2007–08 අර්බුදය සහ එයට හේතු ඊට දෙවසරකට පෙර පුරෝකථනය කිරීම නිසා රඝුරාම් රාජන් ප්රසිද්ධියට පත්වීය. “ලෝකය පුරා නිවාස මිල මට්ටම් ඉහළ මට්ටමක පවතියි.
අපගේ රඝුරාම් රාජන් කවුද? මම හැම විට ම සඳහන් කරන්නේ ඉන්ද්රජිත් කුමාරස්වාමිගේ පරිස්සම් සහගත වචන සහ නිතර නිතර පුනරුච්චාරණය කරන ලද අනතුරු ඇඟවීම් ය. නමුත් ඔහු තනිවම නොසිටි අතර, මහ බැංකු අධිපතිවරුන්ට භාවිතා කළ නොහැකි බංකොලොත්භාවය වැනි යෙදුම් භාවිතා නොකළේය. එවකට මුදල් ඇමතිව සිටි මංගල සමරවීර මහතා ගෝඨාභය රාජපක්ෂගේ මැතිවරණ ප්රතිපත්ති ප්රකාශනයට ප්රතිචාර දැක්වීමේ දී ඊට වඩා බොහෝ සේ වර්ණවත් විය. ඔහු මාධ්ය හමුවක් කැඳවු අතර 2019 ඔක්තෝබර් මාසයේ දී මෙම අමතක නොවන ට්වීටර් පණිවිඩය නිකුත් කළේය.
''ගෝඨාගේ බදු සැලසුම මගින් ශ්රී ලංකාව බංකොලොත්භාවය, ණය ගෙවීම පැහැර හැරීම සහ ග්රීක වර්ගයේ ණය අර්බුදයක් කරා යන සීඝ්රගාමී දුම්රියකට පටවනු ඇත. වැට් වෙනස්කම් පමණක් සෞඛ්ය ,ආරක්ෂක, හෝ විශ්රාම වැටුප් සඳහා කරන වියදමට සමාන ය. ‘ව්යාපාරික ප්රජාව’ නමින් යෝජනා ඉදිරිපත් කරන PR සමාගමක උපදෙස් නිසැකවම ශ්රී ලංකාවට අවශ්ය නොවේ.''
පුරෝකථනය කළ ආකාරයට ම පැමිණි අර්බුදයෙන් ගොඩ යාමේ සහ එවැන්නක් නැවත ඇති නොවීමේ පියවර ගන්නා සන්දර්භයක, මුදල් ඇමතිවරයකු ලෙස මංගලගේ කාර්ය සාධනය ගැන ආපසු හැරී බැලීම ඉහත පුරෝකථනය පමණක් ම සාධාරණීකරණය කරයි.
මුල්ය හිඟය
IMF යන කෙටි යෙදුමට විකල්ප තේරුමක් ඇති බව සමහරු කියති. එනම් “It’s Mostly Fiscal,” නොහොත් “එය බොහෝදුරට මුල්යමය වේ” යන්න යි. මුල්ය හිඟය බරපතළ ප්රශ්නයක් ලෙස සැලකිල්ලට ගත්, ඒ ගැන ක්රියාත්මක වූ සහ එම පිළියම් හේතුවෙන් දෝෂාරෝපණයට භාජනය වූ ශ්රී ලාංකිකයින් කිහිප දෙනා අතර මංගල ද වෙයි.
මුල්ය හිගය අඩු කිරීමට ක්රම දෙකක් ඇත. එනම් ආදායම් වැඩි කිරීම සහ වියදම් අඩු කිරීම යි. නැතහොත් ඉතා ම හොඳ දේ මේ දෙක ම එක විට කිරීම යි.
රජයට ආදායම් ලැබෙන මාර්ග හතරක් ඇත: එනම්, බදු; බදු නොවන ආදායම් (ගමන් බලපත්ර, වනජීවී අභයභූමි නැරඹීමේ ගාස්තු වැනි විවිධ සේවා සඳහා ගාස්තු), ප්රදාන, සහ ණය වශයෙනි. ප්රදාන ලැබෙන්නේ සුළුවෙන් සහ කලාතුරකිනි. 2022 වසරේ දී රජයට ප්රදාන ලෙස ලැබුණු සම්පුර්ණ මුදල රුපියල් බිලියන 10 කි. එය එම වසරේ සමස්ත ආදායමෙන් සියයට 0.48 කි. 2022 වසර මැද ගාස්තු බොහොමයක් වැඩි කළ පසුව ද, බදු නොවන ආදායම් ලැබී ඇත්තේ රුපියල් බිලියන 232 කි. එය මුළු ආදායමෙන් සියයට 12.5 ක් පමණකි. එබැවින් වඩාත් වැදගත් වන්නේ බදු ආදායම යි.
