දිවයිනේ සියලුම ප්‍රාදේශීය ලේකම් කොට්ඨාස නියෝජනය වන පරිදි ඩිජිටල් මාධ්‍ය කුසලතා වර්ධනය කිරීමේ ජාතික වැඩසටහනක් ඇරඹෙයි.
රජයේ ප්‍රවෘත්ති දෙපාර්තමේන්තුව සහ ජාතික තරුණ සේවා සභාව එක්ව දිවයින පුරා විසිරී සිටින තරුණ තරුණියන් 357 දෙනෙකු සම්බන්ධ කරගනිමින් නව්‍ය ඩිජිටල් මාධ්‍ය වැඩසටහනක් ආරම්භ කර තිබේ.
මෙම ව්‍යාපෘතියේ මූලික අරමුණ වී ඇත්තේ ප්‍රාදේශීය මට්ටමේ සංවර්ධන සහ සමාජයීය තොරතුරු නවීන සන්නිවේදන තාක්ෂණය ඔස්සේ ජනගත කළ හැකි ප්‍රාදේශීය මාධ්‍යවේදීන් පිරිසක් බිහිකිරීමයි.
බහුභාෂා නියෝජනය සහ තේරී පත්වීම
දිවයිනේ සෑම ප්‍රාදේශීය ලේකම් කොට්ඨාසයක්ම ආවරණය වන පරිදි ක්‍රියාත්මක මෙම වැඩසටහනේ විශේෂත්වය වන්නේ සියලු ප්‍රජාවන් නියෝජනය වීමයි.
* සෑම ප්‍රාදේශීය ලේකම් කොට්ඨාසයකින්ම තරුණ නියෝජිතයන් තෝරා ගැනීම.
* සිංහල සහ දෙමළ භාෂා ද්විත්වයම භාවිත වන ප්‍රදේශවලින් භාෂා දෙකම නියෝජනය වන සේ සාමාජිකයන් දෙදෙනෙකු බැගින් එක් කරගැනීම.
* ජාතික තරුණ සේවා සභාව හරහා විනිවිදභාවයකින් යුතුව තේරීම් සිදුකිරීම.
බිම් මට්ටමේ තොරතුරු ඩිජිටල් අවකාශයට
මෙම වැඩසටහනේ පළමු ප්‍රායෝගික පියවර ලෙස රජයේ නිවාස සංවර්ධන වැඩසටහන යටතේ ඉදිකෙරුණු නිවාස ආශ්‍රිත මානව කතාන්දර කෙටි වීඩියෝ (Reels) නිර්මාණය කිරීම මොවුන්ට පවරා ඇත.
ඔක්තෝබර් 05 වැනිදා ජනතා අයිතියට පත්වීමට නියමිත නිවාස ව්‍යාපෘති පාදක කරගනිමින්, මේ වන විටත් දිවයින පුරා විවිධ ප්‍රදේශවලින් වීඩියෝ නිර්මාණ 300කට ආසන්න ප්‍රමාණයක් ලැබෙමින් පවතින බව වාර්තා වේ.
මන්නාරම ඇතුළු දුරස්ථ දිස්ත්‍රික්කවල පිහිටි ගම්මානවල ජනතා අත්දැකීම් ද මේ යටතේ මේ වන විටත් සමාජ මාධ්‍ය අවකාශය ඔස්සේ මුදාහැර තිබේ.
තිරසාර මාධ්‍ය සංස්කෘතියක් සඳහා පියවරක්
සාම්ප්‍රදායික පුවත් වාර්තාකරණයෙන් ඔබ්බට ගොස් ස්මාර්ට් ජංගම දුරකථන සහ සමාජ මාධ්‍ය හරහා සත්‍ය තොරතුරු වාර්තා කිරීමේ හැකියාව ප්‍රාදේශීය තරුණ පරපුරට ලබාදීම මෙහි ප්‍රධාන ඉලක්කයකි.
මෙය හුදෙක් වීඩියෝ නිර්මාණකරණයකට සීමා නොවී, අනාගතයේදී වගකීම් සහගත සහ වෘත්තීය මට්ටමේ ප්‍රාදේශීය මාධ්‍යවේදීන් බිහිකිරීමේ නියමු ව්‍යාපෘතියක් ලෙස ක්‍රියාත්මක වේ.
රටේ තොරතුරු සන්නිවේදන ක්‍රියාවලිය විමධ්‍යගත කරමින් බිම් මට්ටමේ හඬ ජාතික තලයට ගෙන ඒමට මෙමඟින් අවස්ථාව සැලසෙනු ඇත.
