• තනි පුද්ගලයන්ට ගැසිය හැකි උපරිම කැරැල්ල මාරාන්තික උපවාසයයි.

    * රතන හිමියන් සිටියේ, තමා කවුදැයි තමාටවත් හඳුනාගත නොහැකි අනන්‍යතා අර්බුදයක ගිලෙමිනි. 

    * කාදිනල් හිමියන් රතන හිමියන් සොයායෑමෙන් කළේ මුස්ලිමුන්ට එරෙහි පළිගැනීමේ කොටස්කාරයකු වීමයි.

    අතුරලියේ රතන හිමි උත්සාහ කළේ, චීවරයෙන් රට ගිනි තැබීමටය. එහිමියන්ගේ හැඳුනුම්පත පසුගිය කාලයේ නැතිවී තිබිණ. 2014 අවසාන භාගයේ මහින්ද රාජපක්ෂ ආණ්ඩුව පෙරලා දැමීමට පුරෝගාමී කාර්යභාරයක් කළ රතන හිමියන් පසුගිය දා මහනුවරදී උපවාසයකට වාඩි වන විට සිටියේ, තමා කවුදැයි තමාටවත් හඳුනාගත නොහැකි අනන්‍යතා අර්බුදයක ගිලෙමිනි. 

    එක්සත් ජාතික පක්ෂයේ ජාතික ලැයිස්තුවේ මන්ත්‍රීවරයකු හැටියට සියලු වරදාන වරප්‍රසාද ලබාගත් රතන හිමියන්, එජාපයෙන් පළවා නොහැර සිටියේ, නීතිමය වශයෙන් මන්ත්‍රීවරුන් ධූරවලින් ඉවත් කිරීමට තිබෙන බාදා සම්බන්ධයෙන් උගුලක ලංකාවේ අනෙකුත් දේශපාලන පක්ෂ මෙන්ම එක්සත් ජාතික පක්ෂයද පැටලී සිටින නිසාය. 

    පසුව ජාතික හෙළ උරුමයෙන්ද එහිමියන් පලවා හැර තිබිණ. ජාතික හෙළ උරුමයේ නායක, චම්පික රණවක ඇතුළු අනෙකුත් සගයන් මහනුවරට ගොස් බැහැ දකින්නේ මෑත දිගු කාලයක් තිස්සේ ඔවුන්ගේ දැඩි විවේචනයට හා කොන් කිරීමට භාජනය වූ රතන හිමියන්ය. 

    ජාතික හෙළ උරුමයෙන් ඈත්වුණු පසු රතන හිමි ජනාධිපති සිරිසේනට ළංවිය. ඔක්තෝබර් 26 වැනිදා ව්‍යාවස්ථා කුමන්ත්‍රණයෙන් පසු පාර්ලිමේන්තුවේ ජනාධිපතිගේ දුෂ්චරිතය නිදොස් කරන්න‌ට හිටියේ රතන හිමි පමණය. එතැනිනුත් ඔහු අවසන් වරට පිටත්ව ගොස් නැවතී සිටියේ ගෝඨාභය රාජපක්ෂ සමගය.

    ඒ නිසා රතන හිමිගේ මාරාන්තික උපවාසය සැලකිය යුත්තේ තමා කවුරුද යන්න සොයා ගන්නට ගත් උත්සාහයක් හැටියටය. 

    තමා කවුරුද යන්න සොයා ගැනීමට හොඳම දර්ශනය:

    තමා කවුරුද යන්න සොයා ගැනීමට හොඳම දර්ශනයක් සපයන්නේ බුදු දහමයි. එවැනි දහමක සෙවණ තිබියදීත් රතන හිමි තෝරාගත්තේ මාරාන්තික උපවාසයයි.

    තනි පුද්ගලයන්ට ගැසිය හැකි උපරිම කැරැල්ල මාරාන්තික උපවාසයයි. ඒ පුද්ගලයා චීවරය දරන්නෙකු වන විට ඒ මාරාන්තික උපවාසයට භයානක අර්ථයක් ලැබෙන්නේය. 

