මණ්ඩලේ කචල් : 'යුගදනවි ගිවිසුම වෙනස් කරන්න සූදානම්' !

 

ශ්‍රී ලංකා කොමියුනිස්ට් පක්ෂයේ වැඩබලන සභාපති පාර්ලිමේන්තු මන්ත්‍රී වීරසුමන වීරසිංහ 'නෙත් නිවුස්' වෙත මේ බව ප්‍රකාශ කළේ ජනාධිපතිවරයා සහ අගමැතිවරයා සමඟ ඊයේ (28) රාත්‍රියේ පැවති විශේෂ සාකච්ඡාව පිළිබද අදහස් දක්වමිනි. 

 

 

 

 

 

 

කෙරවලපිටිය යුගදනවි බලාගාරයේ කොටස් ඇමෙරිකානු සමාගමකට පැවරීමට ගෙන ඇති තීරණය සම්බන්ධයෙන් සාකච්ඡාව කිරීම සඳහා ජනාධිපති ගෝඨාභය රාජපක්ෂ ගේ ප්‍රධානත්වයෙන් අරලියගහ මන්දිරයේදී ඊයේ (28) රාත්‍රී පැවැති ආණ්ඩුවේ පක්ෂ නායක හමුව දැඩි උණුසුම්කාරී ස්වභාවයක් ගත් බව රජයේ ආරංචි මාර්ග සඳහන් කරයි.

 

මෙම සාකච්ඡාව ඊයේ පස්වරු 5.30ට පමණ ආරම්භ වී රාත්‍රී 10 පමණ වන තෙක් පැය හතර හමාරක් තිස්සේ පැවති නමුත්, අවසන් එකඟතාවකට පැමිණීමට නොහැකි වූ බව ද එම ආරංචිමාර්ග වලින් පැවසේ .

 

ආණ්ඩුවේ හවුල්කාර පක්ෂ වෙනුවෙන් ඇමතිවරුන් වන විමල් වීරවංශ , උදය ගම්මන්පිල, වාසුදේව නානයක්කාර, දයාසිරි ජයසේකර, පාර්ලිමේන්තු මන්ත්‍රීවරුන් වන මහාචාර්ය තිස්ස විතාරණ, ඒ එල් එම් අතාවුල්ලා, වීරසුමන වීරසිංහ, ටිරාන් අලස්, ගෙවිදු කුමාරතුංග, අසංක නවරත්න යන මහත්වරු ද, අතුරලියේ රතන හිමියෝ ද මෙම සාකච්ඡාවට සහභාගි වී සිටියහ .

 

ශ්‍රී ලංකා පොදුජන පෙරමුණ වෙනුවෙන් අගමැති මහින්ද රාජපක්ෂ, ඇමැතිවරුන් වන බැසිල් රාජපක්ෂ, දිනේෂ් ගුණවර්ධන, බන්දුල ගුණවර්ධන, ප්‍රසන්න රණතුංග, කෙහෙළිය රඹුක්වැල්ල, මහින්දානන්ද අලුත්ගමගේ, රෝහිත අබේගුණවර්ධන, නාමල් රාජපක්ෂ, ජොන්ස්ටන් ප්‍රනාන්දු, ගාමිණී ලොකුගේ සහ පොහොට්ටු පක්ෂයේ ලේකම් පාර්ලිමේන්තු මන්ත්‍රී සාගර කාරියවසම් යන මහත්වරු ද මෙම රැස්වීමට එක්ව සිටියේය. 

 

එසේම, ලංකා වතු කම්කරු සංගමය (CWC) නියෝජනය කරමින් සෙන්දිල් තොන්ඩමන් ද මෙම රැස්වීමට සහභාගී වී තිබිණ. 

 

 

 

 

 

මේ අතර යුගදනවි බලාගාරයේ කොටස් පැවරීමට ගෙන ඇති තීරණය සම්බන්ධයෙන් අදහස් හා යෝජනා තිබේනම්, ලිඛිතව ඉදිරිපත් කරන ලෙස මුදල් ඇමති බැසිල් රාජපක්ෂ හවුල් පක්ෂ වල නායකයන්ට දැනුම් දුන් බවද වාර්තා වේ.