වියදම් පැත්ත බැලු විට රජය බොහෝ දේ සඳහා වියදම් කරයි. එහෙත්, නොගෙවා සිටියහොත් අගතියට හේතු විය හැකි වැටුප් හා විශ්රාම වැටුප් යන විශාලතම වියදම් ගැන අවධානය යොමු කළ විට, රජයේ රෝහල්වලට අරමුදල් සැපයීම, සුබසාධන ප්රතිලාභ වැනි වෙනත් දේ සඳහා කොපමණ මුදලක් ඉතිරිවේද යන්න පිළිබඳව අපට අවබෝධයක් ලබා ගත හැකිය. අවශ්ය තරම් මුදල් නොමැති නම් රජයට සිදුවන්නේ ණය ගැනීමට ය. අප දැන් දන්නා පරිදි, අධික ලෙස ණය ගත් විට, වේගවත් උද්ධමනයක් සහ ඉන්පසු බංකොලොත් බව වැනි නරක ප්රතිවිපාක ඇතිවෙයි.
වගුව 1 : සම්පුර්ණ බදු ආදායමට සාපේක්ෂව වැටුප් සහ විශ්රාම වැටුප් , 2014 – 2021
2015 දී සියයට 26 ක පිම්මක්, 2020 දී සියයට 15 ක සහ 2019 දී සියයට 11 වැඩි වීම් හැරුණු විට, වැටුප් සහ විශ්රාම වැටුප් සඳහා වියදම දිගට ම වැඩි වී ඇත්තේ තනි ඉලක්කමකිනි. විශාල වැඩිවීම් සිදුව ඇත්තේ ජනාධිපතිවරණයක්, සහ ඉන් පසුව මහ මැතිවරණයක් පැවති වර්ෂවල දී ය. එබඳු වර්ෂවල දී ජනාධිපති තනතුර දිනු පක්ෂය මහ මැතිවරණයේ දී ඡන්ද මිල දී ගැනීම සඳහා මහජන මුදල් බෙදා දෙයි. උදාහරණයක් ලෙස 2015 දී, රජයේ සේවකයින් සියලු දෙනාට මසකට රුපියල් 10,000 ක දීමනාවක් ලබා දුන් අතර මහපොළ ගෙවීම්ද වැඩි කළේය.
ඔහුට ප්රශංසාව හිමි විය යුතු වන්නේ 2017-19 වසරවල බදු ආදායම ඉහල දැමීම සම්බන්ධයෙනි. වත්මන් රජය මෙන්ම මංගල ද ආදායම් මත පදනම් වූ රාජ්ය මූල්ය ඒකාග්රතාවක් හරහා ප්රාථමික ගිණුමේ අතිරික්තයක් ලබා ගැනීමට උත්සාහ කළේය. 2017-19 කාලයේ පැවති ආණ්ඩුවේ අභ්යන්තර ගතිකත්වය වෙනත් දේකට ඉඩ දුන්නේ නැත. නමුත් ජාත්යන්තර මූල්ය අරමුදලේ වැඩසටහනේ දී ලබා දී ඇති සියයට 2.3 ක මූලික අතිරික්ත ඉලක්කය ආසන්නයට ඔහු පැමිණියේ නැත. පහත සඳහන් කොට ඇති උපුටා දැක්වීම්වල, ජාත්යන්තර මුල්ය අරමුදල මංගලගේ දෙවසරක අතිරික්ත ගැන කතා කරයි.
ඓතිහාසික වශයෙන්, ශ්රී ලංකාව ප්රාථමික ගිණුමේ අතිරික්තයක් ලබාගෙන ඇත්තේ අවස්ථා තුනකදී පමණක් වන අතර, කිසිදා එය වසර දෙකකට වඩා වැඩි කාලයක් නොතිබුණි. එමෙන් ම, ජාත්යන්තර මුල්ය අරමුදලේ අනුග්රහය ලත්, ශ්රී ලංකාවේ පසුගිය වැඩසටහන්වල, මූල්ය ඒකාග්රතා ප්රයත්නයන්, වැඩසටහන අවසන් වීමෙන් පසු ඉක්මනින් ආපසු හරවනු ලැබීය. සැලසුමේ ඇති මුල්ය ගැලපුම්වල විශාලත්වය ශ්රී ලංකාවේ පෙර නොවු විරූ මට්ටමක වුවත්, මීට පෙර කළ මුල්ය ප්රතිසංස්කරණ අහෝසි කිරීමෙන් පසු, දළ දේශීය නිෂ්පාදිතයේ ප්රතිශතයක් ලෙස ලෝකයේ අඩුම ආදායමකින් ආරම්භ කරන බැවින් එය අවශ්ය වෙයි. නිදසුනක් වශයෙන්, 2022 දී ඉහළ උද්ධමනය මධ්යයේ රාජ්ය අංශයේ වැටුප් සහ රාජ්ය විශ්රාම වැටුප් සඳහා විශාල සැබෑ කප්පාදුවක් කිරීම වත්මන් සහ විශ්රාමික සිවිල් සේවකයින්ගෙන් වැඩසටහනට එරෙහිව විරෝධයක් ඇති කළ හැකිව තිබිණි.
