එස්. එම්. මරික්කාර් මන්ත්‍රීවරයා පවසන්නේ, දින කිහිපයකට පෙර පැවති පක්ෂයේ කළමනාකරණ කමිටුවේදී නොවැම්බර් 21 රැලියට සහභාගී නොවීමට පැහැදිලි තීරණයක් ගත්බවයි.
ශ්‍රී ලංකා පොදු ජන පෙරමුණ ප්‍රමුඛ වාමාංශික කඳවුර වෙනමත්, එක්සත් ජාතික පක්ෂය හා සමගි ජන බලවේගය දක්ෂිනාංශික කඳවුර වෙනමත් පෙරමුණු දෙකකින් ක්‍රියාත්මකවිය යුතුබවට මෙහෙයුම් කමිටුවේදී සාකච්ජාවට ලක්වූ බව මරික්කාර් මන්ත්‍රීවරයා වැඩි දුරටත් කියා සිටියේය.
''මහජන හඬ'' නමින් නොවැම්බර් 21 දා පැවැත්වීමට නියමිත විරෝධතා රැළිය සඳහා විපක්ෂයේ දේශපාලන පක්ෂ රැසක් සහභාගිවීමට නියමිත බව ඊයේ (27) කොළඹ නිපෝන් හෝටලයේ පැවති මාධ්‍ය හමුවකදී විපක්ෂයේ නියෝජිතයන් කියා සිටියේය.
පිවිතුරු හෙළ උරුමය නායක නීතිඥ උදය ගම්මන්පිල, ශ්‍රී ලංකා පොදු ජන පෙරමුණ මහ ලේකම් සාගර කාරියවසම්, එක්සත් ජාතික පක්ෂයේ මහ ලේකම් තලතා අතුකෝරළ, ශ්‍රී ලංකා නිදහස් පක්ෂයේ උප සභාපති මහින්ද අමරවීර, හිටපු අමාත්‍ය අනුර ප්‍රියදර්ශන යාපා ද මෙහිදී අදහස් දැක්වීය.
එක්සත් මහජන පක්ෂය නියෝජනය කරමින් එහි ලේකම් ටිරාන් අලස්, ශ්‍රී ලංකා මහජන පක්ෂය නියෝජනය කරමින් එහි නායක අසංක නවරත්න, නව ජනතා පක්ෂය නියෝජනය කරමින් එහි නායක සුගීෂ්වර බණ්ඩාර යන අය ද, පක්ෂ නියෝජිතයන් ලෙසින් පාර්ලිමේන්තු මන්ත්‍රී ඩීවී චානක, හිටපු අමාත්‍ය ප්‍රසන්න රණතුංග, හිටපු අමාත්‍ය සාගල රත්නායක, හිටපු පාර්ලිමේන්තු මන්ත්‍රීවරුන් වන සංජීව එදිරිමාන්න, මොහොමඩ් මුසාමිල්, අජිත් රාජපක්ෂ, නීතිඥ ප්‍රේම්නාත් සී. දොලවත්ත, යන අය ඇතුළු පිරිසක්ද මෙම මාධ්‍ය හමුවට සහභාගී වූහ.
