බාබර්ගේ පිත්ත කලම්බු ස්ට්‍රකර්ස්ලට ජය ගෙනෙයි

ලංකා ප්‍රිමියර් ලීග් (2023) තරගාවලියේ පස්වැනි තරගය ලෙස ගෝල් ටයිටන්ස් කණ්ඩායම සහ කලම්බු ස්ට්‍රකර්ස් කණ්ඩායම

අතර පල්ලෙකැළේ ජාත්‍යන්තර ක්‍රිකට් ක්‍රීඩාංගණයේ අද (7 වැනිදා) පැවැති තරගයෙන් කඩුලු 7 ක තියුණු ජයක් වාර්තා කිරීමට කලම්බු ස්ට්‍රකර්ස් කණ්ඩායම සමත් විය. ඔවුන් මෙවර තරගාවලියේදී ලැබූ දෙවැනි ජය මෙය විය.

එහිදී අගනා පිතිහරඹයක නිරත වූ ආරම්භක පිතිකරු බාබාර් අසාම් පන්දු 59 කදී හයේ පහර 5 ක් සහ හතරේ පහර 8 ක් සමග ලකුණු 104 ක් රැස්කිරීමට සමත් විය.

තරගයේ ප්‍රථමයෙන් පන්දුවට පහරදුන් ගෝල් ටයිටන්ස් කණ්ඩායම සිය පන්දුවාර 20 අවසානයේ කඩුලු 3ක් දැවී ලකුණු 188ක් රැස්කිරීමට සමත් විය. එහිදී ටිම් සයිෆර්ට් පන්දු 35කදී හයේ පහර 3ක් සහ හතරේ පහර 4ක් සමග ලකුණු 54ක් රැස්කළේය.

ජයග්‍රහණය සඳහා ළකුණු 189 ක ඉලක්කයක් හඹාගිය කලම්බු ස්ට්‍රකර්ස් කණ්ඩායම පන්දුවාර 19 පන්දු පහක දී කඩුලු 3 ක් පමණක් දැවී සිය ඉලක්කය සපුරා ගැනීමට සමත් විය.

බාබර් අසාම්ගේ මෙම ශතකයත් සමග LPL තරග ඉතිහාසයේ පිතිකරුවකු වාර්තා කරන ලද ඉහළම ලකුණු සංඛ්‍යාවේ වාර්තාවටද හිමිකම් කීවේය. 

එමෙන්ම මෙම ශතකය බාබර්ගේ 10 වැනි විස්සයි-20 ශතකය ලෙසින් වාර්තා පොත් අතරට එක් විය. ඒ අනුව එය ලොව වැඩිම විස්සයි-20 ශතක ලාභීන් අතර දෙවැනි ස්ථානය දක්වා බාබර්ව ඉදිරියට ගෙන ඒමට සමත්වීම කැපී පෙනෙයි. එම ලැයිස්තුවේ අංක 1 පසුවන්නේ බටහිර ඉන්දීය කොදෙව් කණ්ඩායම නියෝජනය කරන ලද ක්‍රිස් ගේල් වන අතර ඔහු ශතක 22 ක් ලබා ගෙන තිබේ.

කලම්බු ස්ට්‍රකර්ස් කණ්ඩායමේ ආරම්භක පිතිකරු යුගල එක්ව ආරම්භක කඩුල්ල වෙනුවෙන් පන්දු 75 කදී ලකුණු 111 ක සම්බන්ධතාවක් ගොඩනැගීමට සමත් විය. එහිදී පැතුම් නිස්සංක හයේ පහරකින් සහ හතරේ පහර 5 ක් ද සහිතව ළකුණු 54 වාර්තා කළේය .

තරගයේ වීරයා – බාබර් අසාම්

{gallery}LPL GT vs CS{/gallery}