යුද පීඩිත වන්නියේ, කොක්කුතොඩුවායි ප්‍රදේශයෙන් හය මසකට ඉහත දී අහඹු ලෙස හමුවු සමුහ සුසානයෙන් ගොඩගත් සිරුරුවල ස්ත්‍රී, පුරුෂ භාවය සහ වයස හෙළි කර ගැනීම සදහා ලබන සතියේදී පරීක්ෂණ කටයුතු සිදු කිරීමට නියමිතව තිබේ. 


කොක්කුතොඩුවායි මහාවිද්‍යාලය සමීපයෙන් අස්ථි කොටස් හමුවීම සම්බන්ධයෙන් පොලීසිය ජුනි මස අගදී මුලතිව් අධිකරණයේ ගොනු කළ නඩුව දෙසැම්බර් 14 වැනි බ්‍රහස්පතින්දා කැදවා තිබු අතර එහිදී සිදු වු සාකච්ඡාව සම්බන්ධයෙන් මාධ්‍යයට කරුණු හෙළි කරමින් නීතිඥ වී.කේ නිරංජන් සදහන් කළේ එම පරීක්ෂණ කටයුතු සිදු කරන දින අධිකරණ වෛද්‍ය නිලධාරියා විසින් අධිකරණයට දැනුම් දෙන ලද බවයි. 

"දැනටමත් ගොඩ ගෙන ඇති මිනිස් ඇටසැකිලි හතළිහේ වයස, පිරිමි අයගේද, නැතිනම් කාන්තාවන්ගේ ද කියලා පරීක්ෂණ කටයුතු දෙසැම්බර් 21 සහ 22 යන දෙදින තුළ යාපනයේ දී සිදු කරන බව අධිකරණ වෛද්‍ය නිලධාරී වෛද්‍ය වාසුදේව අධිකරණයට දැනුම් දුන්නා." 

සමුහ සුසානයේ සිරුරු ගොඩගැනීම මෙහෙයවනු ලැබුවේ මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේව විසිනි. 

කෝකිලායි, මුලතිව් ප්‍රධාන මාර්ගය හරහාද සමූහ සුසානය ව්‍යාප්ත වී ඇති බව අනාවරණය වීමත් සමග සමුහ සුසානය සම්පුර්ණයෙන්ම කැනීමට තීරණය වු බැවින් කැනීම් කටයුතු තාවකාලිකව නවතා දැමීමට පසුගිය ජුනි 29 වැනිදා අධිකරණය තිරණය කර තිබුනි. 

නීතිඥ වී.කේ නිරංජන් වැඩි දුරටත් දෙසැම්බර් 14 වැනිදා මාධ්‍යවේදීන් හමුවේ පවසා සිටියේ කැනීම් කටයුතු සිදු කිරීමට අවශ්‍ය වියදම් සම්බන්ධයෙන්ද අද දිනයේ අධිකරණයේ දී සාකච්ඡා වු බවයි. 

"මාර්තු මාසයේ ආරම්භ කිරීමට නියමිත කැණීම් කටයුතු ගැන සොයා බැලුවා. ඒ සඳහා වන වියදම්, විශේෂයෙන්ම මාර්ග සංවර්ධන අධිකාරිය මගින් මාර්ගය කැඩීමට සහ අලුත්වැඩියා කිරීමට වැයවන මුදල පිළිබඳව සාකච්ඡා කළා." 

අධිකරණයේ පැවැති සාකච්ඡාව සදහා පළාත් මාර්ග සංවර්ධන අධිකාරියේ නිලධාරීන් මෙන්ම මුලතිව් දිස්ත්‍රික් ලේකම් කාර්යාලයේ ගණකාධිකාරී වරයාද සහභාගී වී තිබේ. 

 

මුලතිව් අධිකරණයේදී නොවැම්බර් 29 වැනි බදාදා පැවැති සාකච්ඡාවක දී තිරණය වී තිබුනේ කැනීම් කටයුතු ලබන වසරේ මාර්තු 1 වැනිදා සිට යළි ආරම්භ කිරීමටයි. ඒ සම්බන්ධයෙන් තව දුරටත් තිරණ ගැනීම සදහා මෙම නඩුව පෙබරවාරි 22 වැනිදා යළි කැදවීමට මුලතිව් මහේස්ත්‍රාත් ධර්මලිංගම් ප්‍රදීපන් තිරණය කළ බවත් නීතිඥයා තව දුරටත් සදහන් කළේය. 

 

කොක්කුතොඩුවායි සමූහ මිනීවලේ තෙවැනි අදියරේ කැනීම් නමවැනි දිනටත් නොවැම්බර් 29 වැනිදා සිදු කිරීමෙන් අනතුරුව දහවල් කාලයේ නතර කරන විට කොක්කුතොඩුවායි සමුහ සුසානයෙන් අවම වශයෙන් පුද්ගලයන් 40 දෙනකුට අයත් අස්ථි කොටස් ගොඩ ගෙන තිබුනි. ඒ සිරුරු එල්.ටී.ටී.ඊ සාමාජිකාවන්ගේ බවට සැක කෙරෙන සාක්ෂි කිහිපයක් ද වේ. 

කැනීම් කටයුතු නිමා කිරීමෙන් පසු වෝහාරික පුරාවිද්‍යාඥ මහාචාර්ය රාජ් සෝමදේව සමුහ සුසානය සමීපයේ සිට සදහන් කර තිබුනේ දැනට සිදු කර තිබෙන වැඩ කටයුතු සම්බන්ධයෙන් මුලික වාර්තාවක් දෙසැම්බර් 31 වැනිදා වනවිට අධිකරණයට ඉදිරිපත් කිරීමට නියමිත බවයි. 

මේ වන විට කැනීම් කටයුතු සිදු කර තිබෙන භුමියේ ප්‍රමාණය මෙන්ම ඉදිරි කැනිම් කටයුතු සිදු කිරීමට අපේක්ෂා කරන භුමියේ ප්‍රමාණය සම්බන්ධයෙන්ද ජ්‍යෙෂ්ඨ මහාචාර්ය වරයා එහිදී විස්තර කර තිබුනි. 

“අපි දැනට හාරලා තියනවා මීටර් 3 ක් පළල, මීටර් 14 ක් දිග අගලක්. එසේ දිග පළල උනේ අපි මෙතෙන්ට එනකොටත් බර යන්ත්‍ර වලින් ඒක හාරලා තිබුන නිසා. ඉතින් අපි මේ ඇට සැකිලි 40 ක් ඉවත් කරාට පස්සේ තව අවම වශයෙන් මිටර් දෙකක් ඉදිරියට අපිට හාරන්න තියනවා. මීටර් 3 යි මීටර් 2 යි කියපුවාම වර්ග මීටර් ගත්තොත් එහෙම දිග 2 යි, පළල 3 යි, ගැඹුර මීටර් එක හමාරක් පමණ තියනවා. අපේ ඇස්තමේන්තුව කියුබ්ක් මීටර 6.63 ක ප්‍රමාණයක් පස් ඉවත් කරන්න තියනවා තව ඉතුරු ඇටසැකිලි මතුකරගැනීම සදහා.“ 

කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය. 


worky

worky 3

Follow Us

Image
Image
Image
Image
Image
Image