මෙරට තරුණ තරුණියන් අපේක්ෂා කරන ශ්රී ලංකාව නිර්මාණය කළ හැකි බවට දැඩි විශ්වාසයක් තමා තුළ පවතින බව ජනාධිපති රනිල් වික්රමසිංහ පවසයි.
නුවරඑළිය දිස්ත්රික්කයේ යොවුන් පාර්ලිමේන්තු මන්ත්රීවරුන් සහ තරුණ දේශපාලන නියෝජිතයන් සමඟ ඊයේ (18) නුවරඑළිය ජනාධිපති මන්දිරයේ පැවති හමුවක දී ජනාධිපති රනිල් වික්රමසිංහ මේ බව සඳහන් කළේය.
බොහෝ දෙනා අසීරු බව පැවසූ බිඳ වැටුණු ශ්රී ලංකා ආර්ථිකය යළි ගොඩනැඟීමේ අභියෝගය භාරගත් තමා වසර දෙකක් තුළදි රටේ ආර්ථිකය ස්ථාවර මට්ටමකට ගෙන ආ බව පෙන්වා දුන් ජනාධිපතිවරයා, රට ඉදිරියට ගෙන යාමට අවශ්යව ඇත්තේ සාමුහිකත්වය පමණක් බවද කියා සිටියේය.
නුවරඑළිය දිස්ත්රික්කය ඉහළ සංචාරක ආකර්ශනයක් දිනාගත් ප්රදේශයක් ලෙස සංවර්ධනය කිරීමට රජය ගෙන යන වැඩපිළිවෙළට අද ඇතැමුන් අකුල් හෙළමින් සිටින බව මෙහිදී ජනාධිපතිවරයා සඳහන් කළේය.
පැරණි දේශපාලනයේ නිරතව රට සංවර්ධනය කළ නොහැකි බවත්, රටට අවශ්ය ආයෝජන ආකර්ශනය කර ගනිමින් රට සංවර්ධනය කිරීමට නම් සියලුදෙනා එකඟතාවයකින් කටයුතු කළයුතු බවත් ජනාධිපතිවරයා එහිදී අවධාරණය කර සිටියේය.
තරුණ ප්රජාව සවිබල ගැන්වීම වෙනුවෙන් සෑම ප්රාදේශීය ලේකම් කොට්ඨාසයකම ප්රාදේශීය තරුණ කේන්ද්ර පිහිටුවීමට සැළසුම් කර ඇති බව සඳහන් කළ ජනාධිපතිවරයා, එම ප්රාදේශීය තරුණ කේන්ද්ර හරහා තරුණ ව්යවසායකයන් නගාසිටුවීමට කටයුතු කරන බවත්, බැංකු ශාඛාවල ප්රධාන නිලධාරීන් සහ වාණිජ මණ්ඩල සාමාජිකයන් ද ඊට සම්බන්ධ කර ගැනීමට සැලසුම් කර ඇති බවත් වැඩි දුරටත් කියා සිටියේය.
හිටපු පාර්ලිමේන්තු මන්ත්රී කේ.කේ. පියදාස සහ නුවරඑළිය මහා නගර සභාවේ හිටපු නගරාධිපති චන්දන ලාල් කරුණාරත්න ඇතුළු හිටපු නාගරික මන්ත්රීවරු සහ ප්රාදේශීය තරුණ දේශපාලනඥයන් පිරිසක් මෙම අවස්ථාවට එක්ව සිටියහ.