රුසියානු මලල ක්රීඩකයන් 2024 පැරිස් ඔලිම්පික් ක්රීඩා උළෙලට සහභාගි වීම හා ඔවුන් ජූලි 26 වැනිදා පැවැත්වෙන සමාරම්භක උත්සවයට
පැමිණීම පිළිබඳව තමා විරුද්ධ බව පැරිසියේ නගරාධිපතිනිය වන ඈන් හඩල්ගෝ (Anne Hidalgo) ප්රකාශ කර තිබෙනවා.
“ඔවුන් එන්නේ නැත්නම් මම වඩාත් කැමතියි” ඇය පවසනවා. “මම හිතන විදියට රුසියානු ජනාධිපති ව්ලැඩමිය පූටින් (Vladimir Putin) යනු සමස්ත යුරෝපයට තර්ජනය කරන ඒකාධිපතියෙක්. ඔහු යුක්රේනයට එරෙහිව යුද්ධ කරන්නේ ජනතාවක් හා රටක් ලෙස ජීවත් වීමට තිබෙන ඔවුන්ගේ අයිතිය ප්රතික්ෂේප කරමින්” යැයි පැරිස් පුරපතිනිය පවසනවා.
“මධ්යස්ථ ධජයක් යටතේ පවා ඔවුන් දැකීම ඉතාම අමාරු දෙයක්. මොකද, මේ රුසියානු ක්රීඩකයන් මත පූටින් කොතරම් වැදගත්කමක් තබා තිබෙනවාද කියා අපි දන්න නිසා.”
පැරිස් ඔලිම්පික් සඳහා සුදුසුකම් ලබා සිටින රුසියානු හා බෙලරුසියානු මලල ක්රීඩකයන්ට යම් යම් කොන්දේසිවලට යටත්ව මධ්යස්ථ ක්රීඩකයන් ලෙස තරග කළ හැකි බවට ජගත් ඔලිම්පික් කමිටුව දෙසැම්බරයේදී ප්රකාශ කළා. මේ තීරණය බලපාන්නේ තනි තනිව තරග වදින මලල ක්රීඩක ක්රීඩිකාවන්ට මිස ඒ රටවල කණ්ඩායම්වලට නොවන බව ද කමිටුව පැවසුවා.
මධ්යස්ථ කොඩිය යටතේ රුසියානු හා බෙලරුසියානු මලල ක්රීඩක ක්රීඩිකාවන්ට ඔලිම්පික් සමාරම්භක උළෙලට සහභාගි විය හැකිද යන්න පිළිබඳව ජගත් ඔලිම්පික් කමිටුව තවමත් ප්රකාශ කර නැහැ. මේ කාරණය සම්බන්ධයෙන් ඔවුන් මේ මස අග පැවැත්වෙන ඔවුන්ගේ ඊළඟ සැසිවාරයේදී තීරණයකට එළඹෙනු ඇතැයි අපේක්ෂා කෙරෙනවා.
අගෝස්තු 28 වැනිදා පැවැත්වෙන තමන්ගේ සමාරම්භක උත්සවයට රුසියානු හා බෙලරුසියානු පැරාලිම්පික් මලල ක්රීඩකයන් සහභාගි නොවන බව ජාත්යන්තර පැරාලිම්පික් කමිටුව මේ මස මුලදී ප්රකාශ කළා.
“පැරාලිම්පික් කමිටුවේ ඒ තීරණය ඉතාමත් යුක්ති සහගත එකක් බවයි මට හිතෙන්නේ. දැන් ඉතිරිව තිබෙන්නේ ජාත්යන්තර ඔලිම්පික් කමිටුවට ඔවුන්ගේ තීරණය ගැනීමයි” හඩල්ගෝ ‘රොයිටර්’ පුවත් සේවයට පැවසුවේ තමා කිසිම කෙනෙකුට බලපෑමක් නොකරන බව ද අවධාරණය කරමින්.
“මම ප්රකාශ කරන්නේ පැරිසියේ නගරාධිපති ලෙස මගේ මතය යි” ඇය කියා සිටියා.
ඊශ්රායල් මලල ක්රීඩකයන්ද මේ හා සමාන බාධකවලට මුහුණ දිය යුතුද යනුවෙන් ඇසුනු ප්රශ්නයට ඇය කියා සිටියේ තමාගේ මතය අනුව නම් ඔවුන්ට තහංචි පැනවීම මීට අදාළ නොවන බව යි. ගාසා තීරයේ සාමාන්ය වැසියන් ඉලක්ක කිරීම නතර කිරීම පිණිස සටන් විරාමයක් වෙනුවෙන් ගෙන යන සියළුම තානාපති මට්ටමේ උත්සාහයන්ට තමා සහාය දක්වන බව ද ඇය පැවසුවා.
රුසියානු රාජ්ය ප්රවෘත්ති ඒජන්සිය වන TASS ට අනුව, පැරිසියේ පැවැත්වෙන 2024 ඔලිම්පික් ක්රීඩා උළෙල රුසියාව විසින් වර්ජනය නොකළ යුතු බවට රුසියානු ක්රීඩා ඇමති Oleg Matytsin වාර්තාකරුවන්ට පවසා තිබෙනවා.
“ඔලිම්පික් ක්රීඩා උළෙලේ තරග කරනවාද කියන එක දැන් කාගේත් මුවග තිබෙන ප්රශ්නයක්. මගේ ස්ථාවරය මෙයයි: “අපි අහක බැලීම හෝ අපේ දොරවල් වසා ගැනීම හෝ මෙය වර්ජනය කිරීම හෝ නොකළ යුතුයි” රුසියානු ක්රීඩා ඇමතිවරයා එහිදී කියා තිබෙනවා.
“අපි සංවාදයට ඉඩ තබා ගැනීමේ අවස්ථාව ආරක්ෂා කර ගනිමින් හැකි තරමක් තරග කළ යුතුයි” Matytsin පැවසුවේ ඔලිම්පික් ක්රීඩා උළෙලට රුසියාවේ සහභාගිත්වය පිළිබඳව තීරණයක් ගැනීමට හදිසියක් නැති බව සඳහන් කරමින්.
2024 ඔලිම්පික් උළෙල සඳහා රුසියාව හා බෙලරුසියාවේ මලල ක්රීඩක ක්රීඩිකාවන්ගේ සහභාගිත්වය වෙනුවෙන් තිබෙන කොන්දේසි හා අපේක්ෂාවන් සම්බන්ධයෙන් කමිටුවේ ස්ථාවරය ප්රකාශ කිරීම පිණිස ජගත් ඔලිම්පික් කමිටුවට අවස්ථාව ලබා දිය යුතු බව ක්රීඩා ඇමතිවරයා කියනවා.
සටහන :
(වර්නන් ගුණසේකර)
ජ්යෙෂ්ඨ මාධ්යවේදී