දෙන ලෙසත්, නැගෙනහිර දෙමළ මාධ්‍යවේදීන්ට සිදු කරන තර්ජන නතර කරන ලෙසත්, බලහත්කාරයෙන් අතුරුදහන් කළ අය වෙනුවෙන් ජාත්‍යන්තර යුක්තිය ලබා දෙන ලෙසත්, ත්‍රස්තවාදය වැළක්වීමේ පනත (PTA) යොදා ගනිමින් සිවිල් පුරවැසියන්ට සිදු කරන පීඩාවන් නතර කරන ලෙසත් මානව හිමිකම් කොමිෂන් සභාවේ මඩකලපුව ප්‍රාදේශිය කාර්යාලය ඉදිරිපිට දී දියත් කළ විරෝධතාවයේදී බල කර සිටි බව පළාත් බද වාර්තාකරුවෝ වැඩි දුරටත් පවසති. 

 

මේ අතර කාන්තා අයිතිවාසිකම් ශක්තිමත් කරන ලෙස බලකිරීම ඇතුළු ඉල්ලීම් කිහිපයක් මුල් කරගනිමින් දෙසැම්බර් 10 වැනි ඉරිදා කිලිනොච්චි නගරයේදීත්, දෙසැම්බර් 11 වැනි සදුදා යාපනයේදීත් රාජ්‍ය නොවන සංවිධාන විසින් විරෝධතා දියත් කළ අතර ආණ්ඩුක්‍රම ව්‍යවස්ථාව මගින් තහවුරු කර තිබෙන මානව හිමිකම් ආරක්ෂා කරන ලෙස බලකරමින් දෙසැම්බර් 11 වැනි සදුදා මන්නාරමේදිත් රාජ්‍ය නොවන සංවිධාන විසින් විරෝධතා සංවිධානය කර තිබු බව පළාත් බද වාර්තාකරුවෝ වැඩි දුරටත් පවසති. 

 

75 වැනි ජගත් මානව හිමිකම් දිනයදා දෙමළ ජනයාගේ අයිතීන් වෙනුවෙන් දකුණේ විදීවල කිසිදු විරෝධතාවක් දියත් වු බවක් දැනගන්නට නැතත් අගනුවර පිහිටි ප්‍රසිද්ධ ශාලා කීපයකම ජාත්‍යන්තර මානව හිමිකම් සමරු, රැස්වීම් දෙසැම්බර් 10 වැනිදාත් 11 වැනිදාත් පවත්වා තිබේ. 


worky

worky 3

Follow Us

Image
Image
Image
Image
Image
Image