යුද්ධයට නායකත්වය දුන් ශ්රී ලංකා යුද හමුදාවේ 20 වැනි යුද හමුදාපතිවරයා වූ ජනරාල් දයා රත්නායක
විපක්ෂ නායක සජිත් ප්රේමදාස හමුවී සමගි ජන බලවේගය හා එක්වී තිබේ.
එහිදි හිටපු හමුදාපතිවරයා සමගි ජන බලවේගයේ රාජ්ය ප්රතිපත්ති පිළිබඳ ජ්යෙෂ්ඨ උපදේශකවරයකු ලෙස පත් කිරීමට ද විපක්ෂ නායකවරයා කටයුතු කර ඇත.
කුරුණැගල මලියදේව විද්යාලයේ ආදි ශිෂ්යයකු වූ හිටපු හමුදාපතිවරයා වසර 35කට (1980-2015) අධික කාලයක් යුද හමුදාවේ පාබල සේනාංකයට නායකත්වය ලබා දෙමින් කටයුතු කළ අතර අවසන් යුද්ධයේදී ද එතුමා සුවිශේෂී දායකත්වයක් ලබා දුන්නේය.
එසේම හෙතෙම කලක් ශ්රී ලංකා වරාය අධිකාරියේ සභාපතිවරයා මෙන්ම ගෝඨාභය රාජපක්ෂ ජනාධිපතිවරයාගේ රජයේ කර්මාන්ත අමාත්යාංශයේ ලේකම්වරයා වශයෙන් ද කටයුතු කරනු ලැබීය.
1980 දී කැඩෙට් නිලධාරියෙකු ලෙස සිය හමුදා ජීවිතය ආරම්භ කළ ඔහු ශ්රී ලංකා හමුදා විද්යාපීඨයේ මූලික පුහුණුව ලබා 1981 දී ශ්රී ලංකා පාබල හමුදාවේ දෙවන ලුතිනන්වරයකු ලෙස පත් කරන ලදී. ඉන් අනතුරුව ඔහු කමාන්ඩෝ නිලධාරීන්ගේ පාඨමාලාවල පාබල හමුදාවේ තරුණ නිලධාරීන්ගේ පාඨමාලාව සහ බලඇණි ආධාරක ආයුධ පාඨමාලාව සම්පූර්ණ කළේය. 1993 ජනවාරි සිට 1996 ජනවාරි දක්වා දයා රත්නායක ශ්රී ලංකා පාබල හමුදාවේ 6 වැනි බලඇණියේ අණදෙන නිලධාරියා ලෙස සේවය කළේය. ඉන් අනතුරුව ඔහු බංග්ලාදේශයේ ආරක්ෂක සේවා අණ හා මාණ්ඩලික විද්යාලයෙන් උපාධිය ලබා ගත්තේය. එසේම චීනයේ ජාතික ආරක්ෂක විශ්වවිද්යාලයෙන්, එක්සත් ජනපදයේ යුද හමුදා බුද්ධි පාසලෙන්, එක්සත් රාජධානියේ ක්රැන්ෆීල්ඩ් විශ්වවිද්යාලයෙන්, එක්සත් ජනපදයේ හවායි හි හොනොලුලු හි ආරක්ෂක අධ්යයන සඳහා ආසියා -පැසිෆික් මධ්යස්ථානයේ උසස් සන්නිවේදන කුසලතා පාඨමාලාව ඇතුළු පාඨමාලා රැසක් හදාරා තිබේ.
එසේම 6 වැනි බලඇණිය ශ්රී ලංකා පාබල රෙජිමේන්තුවට අණ දුන් අතර ඔහු, නැගෙනහිර පළාතේ 23 පාබල සේනාංකයේ අණදෙන නිලධාරියා ලෙස ද සේවය කළේය.
වාකරේ සහ තොප්පිගල මෙහෙයුම්වලදී ඔහු ඉටු කළ කාර්යභාරය සුවිශේෂී වන අතර එසේම පුනරුත්ථාපන කාර්යාංශයේ කොමසාරිස් ජනරාල්වරයා ලෙස හිටපු එල්ටීටීඊ සටන්කාමීන් 12,000 ක් පුනරුත්ථාපනය කිරීම සඳහා ද කටයුතු කරනු ලැබුවේ හිටපු යුද හමුදාපතිවරයා වූ ජනරාල් දයා රත්නායක විසිනි.
ඔහුගේ අනෙකුත් කැපී පෙනෙන පත්වීම් අතර ශ්රී ලංකා හමුදා ඇකඩමියේ අණදෙන නිලධාරී සහ අධ්යක්ෂ මාධ්ය සහ ආරක්ෂක අමාත්යාංශයේ හමුදා ප්රකාශක ඇතුළත් වේ. යුද්ධයෙන් පසු 2013 අගෝස්තු 1 වැනි දින සිට හෙතෙම ශ්රී ලංකා යුද හමුදාවේ 20 වැනි අණදෙන නිලධාරියා බවට පත් වූ අතර ඒ සමගම ලුතිනන් ජෙනරාල් තනතුර දක්වා උසස් කරන ලදී. විශ්රාම යන විට ඔහුට ජනරාල් ධුරයේ උසස්වීමක් ලැබිණි.
යුද හමුදාවේ සේවයේ නිරතව සිටියදී යුද්ධය වෙනුවෙන් දැක්වූ සුවිශේෂී දායකත්වය හේතු කර ගෙන වීර වික්රම විභූෂණය, රණ වික්රම පදක්කම, රණ ශූර පදක්කම, උත්තම සේවා පදක්කම, දේශ පුත්ර පදක්කම ආදී සම්මාන රාශියකින් පිදුම් ලැබීමට ද ජනරාල් දයා රත්නායක සමත් විය.
