හිටපු අමාත්ය රොනී ද මැල්ගේ අවමගුලට පැමිණි අගමැතිවරයා රැගත් ගුවන් යානය මාතර කොටුව ක්රිඩාංගනයට ගොඩ බැස්සවීමට යාමේදී සිදු වු
දෝෂයක් හේතුවෙන් මාතර තානායමේ වහලට හා එහි ආහාර පාන වලට දැඩි අලාභ හානි සිදුවි තිබේ.
එම අවස්ථාවේ දී මුහුද දෙසින් පැමිණි දැඩි සුලං ප්රවාහය හේතුවෙන් එම තත්වය ඇති වු බවට ගුවන් නියමුවන් ඇතුළු කාර්ය මණ්ඩලය ප්රකාශ කල බව මාතර තානායමේ කළමණාකරු පැවසීය.
කෙසේ වෙතත් එම සිදුවීම සිදු වන විට ආහාර පාන ලබා ගනිමින් සිටි ප්රභූ ආරක්ෂක නිලධාරීන්, දේශීය හා විදේශීය සංචාරකයින්ගේ පිඟන්වලට ද වැලි, දූවිලි හා කුණු රොඩු වැටී තිබු අතර එම නිසා ඔවුන් දැඩි දුෂ්කරතාවයට පත්ව තිබුණි.
අවන්හලේ වහලයට ද මෙම සිදුවිමෙන් හානි වී තිබේ.
අපහසුතාවයට පත්වු විදේශිකයින් ඇතුළු පිරිසට ඇණවුම් කල කෑම වෙනුවට ක්ෂණිකව කෑම පිළියෙල කර නැවත පිළිගැන්වීමට මාතර තානායමේ කලමණාකාරීත්වය කටයුතු කර ඇත.
කෙසේ වෙතත් අග්රාමාත්ය දිනේෂ් ගුණවර්ධන ගුවන් යානයේ සිට ආරක්ෂාකාරීව ගොඩ බැස්සවීමෙන් පසු අවමංගල්ය උත්සවය වෙත කැදවා ගෙන එන ලදි.
මෙම සිද්ධියෙන් මාතර තානායමට සිදුව ඇති හානිය පිළිබඳව සොයා බැලීමට මාතර මූලස්ථාන පොලිස් පරීක්ෂක රොෂාන් හෙට්ටිආරච්චී ඇතුළු නිලධාරීන් කණ්ඩායමක් ද පැමිණ තිබුණි.