ඉන්දියාව සහ ශ්‍රී ලංකාව අතර ආර්ථික සහ තාක්ෂණික සහයෝගිතා ගිවිසුම (ETCA) ගිවිසුම
කඩිනමින් අත්සන් කිරීමට නියමිත බව ජාතික නිදහස් පෙරමුණේ නායක, පාර්ලිමේන්තු මන්ත්‍රී විමල් වීරවංශ පවසයි.
මෙය දේශපාලන වශයෙන් පමණක් නොව ආර්ථිකමය වශයෙන් ඉන්දියාවේ ආධිපත්‍ය මෙරට තුළ පැතිරවීමේ පියවරක් බැවින් මෙය වහා පියවර ගත යුතු තීරණාත්මක අවස්ථාවක් බව හෙතම අවධාරණය කර සිටී.
මෙමගින් රැකියා සහ ශ්‍රම වෙළඳපොළට කිසිදු බාධාවකින් තොරව ඉන්දියානුවන්ට පැමිණ කටයුතු කිරීමේ අවකාශය සලසා දෙන බව මන්ත්‍රීවරයා චෝදනා කර සිටී.
මීට පෙර ද මෙම ගිවිසුම අත්සන් තැබීමට ගත් උත්සාහය වැළකූ නමුත් මෙම අවස්ථාවේ ඉන්දියාවේ ව්‍යාප්තවාදය ගැන ඉගැන්වූ අය පවා නිහඬව සිටීම බරපතළ ගැටලුවක් බව මන්ත්‍රීවරයා කියා සිටියේය.
ඒ පිළිබඳ වැඩිදුරටත් අදහස් දැක්වූ මන්ත්‍රීවරයා මෙසේ සඳහන් කළේය.
මේ අතර විදේශ කටයුතු අමාත්‍ය ජනාධිපති නීතිඥ අලි සබ්රි පවසන්නේ, රටවල් අතර නිදහස් වෙළෙඳ ගිවිසුම් ඇති කර ගනිමින් මෙරට ආර්ථිකය යළි නොවැටෙන තැනකට පත් කරලීම සඳහා ජනාධිපති රනිල් වික්‍රමසිංහ ගෙන යන වැඩපිළිවෙළ ශක්තිමත් කර ඉදිරියට ගෙන යා යුතු බවයි.
මෙම වසර අවසානය වන විට ඉන්දියාව, ඉන්දුනීසියාව, මැලේසියාව, වියට්නාමය හා චීනය සමඟ ද නිදහස් වෙළෙඳ ගිවිසුම් ඇති කරගැනීමට සැලසුම් කර ඇති බව ද අමාත්‍යවරයා සඳහන් කරයි.
විදේශ කටයුතු අමාත්‍ය ජනාධිපති නීතිඥ අලි සබ්රි මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් අද (06) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.
එහිදී වැඩිදුරටත් අදහස් දැක්වූ විදේශ කටයුතු අමාත්‍ය ජනාධිපති නීතිඥ අලි සබ්රි මෙසේ ද පැවසීය.
විදේශ කටයුතු අමාත්‍ය ජනාධිපති නීතිඥ අලි සබ්රි
'' ජනාධිපති රනිල් වික්‍රමසිංහ මහතාගේ ස්ථාවර ආර්ථිකයක් ඇති කිරීමේ දැක්මට අනුව තරගකාරී නව වෙළෙඳපොළවල් සමඟ ගිවිසුම් ඇති කරගනිමින් ශ්‍රී ලංකාවේ ආර්ථිකයට එය සෘජුව දායක කර ගැනීමට බලාපොරොත්තු වෙනවා.
එහි ඓතිහාසික පියවරක් ලෙස තායිලන්තය සමඟ නිදහස් වෙළෙඳ ගිවිසුමකට පසුගියදා ඇතුළත් වුණා. ශ්‍රී ලංකාව මේ වනවිට කෝටි විසි දෙකක වෙළෙඳපොළක් වෙනුවෙන් කටයුතු කර තිබෙන බව පෙනෙන්නට තිබෙනවා.
