ඔස්ට්‍රේලියාවේදී පැවති තරග තුනකින් සමන්විත ටෙස්ට් ක්‍රිකට් තරගමාලාවෙන් පාකිස්තානයට
අත්වුනේ තරග 3-0ක පරාජයක්.
නමුත් තම කණ්ඩායමේ පරාජයන් මධ්‍යයේ පන්දුවෙන් දීප්තිමත්ව සිටීමට 27 හැවිරිදි ආමිර් ජමාල් (Aamir Jamal) සමත් වුනා.
මේ තරගමාලාවේදී පාකිස්තාන කණ්ඩායමේ සුපිරි පන්දු යවන්නා බවට පත්වෙමින් ඔස්ට්‍රේලියානු පිතිකරු පෙළ කඩා බිඳ දැමූ මේ පන්දු යවන්නා ඔස්ට්‍රේලියාවේ සිටි Uber කුලී රථ රියදුරෙක්.
ආමිර් ජමාල්ගේ මංගල ජාත්‍යන්තර ටෙස්ට් ක්‍රිකට් තරගය වුනේ පර්ත් නුවර පැවති පළමු තරගය. එහිදී මේ මඳ වේග පන්දු යවන්නා පළමු ඉනිමේදී කඩුලු හයක් සමග සමස්ත තරගයේ කඩුලු හතක් ලබා ගත්තා.
ඉන්පසු මෙල්බර්න් ක්‍රිකට් ක්‍රීඩාංගණයේදී පැවති දෙවැනි ටෙස්ට් තරගයේදී තවත් කඩුලු පහක් බිඳ හෙලූ ඔහු සිය සුපිරි දක්ෂතාව සිඩ්නි නුවරටත් ගෙන යමින් තෙවැනි තරගයේදී තවත් කඩුලු හයක් ඔස්ට්‍රේලියානු පළමු ඉනිමේදී ලබා ගැනීමට සමත් වුනා.
ආමිර් ජමාල්ගේ මේ විශිෂ්ට හපන්කම වඩාත් විස්මයජනක කතාවක් බවට පත්වන්නේ ඔහු මීට වසර හයකට පෙර ඔස්ට්‍රේලියාවේ Uber රියදුරෙකුව සිටි බව දැනගත් විට.
තමාගේ පැරණි රැකියාව පිළිබඳව පාකිස්තාන ක්‍රිකට් මණ්ඩලයට ප්‍රකාශයක් කරමින් ජමාල් මෙසේ කියා සිටියා:
“පහේ ඉඳන් උදේ දහය හමාර වෙනකං මම මගේ පළමු වැඩමුරය වෙනුවෙන් ඔන්ලයින් ඉන්නවා. මේ අරගලය හරියටම වෙලාවට වැඩකරන ගතිය මා තුළ රෝපනය කළා. මම ජීවිතයේ දේවල් අගය කරන්න පටන් ගත්තා. වෙහෙස වී වැඩ කරලා හම්බ කරන ලෙසට ජීවිතය ඔබට බල කරන විට ඔබ යම් යම් දේවල් අගය කරන්න පටන් ගන්නවා.”
කුලී රථ රියදුරෙකු ලෙස ඔස්ට්‍රේලියානු ජාතිකයන්ව තැන තැන ගෙන ගිය පුද්ගලයෙක් අවසානයේ ඔස්ට්‍රේලියානු පිතිකරුවන් දවාලන පන්දු යවන්නෙක් බවට පත්ව සිටීම අරුමයක් නොවන්නේද?
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
