සම්ප්රේෂණ පද්ධතියේ ධාරිතාව 220 kV සිට 580 kV දක්වා ඉහළ නංවා අලුතින් කැබිනට් අනුමැතිය ලබාගැනීමට සූදානමක්
"වසර කිහිපයක් තිස්සේ සැලසුම් කළ ව්යාපෘතියේ විෂය පථය අන්තිම මොහොතේ වෙනස් කිරීම නිසා පුනර්ජනනීය බලශක්ති සංවර්ධනය තවත් ප්රමුඛ ලෙස ප්රමාද වනවා" - විදුලි ඉංජිනේරුවන්
ඉන්දියාවේ සහාය ඇතිව ත්රිකුණාමලය කලාපයේ ක්රියාත්මක කිරීමට සැලසුම් කර ඇති සාම්පූර් - කප්පල්තුරෙයි සම්ප්රේෂණ යටිතල පහසුකම් ව්යාපෘතියේ (Sampur-Kappalthurai Transmission Infrastructure Project) සම්ප්රේෂණ ධාරිතාව වත්මන් අදියරේදී වෙනස් කිරීමට බලධාරීන් ගෙන ඇති තීරණය විදුලි ඉංජිනේරුවන්ගේ දැඩි ප්රශ්න කිරීමට ලක්ව තිබේ. මෙම හදිසි වෙනස් කිරීම හේතුවෙන් මෙරට පුනර්ජනනීය බලශක්ති ක්ෂේත්රයේ ප්රගතිය ප්රමාද වීමේ සහ විදේශීය ආයෝජකයන්ගේ විශ්වාසය බිඳවැටීමේ දැඩි අවදානමක් පවතින බව ඔවුහු අනතුරු අඟවති.
ජාතික සම්ප්රේෂණ ජාල සේවා සපයන්නාගේ (NTNSP) සභාපති නුසිත් කුමාරතුංග සනාථ කර ඇත්තේ, යෝජිත සම්ප්රේෂණ පද්ධතියේ ධාරිතාව කිලෝවෝල්ට් 220 (kV) සිට කිලෝවෝල්ට් 580 (kV) දක්වා ඉහළ නැංවීමට පියවර ගෙන ඇති බවයි. මේ හේතුවෙන් සංශෝධිත ප්රසම්පාදන ක්රියාවලිය (Procurement Process) සමඟ ඉදිරියට යාමට පෙර රජයෙන් නව කැබිනට් අනුමැතියක් ලබාගැනීමට කටයුතු කරමින් සිටින බව ද ඔහු පවසා තිබේ.
ධාරිතා සංශෝධනය සහ ඉංජිනේරුවන්ගේ තර්කය
නැඟෙනහිර පළාතෙන් ජාතික පද්ධතියට එක් කිරීමට අපේක්ෂිත අතිරේක පුනර්ජනනීය බලශක්ති උත්පාදනය සහ අනාගත විදුලි ඉල්ලුම සපුරාලීම සඳහා මෙම වෙනස්කම් සිදුකිරීම අත්යවශ්ය බව NTNSP ආයතනය ප්රකාශ කරයි. කෙසේ වෙතත්, අදාළ ක්ෂේත්රයේ ප්රවීණ ඉංජිනේරුවන් එම තර්කය ප්රතික්ෂේප කරන්නේ, මෙම සම්ප්රේෂණ රැහැන මුල සිටම සැලසුම් කර ඇත්තේ අනාගත ව්යාප්ත කිරීම් ද සැලකිල්ලට ගනිමින් බව පෙන්වා දෙමිනි.
ඔවුන් පෙන්වා දෙන්නේ වසර කිහිපයක් තිස්සේ සිදුකළ පුළුල් සැලසුම්කරණයකින් පසුව මෙගාවොට් 600ක පමණ ධාරිතාවක් රැගෙන යාමට හැකිවන පරිදි මෙම යටිතල පහසුකම් නිර්මාණය කර තිබියදී, එය දැනට පවතින අවශ්යතාවලට ප්රමාණවත් නොවන බව බලධාරීන් පවසන්නේ කුමන පදනමකින්ද යන්න ගැටලුසහගත බවයි.
