පළමු තරගයෙන් ලකුණු 11ක සියුම් ජයක් හිමිකර ගත් සංචාරක එංගලන්ත කණ්ඩායම තරගමාලාවේ 2-0ක බිඳ හෙළිය නොහැකි පෙරමුණක් ලබා ගත්තේ ඔවුන්ගේ අණසක පැතිරවීමේ තවත් ක්‍රීඩාවක් ප්‍රදර්ශනය කරමින්.
“එය විශිෂ්ට ක්‍රීඩාවක්. ලෝක කුසලාන තරගාවලියට ඉතාමත් හොඳින් සූදානම් වෙමින් සිටින අපට මීට වඩා වැඩි දෙයක් අපේ ක්‍රීඩකයින්ගෙන් ඉල්ලන්න බැහැ” යනුවෙන් නායක හැරී බෲක් පැවසුවා. “අපේ පිතිකරණය හොඳ බව පේනවා. අපේ පන්දු යැවීමත්, විශේෂයෙන් දඟ පන්දු යැවීමේ අංශයත් හොඳින් තිබෙන බව පේන්නේ ලෝකයේ මේ තැන්වල ක්‍රීඩා කරන විට දඟ පන්දුව ප්‍රධාන සාධකයක් වන බව අපි දන්නා නිසා.”
එංගලන්තය ඕවර 7.2කදී කඩුලු දෙකකට ලකුණු 57ක් රැස්කර ගෙන තිබියදී වර්ෂාව තරගයට හරස් වුණා. ඒ නිසා මුල් ඉලක්කය වූ ලකුණු 190 ඩක්වර්ත් ලුවිස් ක්‍රමවේදයට අනුව ඕවර 17කින් ලකුණු 168ක් බවට පත්වුණා. ඒ අවස්ථාවේදී ශ්‍රී ලංකා දඟ පන්දු යවන්නන් ඔවුන්ගේ ග්‍රහණය තද කරමින් අවශ්‍ය ලකුණු ලබා ගැනීමේ වේගයට වඩා පසුපසට එංගලන්තය ඇද දැමුවා.
කෙසේ වෙතත්, බෲක් ඉක්මනින් තරගයේ ගමන් මග වෙනස් කළා. ශක්තිමත් ප්‍රතිප්‍රහාරයක් දියත් කළ ඔහු හතරේ පහර 2ක් සහ හයේ පහර 4ක් සමග පන්දු 12කින් පමණක් ලකුණු 36ක් ලබා ගත්තේ තරගයේ වෙනස් නොවන ගැම්මක් එංගලන්තයේ වාසියට හරවමින්.
බෲක්ගේ දැඩි ප්‍රහාරය විසින් ඉලක්කය පන්දු 27කින් ලකුණු 39ක හසුරුවා ගත හැකි එකක් බවට පත්කරනු ලැබුවා.
තරගය අවසන් කරන්නාගේ කාර්යය සාර්ථකව ඉටු කළ ටොම් බැන්ටන් ඉලක්කය හඹා යාමේදී නැංගුරම ලෙස ක්‍රියා කරමින් පන්දු 33කින් නොදැවී ලකුණු 54ක් (හතරේ 4යි, හයේ 3යි) රැස් කළ අතර එංගලන්තය පන්දු දෙකක් ඉතිරිව තිබියදී අවසන් රේඛාව පසු කළා.
ඊට කළින් ඉනිමේදී, පළමුව පන්දුවට පහර දීමට කැඳවනු ලැබූ ශ්‍රී ලංකාව කඩුලු 5කට ලකුණු 189ක් වාර්තා කළ ද, බොහෝ ගැඹුරට දිවෙන එංගලන්තයේ ප්‍රබල පිතිකරණ පෙළට එරෙහිව එම මුළු ලකුණු ප්‍රමාණයේ අඩුවක් සැමවිටම දිස්වුණා.
පැතුම් නිස්සංක හා කමිල් මිශාර යන ආරම්භක පිතිකරුවන් ශ්‍රී ලංකාව ට ශක්තිමත් ආරම්භයක් ලබා දෙමින් පන්දු 33කින් ලකුණු 56ක් එක් කළා. නිස්සංක හතරේ පහර 3ක් සහ හයේ පහර 2ක් එල්ල කරමින් පන්දු 22කින් ලකුණු 34ක් රැස් කළ අතර මිශාර හතරේ සහ හයේ පහර දෙක බැගින් එල්ල කරමින් පන්දු 30කින් ලකුණු 36ක් ලබා ගත්තා.
පළමු තරගයේදී අසාර්ථක වූ මැද පිතිකරු පෙල මෙවර ඉදිරියට පා තබමින් මුළු ලකුණු සංඛ්‍යාව තරගකාරී එකක් දක්වා තල්ලු කළා. මෙහිදී කුසල් මෙන්ඩිස් හතරේ පහර 4ක් සහ හයේ පහරක් සමග පන්දු 17කින් ලකුණු 32ක් රැස් කළ අතර චරිත් අසලංක හතරේ පහර 4ක් එල්ල කරමින් පන්දු 22කින් ලකුණු 28ක් ලබා ගත්තා. ඔහුට පෙර පන්දුවට පහර දීමට පැමිණි නායක දසුන් ශානක ට ලබා ගත හැකිවුනේ එක් ලකුණක් පමණයි.
පවන් රත්නායක පන්දු 22කින් ලකුණු 40ක සුවිශේෂ පිතිහරඹයක යෙදුනා. දඟ පන්දුව හමුවේ ශ්‍රී ලංකාවේ අසීරුතාවන් පළමු තරගයේදී පැහැදිලිව පෙනුන ද, රත්නායක ඉතාමත් දක්ෂ අයුරින් මේ දුර්වලතාවට ප්‍රවේශ වුණා.
“අපි පන්දුවට පහර දුන් ආකාරය ගැන සතුටුයි. පවන් රත්නායක අද චමත්කාරජනක අයුරින් ක්‍රීඩා කළා. අපි හොඳින් ඉනිම අවසන් කළා කියා මම හිතන්නේ නැහැ. නමුත් අපි අපේ පාඩම් ඉගෙන ගෙන තියෙනවා. අපි දිගටම සටන් කරනවා” යනුවෙන් නායක දසුන් ශානක කියා සිටියා.
එංගලන්තය දැනටමත් තරගමාලාව ජයග්‍රහණය කර තිබෙන බැවින් හෙට (3) පල්ලෙකැලේදී පැවැත්වෙන තෙවැනි ජාත්‍යන්තර විස්සයි20 තරගය වැදගත් වන්නේ වාර්තා පොතට පමණයි.
(සටහන : වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
