ඔස්ට්‍රේලියානු ආරම්භක පිතිකරු ඩේවිඩ් වෝනගේ කොළ පැහැති පිම්බුණු කැප් තොප්පිය සුරක්ෂිතව නැවත ලැබෙන්නට සලස්වන ලෙසට
ඔස්ට්‍රේලියානු අගමැතිවරයා, ලොව ඉහළ පෙළේ ක්‍රිකට් ක්‍රීඩකයෙක් හා වෝනගේ පියා විසින් කරන ලද ඉල්ලීම්වලට තවමත් යහපත් ප්‍රතිඵලයක් ලැබී නැහැ.
වැදගැම්මකට නැති මිනිහෙක් ඒ තොප්පිය සොරකම් කරන්නට ඇතැයි පියා පවසනවා.
කොළ කැප් තොප්පියේ මේ අභිරහස මතු වුනේ වෝන Qantas ඔස්ට්‍රේලියා ජාතික ගුවන් යානයකින් ගිය ගමනක් අතරතුර සිදුවූ මාරුවීමකදී තොප්පිය අතුරුදන් වීමෙන් පසුව එය සොයා ගැනීම පිණිස ඔහු සමාජ මාධ්‍ය වෙත යොමු වීමේදී.
“අවාසනාවකට, මගේ තොප්පිය හොයා ගන්න මම දරණ අවසන් උත්සාහය මෙය යි” යනුවෙන් වෝන ප්‍රකාශ කළ ‘ඉන්ස්ටග්‍රෑම්’ වීඩියෝව ප්‍රසිද්ධියට පත්ව තිබෙනවා.
පිම්බුණු කොළ කැප් තොප්පිය (baggy green) ඔස්ට්‍රේලියානු ටෙස්ට් ක්‍රිකට් ක්‍රීඩකයන්ට ලබා දෙන්නේ අවුරුදු සියයකට වැඩි සම්ප්‍රදායකට අනුව.
මෙය ඔස්ට්‍රේලියානු ක්‍රිකට් ක්‍රීඩාවේ සංකේතයක් පමණක් නොව විශ්වාස කළ නොහැකි වටිනාකමක් ද තිබෙන තොප්පියක්.
ඔස්ට්‍රේලියාවෙන් බිහිවූ ලෝක පූජිත දඟ පන්දු යවන්නා වූ ෂේන් වෝන් 2022 වසරේ මිය යාමට පෙර ඔහුගේ කොළ කැප් තොප්පිය ඔස්ට්‍රේලියානු ඩොලර් මිලියනයකට වැඩි මුදලකට (අමෙරිකානු ඩොලර් 676,000) විකුණා දැමුවා.
මේ තොප්පිය තමාගේ දියණියන්ට ගෙන යන ත්‍යාග සමග තමා පිටේ එල්ලා ගෙන යන බෑගයේ තිබුනු බවත් නමුත් පාකිස්තානය සමග බදාදා ඇරඹුනු ටෙස්ට් තරගය සඳහා මෙල්බර්න් සිට සිඩ්නි දක්වා යන ගුවන් ගමනේ මාරුව අතරතුර ඒ සියල්ල අතුරුදන්ව ඇති බවත් වෝන දුකෙන් පවසා සිටියා.
සිය ක්‍රීඩා දිවියේ අවසාන ටෙස්ට් තරගය ක්‍රීඩා කිරීම පිණිස තමා සිඩ්නි ක්‍රිකට් ක්‍රීඩාංගණයට දිව යන විට ඒ තොප්පිය පැළඳ සිටීමට ඩේවිඩ් වෝන සැලසුම් කරගෙන සිටි බැවින් එය අතුරුදන් වී ඇත්තේ ඉතා ම නරක වෙලාවක.
“කවුරු හරි මගේ ගමන් මළුවල තිබුණු පිටේ එල්ල ගෙන යන බෑගය අරගෙන තියෙනවා. මගේ කොළ බැගී තොප්පිය තිබුනේ ඒ බෑගය ඇතුලේ. එය මට හැඟීම් බර වූ දෙයක්. ඒක ආපහු ලබා ගන්න මම බොහොම කැමතියි” වෝන ‘ඉන්ස්ටග්‍රෑම්’ වීඩියෝවෙන් කියා සිටියා.
වෝනගේ මේ අවාසනාවන්ත තත්ත්වය කනවැකුණු පාකිස්තාන ක්‍රිකට් නායක ෂාන් මසූඩ්, වහාම රට පුරා සෝදිසි මෙහෙයුමක් ක්‍රියාත්මක කරන ලෙසට ඔස්ට්‍රේලියානු රජයෙන් ඉල්ලා සිටියා.
“ඒ තොප්පිය ආපසු ලබා ගන්න අපට දක්ෂතම රහස් පරීක්ෂකයන් අවශ්‍ය වන්න ඉඩ තියෙනවා. මොකද, ඩේවිඩ් වෝන යනු ක්‍රිකට් ක්‍රීඩාවේ අතිවිශිෂ්ට තානාපතිවරයෙක් නිසා සෑම ගෞරවයක් ම ඔහුට අයිතියි. ඔහුගේ ඇදහිය නොහැකි දස්කම් පිරි ක්‍රීඩා ජීවිතයේ අවසාන තරගය උත්සවාකාරයෙන් සමරන්න ඔහු ඉතාම සුදුස්සෙක් වන නිසා මේ තොප්පිය වහාම සොයා ගත යුතුයි” මසූඩ් තරගයට පෙර පැවති මාධ්‍ය හමුවේදී පැවසුවා.
මෙය ඔස්ට්‍රේලියානු අගමැති Anthony Albanese ට ද ඇසෙන්නට ඇත. මක්නිසාද යත්, ඔහු නව වසරේ ඔහුගේ පළමු ප්‍රවෘත්ති සාකච්ඡාව ආරම්භ කළේ එම තොප්පිය පිළිබඳව විශේෂ සඳහනක් කරමින් හා එය නැවත ලබා දෙන ලෙසට ඉල්ලීමක් කරමින්.
“ඩේවිඩ් වෝන තරග සියයකට වැඩියෙන් ඔස්ට්‍රේලියාව නියෝජනය කර තිබෙනවා. බැගී කොළ තොප්පි අයිති එයාට. ඔහු ඒවා හම්බ කර ගෙන තිබෙන නිසා ඒවා නැවත ලැබිය යුතුයි” අගමැතිවරයා ප්‍රකාශ කළා.
මුළු රට ම මේ ගැන අවධියෙන් සිටියදී වෝනගේ පියා වන හොවාඩ් අනාවැකි පළ කරන්නේ තොප්පිය නැවත මතු වීම කාලයාගේ ප්‍රමාදයක් පමණක් බව කියමින්.
දේශීය ගුවන්විදුලියකට කතා කරමින් ඔහු මෙසේ පැවසුවා: “මේ තොප්පිය ගත්ත, කිසිම වැදගැම්මකට නැති මොකා වුනත්, එයාට ඒක ළඟදීම අතහරින්න සිද්ධ වෙනවා. ඒක කොහෙ හරි දාලා තිබිලා හොයා ගන්න ලැබේවි.”
කොළ කැප් තොප්පිය ඊයේ වන විට ලැබී නොතිබුනු අතර වෝන ඔහුගේ අවසාන ටෙස්ට් තරගය සඳහා පැළඳුවේ ආදේශන තොප්පියක්. මෙය ඔස්ට්‍රේලියාව වෙනුවෙන් ඩේවිඩ් වෝන වමත් පිතිකරුවාගේ 112 වැනි ටෙස්ට් ක්‍රිකට් තරගය යි.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