    පසුගිය කාලයේ තමා අනුගමනය කරන අනුගාමික පිරිසක් නැතිවීමේ ඉරණමට මුහුණ දුන් රතන හිමියන්ට, මහජනතාව පාරට බස්සවා කළ හැකි දේශපාලන වික්‍රමයක් තිබුණේ නැත. ඔහු කියවන දේ අසන කවුරුත් සිටියේ නැත. එහෙත්, සිවුරක් සහිතව මාරාන්තික උපවාසයක් කරන විට රටේ බෞද්ධ ජනතාව  මොනවා වුණත් තිගැස්සෙන, කම්පාවන බව ඔහු දනියි. මහනුවරදී භාවිත කරන ලද්දේ ඒ උපක්‍රමයයි.

    ගිනිපුපුරු ගසන මුස්ලිම් විරෝධයෙන් :

    රතන හිමි මැරෙන්නට යනවා බලන්නට මහනුවරට එකතුවුණ පිරිස වනාහි ඔහුගේ දේශපාලන හෝ ශාසනික අනුගාමිකයෝ නොවෙති. ඔවුන් ආවේ සිවුරක් ඇඳි අයකු මාරාන්තිකව උපවාස කරනවා බලන්නටය. ඒ ආවේද, ශාසන සංවේගයෙන් නොවේ. මේ දවස්වල රටතුළ ගිනිපුපුරු ගසන මුස්ලිම් විරෝධයෙන් මෙළැවීගෙනය.

    එහෙම හිතන්නට ඔවුන්ට හේතුකාරක වුණේ රතන හිමියන් පත්තු කළ මුස්ලිම් විරෝධයයි. එය අප්‍රෙල් 21 න් පසු රටපුරා පැනනැගුනු මිනුවන්ගොඩ ප්‍රහාරයෙන් පසු ඇවිළුණු මුස්ලිම් විරෝධයේම දිගුවකි. වෙනසකට තිබුණේ, මුස්ලිම් මිනිස්සුන්ට පහරදිය යුතු යැයි, ඔවුන්ගේ දේපළ මංකොල්ල කෑ යුතුයැයි රතන හිමියන්ගේ මුවෙන් පිට නොවීම පමණකි.  

    ඒ හිංසාකාරී මාර්ගය වෙනුවට, රතන හිමියන් තෝරාගත්තේ, මුස්ලිම් දේශපාලන නායකයන් ඉවත්විය යුතු යැයි කියා, සිය දිවි ම නසාගන්නට තැත්කරන අහිංසක මාර්ගයකි. එය පල දැරුවේය. මුස්ලිමුන්ට එරෙහිව රතන හිමි සියදිවි නසාගන්නට හදන හෙයින් කුපිත වූ මුස්ලිම් විරෝධී ජනයා මහනුවරද, රටේ අනෙකුත් නගරවලද රොද බඳින්නට වූහ. 

    නගරවල ඊනියා සිංහල වෙළෙඳ සංගම් විසින් සියලු කඩසාප්පු තුණ්ඩු කෑලි යවා බලහත්කාරයෙන් වසා දමන ලදී. පුද්ගලික බස් සේවකයෝ වර්ජන ආරම්භ කොට, දුවන බස්වලටද විවිධාකාර තර්ජන කළහ. රට නැවතත් මුස්ලිම් ජනතාව ඉලක්ක කර ගත් ප්‍රහාරයක මුවවිටට ආයේය. 

    Gana

                            අලුත්ගම මුස්ලිම් මිනිස්සුන්ට පහරදීමේ විනාශයේ ගින්න ඇවිළවූ ගල ගොඩඅත්තේ ඥානසාර හිමිගේ භූමිකාව 



    එය තවදුරටත් ගියේ නම් 2014 ජූනි මාසයේදී අලුත්ගම මුස්ලිම් මිනිස්සුන්ට පහරදීමේ විනාශයේ ගින්න ඇවිළවූ ගල ගොඩඅත්තේ ඥානසාර හිමිගේ භූමිකාව මෙදා මහනුවරදී රඟපාන්නට යෙදෙන්නේ අතුරලියේ රතන හිමි විසිනි.