 

යුගදනවි බලාගාරය සම්බන්ධ ගිවිසුම පිළිබඳ යෝජනා තමාට ඉදිරිපත් කරන ලෙස මුදල් අමාත්‍යවරයා මෙහිදි දැනුම්දුන් බව සාකච්ඡාවෙන් අනතුරුව මාධ්‍ය වෙත අදහස් දක්වමින් ශ්‍රී ලංකා නිදහස් පක්ෂ මහා ලේකම් රාජ්‍ය අමාත්‍ය දයාසිරි ජයසේකර සඳහන් කළේය.

 

"කරුණු 12ක් විතර සාකච්ඡා කළා. විවිධ කාරණා ගැන. ඒ කියන්නේ කොවිඩ් සම්බන්ධව, පොහොර සම්බන්ධව, යුගදනවි සම්බන්ධව ඊට අමතරව වරායේ ඇතිවෙලා තියෙන ගැටලු සම්බන්ධව මේ හැම එකක් ගැනම ඉතාම දැඩි සාකච්ඡාවක් සිද්ධවුණා. 

 

 

 

ඒ සම්බන්ධව පක්ෂවල අදහස් එවන්න කියන අදහස එතුමා කිව්වා. අපි බලාපොරොත්තු වෙනවා අනාගතයේ අපේ තියෙන අඩුපාඩු දුර්වලතා පිළිබඳව අපේ වෘත්තීය සමිති කල්පනා කරන ප්‍රශ්න පිළිබඳව එතුමාට අපි යෝජනාවලියක් විදියට එතුමාට භාරදෙනවා."

 

 

 

 

ශ්‍රී ලංකා පොදුජන පෙරමුණේ ලේකම් පාර්ලිමේන්තු මන්ත්‍රී නිතීඥ සාගර කාරියවසම් ප්‍රකාශ කළේ, රජයේ ඇතැම් හවුල්කාර පක්ෂවල නියෝජිතයින්ට යුගදනවි බලාගාරය සම්බන්ධ ගිවිසුමේ විනිවිඳභාවය සම්බන්ධයෙන්  පවතින ගැටලු එම සාකච්ඡාවේ දී නිරාකරණය වු බවය.

 

"යුගදනවි බලාගාරය පිළිබඳව සාකච්ඡා වුණා. බලාගාරය පිළිබඳ යම්කිසි පැහැදිලිකිරීමක් අවශ්‍යව තිබුණා අපේ සන්ධානයේ අනෙක් පක්ෂවල නායකයින් ට. ඒ සම්බන්ධයෙන් මුදල් අමාත්‍යවරයා විදියට බැසිල් රාජපක්ෂ මහතා ඉතා දීර්ඝ පැහැදිලි කිරීමක් කළා. 

 

පැහැදිලිව කිව්වා මේ ටෙන්ඩර් එක කැඳවලා එකෙන් ලැබිලා තියෙන ලන්සුව LNG එකෙන් යුනිට් එකකට ඩොලර් 3යි ගාණක් වෙනවා. නමුත් මේ සමාගම ඩොලර් 1.4කට දෙන්න ලෑස්ති වෙලා තියෙනවා. ඉතින් මේ වගේ ලාබදායි දෙයක් අතහැරලා යන්නේ මොකටද කියලා.

 

 

විදුලි වෘත්තීය සමිති හමුවී යුගදනවි බලාගාරය සම්බන්ධයෙන් කරුණු පැහැදිලි කිරීමට මෙහිදි තීරණය කළ බව රෝහිත අබේගුණවර්ධන සඳහන් කළේය.

 

 

 

 

 

 

මේ අතර, ආණ්ඩුවේ හවුල් පක්ෂ අද (29) පස්වරුවේ පැවැත්වීමට සැලසුම්කර තිබූ "මහජන සභාව " රැස්වීම නියමිත පරිදි පැවැත්වීමට තීරණය කර ඇතැයි ද දැනගන්නට ඇත. මෙම රැස්වීම අවලංගු කර ගැනීමට ප්‍රකට ව්‍යාපාරිකයකු ඊයේ දවස පුරා දරු උත්සාහය අසාර්ථක වී තිබේ. 

 

  

 

 

 

 

'යුගදනවි ගිවිසුම මම දැකලත් නැහැ' ! - විමල්ල ඉදිරියේ බැසිල් කියයි !