කොළඹ වරායේ රුපියල් බිලියන ගණනක අයිස් මත්ද්‍රව්‍ය බහාලුම් සිද්ධියේදී රාජකාරිය පැහැර හැරියේදැයි සොයා බැලීමට අපරාධ පරීක්ෂණ දෙපාර්තමේන්තුව ජ්‍යෙෂ්ඨ නියෝජ්‍ය පොලිස්පතිවරයාගෙන් ප්‍රශ්න කරයි.
කොළඹ වරායේදී සොයාගත් මහා පරිමාණ මත්ද්‍රව්‍ය බහාලුම් සිද්ධිය සම්බන්ධයෙන් තොරතුරු ලැබීමේදී සහ පියවර ගැනීමේදී ජ්‍යෙෂ්ඨ නියෝජ්‍ය පොලිස්පති (SDIG) රන්මල් කොඩිතුවක්කු ඇතුළු නිලධාරීන් රාජකාරිය පැහැර හැර ඇති බවට පොලිස් අභ්‍යන්තර පරීක්ෂණයකින් අනාවරණය වී තිබේ.
පොලිස් විශේෂ විමර්ශන ඒකකය (SIU) කළ විමර්ශන වාර්තාව පදනම් කරගනිමින්, පොලිස්පතිවරයාගේ නියෝග මත මේ පිළිබඳව පුළුල් අපරාධ පරීක්ෂණයක් ආරම්භ කර ඇති බව පොලිස් මාධ්‍ය කොට්ඨාසය නිවේදනය කළේය.
බහාලුම් තොරතුර සහ විමර්ශන කාලරාමුව
විශේෂ විමර්ශන ඒකකය අනාවරණය කරගෙන ඇති පරිදි, නීතිවිරෝධී මත්ද්‍රව්‍ය අඩංගු බහාලුම් දෙකක් කොළඹ වරායට පැමිණ ඇති බවට මුල්ම තොරතුර SDIG රන්මල් කොඩිතුවක්කු වෙත ලැබී ඇත්තේ පසුගිය අගෝස්තු 14 වැනිදාය.
එදිනම එම තොරතුර පොලිස් මත්ද්‍රව්‍ය නාශක කාර්යාංශය (PNB) වෙත දන්වා තිබුණද, ඉන් අනතුරුව නිසි මෙහෙයුම් ක්‍රියාමාර්ග අනුගමනය කිරීමේදී නොසැලකිලිමත් භාවයක් පෙන්නුම් කර ඇති බව විමර්ශන වාර්තාවේ සඳහන් වේ.
අනතුරුව අගෝස්තු 22 වන දින මධ්‍යම අපරාධ විමර්ශන කාර්යාංශයේ උප පොලිස් පරීක්ෂක ඒකනායක ට ද සිය ඔත්තුකරුවකු මගින් මෙම තොරතුර ලැබී ඇත.
ඒ අනුව ක්‍රියාත්මක වූ මධ්‍යම අපරාධ විමර්ශන කාර්යාංශයේ නිලධාරීන් රේගු නිලධාරීන් සමග එක්ව අගෝස්තු 31 වන දින බහාලුම පරීක්ෂා කර අදාළ මත්ද්‍රව්‍ය තොගය සොයාගැනීමට කටයුතු කර තිබේ.
CID පරීක්ෂණය සහ ස්ථාන මාරුවීම්
මෙම තොරතුර සම්බන්ධයෙන් මුලින්ම දැනුවත්ව සිටියදී නිසි පියවර නොගැනීම කිසියම් පාර්ශ්වයකට වාසි සහගත තත්ත්වයක් ඇති කිරීමේ අරමුණින් සිදුවූවක්ද යන්න තහවුරු කරගැනීමට පොලිස්පතිවරයා විසින් අපරාධ පරීක්ෂණ දෙපාර්තමේන්තුවට (CID) නියෝග කර ඇත.
අදාළ සිදුවීමට සම්බන්ධයෙන් රන්මල් කොඩිතුවක්කු ගෙන් අපරාධ පරීක්ෂණ දෙපාර්තමේන්තුව පසුගියදා පැය කිහිපයක ප්‍රකාශයක් සටහන් කරගත්තේය.
සිද්ධියට අදාළව සාපරාධී වරදක් සිදුව ඇත්දැයි නීතිපති උපදෙස් ලබාගැනීමට නියමිත බව පොලිස් මූලස්ථානය සඳහන් කරයි.
මේ අතර, රන්මල් කොඩිතුවක්කු ඌව පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස මාරු කිරීමට ද නිර්දේශ ඉදිරිපත්ව තිබේ.
ජාත්‍යන්තර ජාල සහ මෙහෙයුම් පසුබිම
කොළඹ වරායෙන් අත්අඩංගුවට ගත් ‘අයිස්’ (Methamphetamine) මත්ද්‍රව්‍ය තොගයේ වටිනාකම රුපියල් බිලියන 8 ඉක්මවන බවට (ඇමරිකානු ඩොලර් මිලියන 27කට ආසන්න) තක්සේරු කර තිබේ.
පාකිස්තානය ඇතුළු කලාපීය මුහුදු මාර්ග හරහා ශ්‍රී ලංකාව මත්ද්‍රව්‍ය ප්‍රතිනැව්ගත කිරීමේ (transshipment) මධ්‍යස්ථානයක් ලෙස භාවිත වන බවට එක්සත් ජාතීන්ගේ මත්ද්‍රව්‍ය සහ අපරාධ පිළිබඳ කාර්යාලය (UNODC) දීර්ඝ කාලයක සිට පෙන්වා දී ඇත.
විශාල ජාවාරම් අනාවරණය වන අවස්ථාවන්හිදී මෙහෙයුම් දාමයේ කාර්යක්ෂමතාව සහ අභ්‍යන්තර විනය තහවුරු කිරීම ශ්‍රී ලංකාවේ නීතිය බලාත්මක කිරීමේ විශ්වසනීයත්වයට සෘජුව බලපාන ප්‍රධාන සාධකයක් ලෙස ආරක්ෂක විශ්ලේෂකයෝ පෙන්වා දෙති.
සබැඳි පුවත් :
ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු සී.අයි.ඩී.යට