    මේ බිහිසුණු නාටකයේ කොටලු හමෙන් වැසුණු තමාගේ ඇත්ත චරිතය හෙළිකරගත් අනෙක් පුද්ගලයා මැල්කම් රංජිත් කාදිනල් මිහිය. මැල්කම් රංජිත් කාදිනල් හිමි වනාහි, පාස්කු ඉරිදා ප්‍රහායෙන් පසු රට ඇවිළෙන්නට නොදී වළකාගත්, ඒ අවස්ථාවේ යේසුස් වහන්සේගේ භාෂිතය ක්‍රියාවෙන් පෙන්වූ ආගමික නායකයෙකි. 

    එහෙත්, අද වන විට ඔහු සිටින්නේද වර්ගවාදයේ කරවටක් ගිලීය. ඒ අතින් බලන විට, රතන හිමියන්ගේ සිවුර පාවිච්චි කරමින් කරන විනාශයේම දිගුවක් මේ අවස්ථාවේදී කාදිනල් හිමියන් ලෝගුව පාවිච්චි කරමින් කරනු පෙනේ.


    මංගල ඇමතිවරයා කිව්වේ සම්පූර්ණ ඇත්ත:


    මංගල සමරවීර ඇමතිවරයා කිව්වේ සම්පූර්ණ ඇත්තය. මහනුවරට ගොස් කාදිනල් හිමි හමුවුණේ සයනයක වැතිරී සිටි සිංහල බෞද්ධ අන්තවාදයේ ප්‍රකාශකයෙකි. ඔහු සිය ජීවිතයෙන්ම, සිංහල බෞද්ධ මහජාතිය වෙනුවෙන් පෙනීසිටින, සුළුතර ජනවර්ගයක් කෙරෙහි සදාකාලික පීඩකයෙකු ලෙස හැසිරෙන්නෙකි. 

    මේ මොහොතේ ඔහුගේ පීඩනයට ලක්ව සිටින්නේ ලංකාවේ සුළුතර මුස්ලිම් ජනතාවය. රතන හිමිගේ මේ මොහොතේ භූමිකාව පීඩකයාගේ භූඋමිකාවයි.

    කිතුදහම යනු පීඩකයාගේ ධර්මයක් නොවේ. ඒ දහමද, එහි අනුගාමික යේසුස් වහන්සේද පෙනී සිටියේ පීඩිතයා වෙනුවෙනි. මරියා මද්ගලේනාගේ සිට ඒ ගැන කතා සහ ඉගැන්වීම් බයිබලයේ ඕනෑතරම් තිබේ.

    කතෝලිකයන් බහුතරයක් වන සමාජයක, කිතුදහම වැදගත් වන්නේ, පීඩිතයා ගැන සහකම්පනයක් ඇතිකර ගැනීම සඳහාය. එහෙත්, ලංකාවේ කතෝලිකයන් යනු බහුතරය නොවේ.  මුස්ලිම්, දෙමළ ජනතාව මෙන්ම සුළුතරයකි. 

    එවිට, කතෝලිකයන් සහකම්පනයට පත්විය යුත්තේ මුස්ලිම් හා දෙමළ ජනතාව සමගය. සුළුතර ජනතාවක් වීම තුළ මුහුණ දෙන්නට සිදුවන දෙවැනිකොට සැළකීම් මේ සුළුතරයන් සියල්ලටම එක පැත්තකින් අදාළය. අප්‍රෙල් 21 වැනිදායින් සති තුනකට පසු මුස්ලිම් ජනතාව මුහුණ දුන්නේද එවැනි සුළුතරයකට එරෙහි සාමූහික පළිගැනීමකටය. 

    රතන හිමියන්ගේ උපවාසය ඒ සාමූහික පළිගැනීමේම තවත් මුහුණුවරකි. කාදිනල් හිමියන් රතන හිමියන් සොයායෑමෙන් කළේ මුස්ලිමුන්ට එරෙහිව ඒ සාමූහික පළිගැනීමේ කොටස්කාරයෙකු  බවට තෙමේම පත්වීමයි.


    පාලනය අතට ගත් කාදිනල් :
  • kadi                                                 කදිනල් හිමියන් රතානගේ නාඩගම බලන්නට ගිය අවස්ථාව 

    පසුගිය කාලයේ කාදිනල් හිමි සිටියේ සියල්ලන්ම විනිශ්චය කරමිනි. ඔහුට අනුව, පාස්කු ඉරිදා ප්‍රහාරයට වගකිව යුත්තන්ට තවමත් දඩුවම් දී නැත. එසේ නම්, ඊට නිශ්චිතව වගකිවයුත්තන් ගැන එහිමියන් දැන සිටිනවා විය යුතුය. රටේ ආරක්ෂාව පිළිබඳව විනිශ්චයද ඔහුම භාරගත්තේය. ඒ රජයේ පාසැල් විවෘත කරන දිනයක් රජය ප්‍රකාශ කරද්දී කතෝලික පාසැල් තවදුරටත් වසා තැබීම මගිනි. 

