මේ වසරේ මුල් මාස දෙක තුළ පමණක් මෙවැනි අන්තර්ජාල වංචා සිද්ධි කිහිපයක් වාර්තා වී ඇති බව පවසන SL CERT හි ජ්‍යෙෂ්ඨ තොරතුරු ආරක්ෂණ ඉංජිනේරු චාරුක දමුණුපොළ සඳහන් කර සිටියේ උත්සව සමයේ පවතින උද්යෝගය ප්‍රයෝජනයට ගනිමින් වංචාකරුවන් ආකර්ෂණීය දීමනා, තෑගි හෝ විශේෂ වට්ටම් ලෙස පෙනෙන ව්‍යාජ දැන්වීම් ප්‍රචාරය කරන බවයි.
ව්‍යාජ දැන්වීම් ප්‍රචාරයක්
ව්‍යාජ වට්ටම් සහ තෑගි - අධික මිල අඩු කිරීම් සහිත ආකර්ෂණීය වෙළඳ දැන්වීම්.
සැකසහිත සබැඳි (Links) -සමාජ මාධ්‍ය සහ WhatsApp හරහා ලැබෙන කෙටි පණිවිඩ.
මේවා හරහා ඔබව වංචාකාරී වෙබ් අඩවි වෙත යොමු කර, බැංකු ගිණුම් තොරතුරු සහ පුද්ගලික දත්ත සොරකම් කිරීමට උත්සාහ කරයි.
මෙවැනි සබැඳි මඟින් පරිශීලකයින් වංචාකාරී වෙබ් අඩවි වෙත යොමු කර පුද්ගලික තොරතුරු සහ සංවේදී දත්ත ලබාගැනීමට උත්සාහ කරන බැවින්, විශේෂයෙන්ම නොදන්නා හෝ අනවසර මූලාශ්‍රවලින් ලැබෙන සබැඳි මත ක්ලික් කිරීමේදී මහජනතාව වැඩි සැලකිල්ලක් දැක්විය යුතු බව ඔහු සඳහන් කර යි.
එසේම වෙසක් සහ පොසොන් වැනි ආගමික උත්සව සමයන්හිදී ද "පොසොන් මහ ඩේටා දන්සැල" වැනි නාමයන් යටතේ මෙවැනි උපක්‍රම ක්‍රියාත්මක විය හැකි බවයි. උත්සව සමයන්හිදී සයිබර් වංචා අවදානම සාමාන්‍යයෙන් ඉහළ යන බැවින්, අන්තර්ජාලය භාවිතා කිරීමේදී සහ විවිධ ප්‍රවර්ධන වැඩසටහන් සමඟ සම්බන්ධ වීමේදී වඩාත් විමසිලිමත් වී තම පුද්ගලික දත්ත ආරක්ෂා කර ගැනීමට කටයුතු කරන ලෙස SL CERT ආයතනය මහජනතාවගෙන් ඉල්ලා සිටියි.
කළ යුතු දේ
මූලාශ්‍රය පරීක්ෂා කරන්න - නොදන්නා පාර්ශවවලින් එන සබැඳි (links) මත ක්ලික් කිරීමෙන් වළකින්න.
නිල වෙබ් අඩවි පමණක් භාවිතා කරන්න: -වට්ටම් හෝ දීමනා පරීක්ෂා කිරීමේදී අදාළ ආයතනයේ නිල වෙබ් අඩවියට හෝ පිටුවට පිවිසෙන්න.
පුද්ගලික තොරතුරු සුරකින්න - කිසිදු විටක ඔබගේ මුරපද (Passwords) හෝ OTP අංක අන් අය සමඟ හුවමාරු කර නොගන්න.
මෙම වසරේ මුල් මාස දෙක තුළ පමණක් මෙවැනි අන්තර්ජාල වංචා රැසක් වාර්තා වී ඇති බවත්, උත්සව සමයේ උද්යෝගය හේතුවෙන් පවතින අවධානය ගිලිහී යාමට ඉඩ නොදෙන ලෙසත් SL CERT ආයතනය වැඩිදුරටත් අවධාරණය කරයි.