නමුත් ලෝකයේ විශාල වෙළෙඳපළවල් තිබෙනවා. දියුණු වූ ආර්ථිකයන් ඇති රටවල් එම විශාල වෙළඳපළවල් සමඟ ගනුදෙනු කරමින් තම ආර්ථිකය ශක්තිමත් කරගෙන තිබෙනවා. වියට්නාමය, බංග්ලාදේශය වැනි රටවල් අද වන විට ශක්තිමත් ආර්ථිකයක හිමිකම් කියන්නේ ලෝකයේ විශාල වෙළෙඳපළවල් සමඟ නිදහස් ආර්ථික ගිවිසුම් ඇතිකර ගනිමිනුයි. එමඟින් අපනයන ආර්ථිකය ශක්තිමත් කළ හැකියි.
1991 වසරේ දී ශ්‍රී ලංකාවේ අපනයන ආදායම අමෙරිකානු ඩොලර් බිලියන තුනක් පමණ වුණා. බංග්ලාදේශය සහ වියට්නාමයත් එම කාල වකවානුවේදී ඊට ආසන්න අගයක පැවතුණා. නමුත් 2022 වසර වන විට වියට්නාමයේ අපනයන ආදායම අමෙරිකානු ඩොලර් බිලියන 373ක් බවට පත් වී තිබෙනවා. මේ සියල්ලටම හේතුව ඔවුන් අපනයන ආර්ථිකය ශක්තිමත් කර ගැනීමයි.
ජනාධිපති රනිල් වික්‍රමසිංහ ආසියාවේ රටවල් සමඟ නිදහස් වෙළෙඳ ගිවිසුම් ඇති කරගනිමින් ශ්‍රී ලංකාවේ අපනයන ආර්ථිකය ශක්තිමත් කිරීමේ දිගුකාලීන වැඩපිළිවෙළක නිරතව සිටිනවා. එය සාර්ථක කර ගැනීමට හැකි වුණහොත් ශ්‍රී ලංකාවට නොවැටෙන ආර්ථිකයක් ඇතිකර ගත හැකියි.
පසුගියදා තායිලන්ත අගමැතිවරයා සමඟ පැමිණි දූත පිරිස ශ්‍රී ලංකාව සමඟ නිදහස් වෙළෙද ගිවිසුමට පමණක් නොව ආයෝජන අවස්ථාවන් රැසකට ද අත්සන් තබා තිබෙනවා. මෙහිදී එක් පැත්තකින් අපනයනය ශක්තිමත් වන අතරම ලංකාවේ ආයෝජන අවස්ථා ඉහළ යාම ද සිදු වෙනවා.
එම නිදහස් වෙළෙඳ ගිවිසුම නිසා ශ්‍රී ලංකාවට ධීවර, සංචාරක, කෘෂිකර්ම හා පුනර්ජනනීය බල ශක්ති පිළිබඳ ආයෝජනයන් විශාල සංඛ්‍යාවක් ලැබීමට නියමිතයි.
තායිලන්තය විසින් තාක්ෂණික සේවාවන් සැපයීමටද එකඟතාව පළ කර තිබෙනවා. මේ වසර අවසානය වන විට ඉන්දියාව, චීනය, තායිලන්තය, සිංගප්පූරුව, ඉන්දුනීසියාව, මැලේසියාව හා වියට්නාමය සමඟත් නිදහස් වෙළෙඳ ගිවිසුම් ඇති කර ගැනීමට බලාපොරොත්තු වෙනවා. එමඟින් ශ්‍රී ලංකාවේ ආර්ථිකය ස්ථාවර කර ගැනීමටත් සමෘද්ධිමත් ලංකාවක් ඇති කිරීමේ පළමු පියවර තැබීමටත් හැකියාව තිබෙනවා.
ලෝකයේ රටවල තිබෙන විශාල වෙළෙඳ පොළවල් සමඟ ගනුදෙනු සිදුකරමින් ශ්‍රී ලංකාවේ ආර්ථිකය ප්‍රසාරණය කිරීමට හැකියාව ද තිබෙනවා.''
විදේශ කටයුතු අමාත්‍යාංශයේ ලේකම් අරුණි විජේවර්ධන ඇතුළු අමාත්‍යාංශයේ නිළධාරීන් පිරිසක් මෙම අවස්ථාවට එක්ව සිටියහ.