    ආරක්ෂාව ඇති වන්නේ කුමන ස්ථානයට කට්ට පැමිණි විටදැයි දැනුමක් කාදිනල් හිමිට තිබුණා වැනිය. මේ වන විට කට්ට නියම තැනට පැමිණ ඇතිවා විය යුතුය. රටේ ආරක්ෂාව සැපයීම පැහැර හැරි දේශපාලන නායකයන් මීළඟ චන්දයේදී පරාජය කළ යුතුයැයි විනිශ්චය දුන්නේද කාදිනල් හිමියන්ය. 

    ඔවුන් ජරාජය කර බලයට ගෙන ආ යුත්තේ කවුරුන්දැයි විනිශ්චය එහිමියන් සතුව තිබෙන්නට පුළුවන. අප්‍රෙල් 21 වැනිදා ප්‍රහාරයට ආණ්ඩුකාරවරුන් දෙදෙනකු හා ඇමතිවරයකු වගකිව යුතු බවටද කාදිනල්වරයා විනිශ්චය කර ඇතිවා විය හැකිය. 

    නැතිනම්, ඒ ඉල්ලීම වෙනුවෙන් දිවිනසා ගන්නට දළදා මාලිගාව යොදාගත්, අන්තවාදී භික්ෂුවකට ආශිර්වාද කරන්නට කාදිනල් හිමියන් මහනුවර යන්නේ නැත.

    "ඔබ අනුන්ව යම් ආකාරයකින් විනිශ්චය කරනවාද එයාකාරයෙන්ම ඔබවත් විනිශ්චය කරනු ලබයි".  යනුවෙන් (මතෙව් 7:,2.) සඳහන් වෙයි. 

    කාදිනල් හිමියන් විනිශ්චයට ලක්වන අවස්ථාව:

    ඒ අනුව දැන් එළඹී ඇත්තේ අනුන් විනිශ්චය කරන කාදිනල් හිමියන් විනිශ්චයට ලක්වන අවස්ථාවයි.

    "විනාශය කරා යන පාර පළල්. එහි බොහෝ ඉඩකඩද තිබෙනවා. එයින් ඇතුල් වන්නන්ද බොහෝයි. නමුත් ජීවනය කරා යන පාරේ අවහිරකම් තිබෙයි. එහි දොරටුවත් පටුයි. එය සොයාගන්නේ ස්වල්ප දෙනෙක් පමණයි. (මතෙව් 7:,12-14.) යේසුස් වහන්සේට අනුවම කාදිනල්වරයා තෝරාගෙන ඇත්තේ බහුතරයේ පැත්තයි. 

    ඒ බහුතරයේ සිටින රතන හිමි, ඥානසාර හිමි වැනි අන්තවාදීන් කැපවී සිටින්නේ මුස්ලිම්, දෙමළ මිනිසුන් නැති, සිටියත් බහුතරයේ ඕනෑ එපාකම් මත ඔවුන්ට ජීවත්වන්නට සිදුවන ලංකාවක් නිර්මාණය කැරගැනීම සඳහාය.

    ඒ අන්තවාදීන්ගේ ප්‍රහාරයට මීට පෙරද, දැන්ද අනාගතයේදීද ලක්වන තවත් ජනකොටසක් වන්නේ කතෝලිකයන්ය. අද රතන හිමි සමග කරට අත දා ගැනීමෙන් කාදිනල් හිමියන් කරන්නේ, තමන් නියෝජනයට කරන දෙවියන් වහන්සේගේ අනුගාමිකයන්ට එරෙහි අනාගත ප්‍රහාරකයකුගේ දෙඅත් ශක්තිමත් කිරීමයි.

    (උපුටා ගැනීම : anidda.lk - ජුනි 07 )

subscribeYT

නවතම පුවත්