යුද්ධයෙන් මළවුන් සැමරීම නිසා අත්අඩංගුවට ගැනීමෙන් පසු අධිකරණය විසින් නිදොස් කොට

නිදහස් කළ නැගෙනහිර පළාතේ සිවිල් සමාජ ක්‍රියාධරයකු එම අනුස්මරණය සම්බන්ධයෙන්ම ත්‍රස්ත මර්දන හා විමර්ශන කොට්ඨාශයට කැඳවා පැය තුනක කාලයක් ප්‍රශ්න කර තිබේ.

අධිකරණය විසින් තමා නිදොස් කොට නිදහස් කර තිබියදීත් ඒ සම්බන්ධයෙන් ත්‍රස්ත මර්දන හා විමර්ශන කොට්ඨාශය ප්‍රශ්න කළ ආකාරය විමලසේනා ලවකුමාර් හැඳින්වුයේ අයිතිවාසිකම් ප්‍රතික්ෂේප කිරීමක් ලෙසයි.

 “මහවිරු දිනය කරන්න අවසර දුන්නේ කවුද? අවසර ගත්තේ කොහොමද? ඩයස්පෝරාවෙන් උදව් එනවාද ? ඩයස්පෝරාවේ ඔබට සම්බන්ධකම් ඇත්තේ කා සමඟද? ඔබ මහවිරු දින උත්සවයට ගියේ ඇයි, කියලා මගෙන් ඇහුවා. ඔවුන්ගේ සම්පූර්ණ විමර්ශනය කෙරුනේ අයිතිවාසිකම් ප්‍රතික්ෂේප කරන ආකාරයෙන්.”

 2023 ජනවාරි 26 වැනිදා උදෑසන නිවසට පැමිණි වාලච්චේන පොලීසිය ඔහුට දැනුම් දී ඇත්තේ 27 වැනිදා උදෑසන මඩකලපුව ත්‍රස්ත මර්දන හා විමර්ශන කොට්ඨාශය වෙත පැමිණෙන ලෙසයි.

 එදින උදෑසන 11 ට පමණ තමන් එම කොට්ඨාශයට ගිය අතර පස්වරු දෙක දක්වා තමන්ගෙන් ප්‍රශ්න කළ බව විමලසේනා ලවකුමාර් පළාත් බද මාධ්‍යවේදීන් සමග වැඩි දුරටත් පවසා තිබේ.


මඩකලපුව තරවෙයි මහවිරු සුසාන භුමියේ පැවැති අනුස්මරණයට සහභාගී වීම සම්බන්ධයෙන්ද ත්‍රස්ත මර්දන හා විමර්ශන කොට්ඨාශය එහි දී තමන්ගෙන් ප්‍රශ්න කළ බවයි විමලසේනා ලවකුමාර් පවසන්නේ.


“මුල්ලිවායිකාල්හි සැමරුම පවත්වපු නිසා අත්අඩංගුවට ගත් ඔබ මේ වගේ ක්‍රියාකාරකම් වල යෙදෙන්න හේතුව මොකක්ද කියලා මගෙන් ඇහුවා. මම කිව්වා මේක අපේ අයිතියක් කියලා. මිය ගිය දහස් ගණනක් අපේ ජනතාව සිහිපත් කිරීම අපේ යුතුකමක් බව මම කිව්වා. ඇයි කැඳ දෙන්නෙ? කැඳ දෙන්න හේතුව මොකක්ද කියලා ඇහුවා. මම ඒකට පැහැදිලි කිරීමක් කරා.”

 යුද්ධාවසානයේ මුහුදුබඩ පටු බිම් තීරුවක කොටුවී බර අවි ප්‍රහාරයට මැදිවී බෙහෙත්, ආහාර ඇතුළු මූලික මානුෂික අවශ්‍යතා අහිමිව සිටි දෙමළ ජනතාව ඒ අවසන් දින කීපය දිවි ගෙවා ගත්තේ සහල් හා ලුණු බිඳක් වතුරෙන් තම්බා පිසගත් කැඳ කෝප්පයෙනි.

 එම වේල ඉතිහාසගතවී ඇත්තේ මුල්ලිවයික්කාල් කැඳ නමිනි.

 

දොළොස්වැනි මුල්ලිවයික්කාල් සමරුව යෙදුනු 2021 මැයි 18 වැනිදා මඩකලපුවේ කිරාන් වෙරළ තීරයේ අනුස්මරණයක් පැවැත්වූ බවට චෝදනා කරමින් ඉඩමේ හිමිකරු වන විමලසේනා ලවකුමාර් ඇතුළු 10 දෙනෙකු පොලිසිය විසින් අත්අඩංගුවට ගෙන අධිකරණයට ඉදිරිපත් කර තිබුනි.


‍එම වසරේම දෙසැම්බර් 8 වැනිදා අධිකරණය විසින් විමලසේනා ලවකුමාර් ඇප මත නිදහස් කළ අතර ඔහු පවසන්නේ නිතීපති දෙපාර්තමේන්තුවේ උපදෙස් මත 2022 වසරේ මාර්තු මාසයේදී අධිකරණය විසින් එම චෝදනා වලින් තමන් නිදොස් කොට නිදහස් කළ බවයි.

 යු ටියුබ් නාලිකාවකට ලබා දුන් සම්මුඛ සාකච්ඡාවක දී රාජ්‍ය අමාත්‍යවරයකු සම්බන්ධයෙන් සිදු කළ ප්‍රකාශයකින් පසු 2023 වසරේ ඔක්තෝබර් මාසයේ දී විමලසේනා ලවකුමාර් රජයට සම්බන්ධ බවට සැකකෙරෙන කල්ලියක මරණිය තර්ජනයකට ද මුහුණ පා තිබුනි.

 මඩකලපුව මාධ්‍ය සමාජයේ දී ඔක්තෝබර් 3 වැනිදා මාධ්‍ය හමුවක් පවත්වමින් විමලසේනා ලවකුමාර් කිලිපොලායන සුළු ආකාරයෙන් විස්තර කළේ ඔක්තෝබර් 2 වැනිදා රාත්‍රි 11.33 ට මඩකලපුව කිරාන් ප්‍රදේශයේ පිහිටි සිය නිවසට යතුරුපැදිවලින් පැමිණි හය දෙනකුගෙන් යුත් කණ්ඩායමක් තමන්ට මරණීය තර්ජන සිදු කළ බවයි.

 "තීව්චෙනෙයි කියන්නේ හංගලා තියන දෙයක්. ඒක ගැන කතා කරන්න හරි ඒක හාරන්න හරි ඔහෙට ඕනේ නෑ. ඒක කරපු එක වැරදියි. අපි අද ආවේ ඔහෙව අස් කරලා දාන්න. හැබැයි ඉස්සෙල්ලාම අපි ඔහෙට අනතුරු අඟවනවා. ඔහෙලා වගේ උන් හින්දා තමයි අපේ ආයුද වල දුවිලි පිහදාලා ආපහු ගන්න වෙලා තියෙන්නේ. ආයේ සැරයක් මේ වගේ වැඩ කළොත් එහෙම,අනිවාර්යයෙන්ම මාව මරනවා, කියලා තර්ජනය කළා." 

 

worky

worky 3

Follow Us

Image
Image
Image
Image
Image
Image