ශ්‍රී ලංකාවේ බන්ධනාගාර තුල කෝවිඩ් 19 වසංගතය තවදුරටත් පැතිර යාම වලක්වාලීම සඳහා වහාම මැදිහත්වන ලෙස ජාත්‍යන්තර රතුකුරුස සංවිධානයට (ICRC) ඉල්ලීමක් ඉදිරිපත් වී තිබේ.
එහිදී විශේෂයෙන්ම අඟුණකොළපැලැස්ස බන්ධනාගාරයට ගොස් රැඳවියන්ගේ බිය දුරු කරලීමට පියවර ගන්නා ලෙස සිරකරුවන්ගේ අයිතිවාසිකම් වෙනුවෙන් පෙනී සිටින දිවයිනේ ප්‍රමුඛතම සංවිධානය යෝජනා කරයි.
වසංගතය බෝවීම වැලක්වීමට පියවර ගන්නා ලෙස ඉල්ලමින් රැඳවියන් කරන උද්ඝෝෂණයකට බලධාරීන් දිගින් දිගටම මර්දනකාරී ලෙස මුහුණ දීම නිසා අඟුණකොළපැලැස්ස බන්ධනාගාරයේ ව්‍යසනකාරී තත්වයක් ඇතිවිය හැකි බවට සිරකරුවන්ගේ අයිතිවාසිකම් සඳහා වන කමිටුව (CPRP) මීට ඉහතදී අනතුරු ඇඟවීම් ද කර තිබුණි.
සිරගෙවල පවතින මහත් තදබදය හේතුකොටගෙන සමාජ දුරස්ථ භාවය රැකීම අසීරු බව පෙන්වා දෙන CPRP කමිටුව, සනීපාරක්ෂක පහසුකම්, පෝෂ්‍යදායී ආහාර සහ සෞඛ්‍ය සත්කාර ප්‍රමාණවත් ලෙස නැතිකමින් රැඳවියන් තව තවත් අසරණ බවේ හෙලා ඇති බව මැයි 10 දා ලියන ලද ලිපියකින් ජාත්‍යන්තර රතුකුරුස සංවිධානයේ ශ්‍රී ලංකාවේ නියෝජිතවරියට පෙන්වා දී තිබේ.
ඒ නිසා රටේ සියලු බන්ධනාගාර සෝදිසි කර බලා සුදුසු නිර්දේශ ඉදිරිපත් කොට ඒ සම්බන්ධයෙන් ගන්නා ලද පියවර ඥාතීන්ට දැනුම් දෙන ලෙසද CPRP පවසයි.
“ICRC සංවිධානයට හැකි පමණින් බන්ධනාගාර තුල කෝවිඩ් 19 ව්‍යාප්ත වීම වලක්වා සිරකරුවන්ගේ බිය තුරන් කිරීම පිණිස සිරකරුවන් සහ බන්ධනාගාර නිලධාරීන් එන්නත්කරණය පමණක් නොව ඒ ඇතුළුව, ප්‍රමාණවත් ලෙස පුද්ගල ආරක්ෂණ මෙවලම්, අත් සඳහා විෂබීජ නාශක, සෞඛ්‍ය පහසුකම්, සන්නිවේදන පහසුකම් සැපයීම සහ වෙනත් පියවර ක්‍රියාවේ යොදවන,” ලෙස CPRP සභාපති නීතිඥ සේනක පෙරේරා විසින් ලියන ලද ලිපියෙන් යෝජනා කෙරේ.
තම ඉල්ලීම් සම්බන්ධයෙන් වැඩිදුර කරුණු දැක්වීම සඳහා හමුවීමට අවස්ථාවක් සලසා දෙන ලෙසද සිරකරුවන්ගේ අයිතිවාසිකම් සඳහා වන කමිටුව, ජාත්‍යන්තර රතුකුරුස සංවිධානයේ ශ්‍රී ලංකා නියෝජිතවරියගෙන් ඉල්ලා තිබේ.
###############
ලංකාවත් ඉන්දියාවේ තත්වයට පත් වුණොත් මොකද කරන්නෙ?
එන්නත් විදීම බරපතල අවුලක - බලවතුන් 100ක් හිරගෙට යයි
