පාස්කු මහ නඩුවේ වරදකරුවන් වූ සිව්දෙනෙකු ඇතුළු විත්තිකරුවන් හයදෙනාගේ නඩුව දිනපතා විභාග කිරීමට ත්රිපුද්ගල විනිසුරු මඩුල්ලෙන් නියෝග
පුත්තලම වනාතවිල්ලුව ලැස්ටෝස් වත්තේ නීතිවිරෝධී ලෙස පුපුරන ද්රව්ය හා ගිනි අවි සඟවා තැබීමේ සිද්ධියට අදාළ නඩුව ලබන ඔක්තෝබර් 05 වැනිදා සිට දිනපතා විභාග කිරීමට කොළඹ මහාධිකරණ ත්රිපුද්ගල විනිසුරු මඩුල්ල නියෝග කළේය.
ලාල් රණසිංහ බණ්ඩාර, රශ්මි සිංගප්පුලි සහ නයෝමි වික්රමසේකර යන මහාධිකරණ විනිසුරු මඩුල්ල හමුවේ මෙම නඩුව කැඳවනු ලැබීය.
ලිපිගොනු අස්ථානගතවීම ගැන බන්ධනාගාරයට නියෝගයක්
මෙම නඩුවට අදාළ ලේඛන තමන් වෙත මෙතෙක් ලැබී නොමැති බව එහි 4 වන සහ 6 වන විත්තිකරුවන් අධිකරණය හමුවේ ප්රකාශ කළහ.
ඉකුත් සැප්තැම්බර් 22 වැනිදා පාස්කු ඉරිදා ත්රස්ත ප්රහාර මහ නඩුවේ තීන්දුව ප්රකාශයට පත්කෙරුණු අතර, එහිදී ඔවුන් වරදකරුවන් වීම හේතුවෙන් කොළඹ රිමාන්ඩ් බන්ධනාගාරයේ සිට වැලිකඩ බන්ධනාගාරය වෙත මාරු කර යැවීම ඊට හේතුව ලෙස දැක්විණි.
බන්ධනාගාර මාරුවත් සමඟ සිය නඩු ලිපිගොනු රැගෙන ඒමට නොහැකි වූ බව විත්තිකරුවෝ සඳහන් කළහ.
ඉදිරිපත් වූ කරුණු සලකා බැලූ ත්රිපුද්ගල විනිසුරු මඩුල්ල, අදාළ ලිපිගොනු හෙට (29) දිනය තුළ විත්තිකරුවන් දෙදෙනා වෙත කඩිනමින් ලබාදීමට පියවර ගන්නා ලෙස බන්ධනාගාර අධිකාරියට නියෝග කළේය.
නීතිපතිවරයාගෙන් අධිචෝදනා 14ක්
පාස්කු ප්රහාරයේ මහ මොළකරු ලෙස සැලකෙන සහරාන් හෂිම් ඇතුළු පිරිසක් සමඟ එක්ව පුපුරන ද්රව්ය තොගයක් සන්තකයේ තබාගැනීම සම්බන්ධයෙන් නීතිපතිවරයා විසින් විත්තිකරුවන් හයදෙනෙකුට එරෙහිව අධිචෝදනා 14ක් ගොනු කර ඇත.
අධිචෝදනා ලැබ සිටින විත්තිකරුවන් මෙසේය:
1- අබු හනීෆා මොහොමඩ් මුසිෆ් (හෙවත් අබු දහිදා)
2- අමීර් හම්සා මොහොමඩ් හමාස්
3- මොහොමඩ් ෂරීෆු ආදම් ලෙබ්බේ
4- මොහොමඩ් ඊබ්රාහිම් සාදික් අබ්දුල්ලා
5- මොහොමදු ඊබ්රාහිම් මොහොමදු නවුෆර්
6- මොහොමඩ් රමීෂ් මොහොමඩ් සාජිද්
මොවුන් අතරින් විත්තිකරුවන් සිව්දෙනෙකුම ප්රධාන පාස්කු ප්රහාර නඩුවේද විත්තිකරුවන් ලෙස නම් කර තිබූ අය වෙති.
වනාතවිල්ලුවෙන් හමුවූ පුපුරන ද්රව්ය තොගය
පාස්කු ඉරිදා ත්රස්ත ප්රහාර මාලාවට පෙර, අපරාධ පරීක්ෂණ දෙපාර්තමේන්තුව (CID) විසින් පුත්තලම වනාතවිල්ලුව ලැස්ටෝස් වත්තේ සිදුකළ විශේෂ සෝදිසියකදී මෙම පුපුරන ද්රව්ය තොගය සොයාගන්නා ලදී.
එහිදී සොයාගත් ද්රව්ය අතරට පහත දෑ ඇතුළත් විය:
* පුපුරන ද්රව්ය නිෂ්පාදනයට යොදාගන්නා නයිට්රේට් තොගයක්
* නයිට්රික් ඇසිඩ් සහ යූරියා තොගයක්
* ගිනි අවියක් සහ ජීව උණ්ඩ 12ක්
අදාළ නඩුව හෙට (29) යළි කැඳවීමට නියමිත අතර, ඉන් අනතුරුව ලබන ඔක්තෝබර් 05 වැනිදා සිට දිනපතා සාක්ෂි විභාගය පැවැත්වීමට අධිකරණය තීරණය කර ඇත.
