ක්‍රිෂ් ගනුදෙනුවේ ජානකී යළි රිමාන්ඩ්: නාමල්ටත් අධිකරණ නියෝගයක්

කොළඹ කොටුව ක්‍රිෂ් සමාගම් ගනුදෙනුව සම්බන්ධයෙන් අල්ලස් කොමිසම සිදුකරන විමර්ශනයට අදාළව, එහි හිටපු අධ්‍යක්ෂවරියක වන ජානකී සිරිවර්ධන ලබන 20 වැනිදා දක්වා තවදුරටත් රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම අද (06) නියෝග කළේය.

මෙම නඩුවේ සැකකරුවකු වන පාර්ලිමේන්තු මන්ත්‍රී නාමල් රාජපක්ෂට මීට පෙර ඇප නියම වී තිබුණ ද, වෙනත් චෝදනාවක් මත බන්ධනාගාරගතව සිටින බැවින් බන්ධනාගාර නිලධාරීන් විසින් ඔහුද අද දින අධිකරණයට ඉදිරිපත් කරනු ලැබීය.

ලබන 20 වැනිදා වන විටත් නාමල් රාජපක්ෂ බන්ධනාගාරයේ පසුවන්නේ නම් එදිනට අධිකරණයට ඉදිරිපත් කරන ලෙස ප්‍රධාන මහේස්ත්‍රාත්වරයා බන්ධනාගාර අධිකාරිවරයාට නියම කළේය.

අත්අකුරු පරීක්ෂාව සහ මහාධිකරණයේ ලේඛනය

විමර්ශන ප්‍රගතිය දැක්වූ අල්ලස් කොමිසමේ සහකාර අධ්‍යක්ෂ (නීති) තනුජා බණ්ඩාර සඳහන් කළේ, කොළඹ ප්‍රාදේශීය ලේකම්වරයා සහ හිටපු ඉඩම් කොමසාරිස්වරයා ඇතුළු පිරිසකගෙන් මේ වන විට ප්‍රකාශ සටහන් කරගෙන ඇති බවයි.

නඩුවට අදාළ ලිපියක අත්අකුරු තහවුරු කරගැනීමට රජයේ රස පරීක්ෂකවරයා වෙත යොමු කළද, ඒ සඳහා එහි මුල් පිටපත (Original) අවශ්‍ය බව දන්වා ඇතැයි නිලධාරිනිය ප්‍රකාශ කළාය.

"එවිට රස පරීක්ෂක වෙත යොමු කළේ මොකක්ද?" යනුවෙන් මහේස්ත්‍රාත්වරයා විමසූ අවස්ථාවේදී, කොමිසම පැවසුවේ අදාළ ලේඛනයේ ඡායා පිටපතක් යොමු කරමින් පරීක්ෂාව කළ හැකිදැයි විමසූ බවයි.

එම මුල් ලේඛනය මේ වන විට කොළඹ මහාධිකරණයේ අංක 07 ශාලාවේ විභාග වන නඩුවක ගොනු කර ඇති බැවින්, දිනක් ඇතුළත පරීක්ෂා කර නැවත ලබාදීමේ කොන්දේසිය මත එය මුදාහැරීමට නියෝගයක් නිකුත් කරන ලෙස අල්ලස් කොමිසම ඉල්ලා සිටියේය.

ඇප ලැබුණ ද නාමල් බන්ධනාගාරයේ රැඳී සිටින්නේ ඇයි?

ක්‍රිෂ් ගනුදෙනුවට අදාළව නාමල් රාජපක්ෂ ට ඉකුත් 03 වැනිදා ඇප නියම විය. එහෙත් ඔහු දිගටම රක්ෂිත බන්ධනාගාරයේ පසුවන්නේ ශ්‍රීලන්කන් ගුවන් සමාගමේ එයාර්බස් යානා මිලදී ගැනීමේ ගනුදෙනුවට අදාළ වෙනත් නඩුවක් හේතුවෙනි.

රුපියල් මිලියන 100 ක අල්ලසක් ලබාගැනීම ඇතුළු චෝදනා 24 කට අදාළ එම නඩුව නිසා, ඔහු ලබන 19 වැනිදා දක්වා රක්ෂිත බන්ධනාගාරයේ තැබීමට කොළඹ ස්ථිර ත්‍රිපුද්ගල මහාධිකරණය ඉකුත් 28 වැනිදා නියෝග කර තිබිණි. ඒ අනුව අද දිනද ඔහු අධිකරණයට රැගෙන එනු ලැබුවේ බන්ධනාගාර ආරක්ෂාව යටතේය.