සාම්පූර් සූර්ය බලශක්ති ව්යාපෘතියේ පසුබිම
ඉංජිනේරුවන්ට අනුව, මුලින් යෝජිතව තිබූ සාම්පූර් ගල්අඟුරු බලාගාර ව්යාපෘතිය අවලංගු කිරීමෙන් පසුව, එම භූමිය ශ්රී ලංකා සහ ඉන්දීය රජයන්ගේ ඒකාබද්ධ මැදිහත්වීමෙන් මෙගාවොට් 120ක සූර්ය බලශක්ති ව්යාපෘතියක් (Solar Power Project) සඳහා වෙන් කර තිබුණි. එහෙත් පසුව සැලසුම්කරණ ක්රියාවලියේදී එහි ධාරිතාව මෙගාවොට් 50 දක්වා අඩු කර ඇති අතර, එය සංවර්ධනය සඳහා වෙන්කළ භූමිය අකාර්යක්ෂම ලෙස පරිහරණය කිරීමක් බවට ද ඔවුහු චෝදනා කරති.
ත්රිකුණාමලය කලාපය ජාතික විදුලි බල පද්ධතිය සමඟ සම්බන්ධ කරන ප්රධානතම මධ්යස්ථානය වන්නේ කප්පල්තුරෙයි උපපොළයි (Kappalthurai Grid Substation). මෙය කිලිනොච්චිය, කප්පල්තුරෙයි සහ හබරණ යා කෙරෙන 400 kV සම්ප්රේෂණ සබඳතා ඇතුළු පුළුල් ජාල ව්යාප්ති වැඩසටහනක තීරණාත්මක කොටසක් වන බැවින්, මෙම ප්රමාදය සමස්ත පද්ධතියටම බලපානු ඇත.
අරමුදල් සහ ප්රසම්පාදන ප්රමාදයන්
මෙම සම්ප්රේෂණ යටිතල පහසුකම් සංවර්ධනය සඳහා ආසියානු යටිතල පහසුකම් ආයෝජන බැංකුව (AIIB) විසින් සහනදායී මූල්ය පහසුකම් සැපයීමට සූදානමින් සිටින බව ද ඉංජිනේරුවෝ සඳහන් කරති. ව්යාපෘතියේ සම්ප්රේෂණ රැහැන් සඳහා වන ටෙන්ඩර් කැඳවීම් දැනටමත් සිදුකර අවසන්ව තිබුණ ද, අනාගත සූර්ය බලශක්ති උත්පාදනය අවශෝෂණය කර ගැනීමට මෙම පද්ධතිය ප්රමාණවත් නොවන බව පවසමින් බලධාරීන් මූල්ය ලංසු (Financial Bids) විවෘත කිරීම හිතාමතාම ප්රමාද කර ඇති බවට ද තොරතුරු අනාවරණය වේ.
වත්මන් අදියරේදී ධාරිතාව වෙනස් කිරීමට යාමෙන් ප්රසම්පාදන ක්රියාවලියේ ඇතැම් කොටස් නැවත මුල සිට ආරම්භ කිරීමට සිදුවන බවත්, එමඟින් ජාතික සැලසුම්වලට අනුව පුනර්ජනනීය බලශක්ති ව්යාපෘති පද්ධතියට එක් කිරීමට නොහැකි වී ඉදිරියේදී සමස්ත විදුලි සැපයුමට බාධා එල්ල විය හැකි බවත් ඉංජිනේරුවෝ වැඩිදුරටත් අනතුරු අඟවති.
(සටහන | සම්පත් ධීරසේකර )
මුලාශ්රය :
Engineers Challenge Revised Scope behind Sampur Transmission Project Delay