2019 වියත් මග බදු කප්පාදුවෙන් උත්සන්න වූ සහ රෝගියා දැඩි සත්කාර ඒකකයට යැවීමට පාදක වූ රෝගය බොහෝ ය දැන සිටි එකකි. එනම්, නිදහසින් පසු ශ්රී ලංකාව දිගට ම මුහුණ දුන් ද්විත්ව හිඟයයි. ඉහත සාකච්ඡා කල පරිදි මංගල පිළියම් කරන්නට වැර දැරුවේ මුල්ය හිඟයට යි. දෙවන හිඟය නම්, වර්ෂයක් පාසා අප විසින් අපනයනය කරනු ලබන ප්රමාණයට වඩා වැඩියෙන් ආනයනය කිරීම නිසා ඇතිවන ජංගම ගිණුමේ හිඟය යි. බොහෝ දෙනා කතා කරන්නේ භාණ්ඩ අපනයනය සහ ආනයනය සම්බන්ධයෙන් පමණක් වුව ද, 2 වගුවෙන් පෙන්නුම් කරන පරිදි අප භාණ්ඩ සහ සේවා යන දෙක ම ගැන කතා කළ යුතු ය.
වගුව 2 : භාණ්ඩ සහ සේවා ආනයනය සහ අපනයනය, 2019 -2021
අවිවාදයෙන්, අප අපනයන වැඩි කරගත යුතුය. භාණ්ඩ පමණක් නොව සේවා අපනයනය ද වැඩි කරගත යුතු ය. අපගේ භාණ්ඩ අපනයනය විවිධාංගිකරණය වී නැති සහ ඉහළ වටිනාකමක් නැති එකක් වන අතර ඒවා යන්නේ රටවල් සුළු ගණනක් වෙතට ය.
වගුව 3 : වර්ගය අනුව ශ්රී ලංකාවේ අපනයන, 2022
මුදල් ඇමතිවරයා ලෙස මංගලට භාණ්ඩ අපනයනය වර්ධනය සඳහා විශාල බලපෑමක් කිරීමට හැකියාවක් තිබෙන්නට ඉඩක් නැත. ජී එස් පී ප්ලස් නැවත ලබාගැනීම විශාල ජයග්රහණයක් වුව ද, එය සිදුකරන ලද්දේ විදේශ කටයුතු ඇමතිවරයා වශයෙනි. සේවා පැත්තේ දී, ‘එන්ටර්ප්රයිස් ශ්රී ලංකා’ මගින් වයින් සහ බියර් බලපත්ර නිකුත් කිරීමට පහසුකම් සැලසීම වැනි ක්රියාමාර්ග මගින් කුඩා පරිමාණයේ සංචාරක සේවා සපයන්නන්ට උපකාර කිරීමට ඔහු උත්සාහ කළේය. අපනයන ප්රවර්ධනයේ ප්රධාන වගකීම පවරා ඇත්තේ අපනයන සංවර්ධන මණ්ඩලය වෙත වන අතර එය තිබුණේ මුදල් අමාත්යාංශය යටතේ නොවේ. අපනයනකරුවන්ගේ මග පෙන්වීම යටතේ ජාතික අපනයන ප්රතිපත්තිය ක්රියාත්මක කරන්නේ එම මණ්ඩලයයි. ශ්රී ලංකාවේ සමාගම්වලට ගෝලීය නිෂ්පාදන ජාලවලට සහභාගී වීමට බාධා කරන පැරා තීරුබදු ඔහුට ක්රමානුකූලව ඉවත් කළ හැකිව තිබිණි. 2023 අයවැය කතාවේ දී මෙය නැවත වරක් නිවේදනය කරනු ලැබීමෙන් ගම්ය වන්නේ එම කාර්යය අතපසුවූ බවයි.
අර්බුදයෙන් ගොඩ යාම සඳහා සහ එය නැවත ඇතිවීම වැලැක්වීම සඳහා, මුල්ය හිඟය තුරන් කිරීම අවශ්ය කොන්දේසියකි. නමුත් එය ප්රමාණවත් නැත. ඒ සඳහා දේශීය සහ විදේශීය තරගයට ආර්ථිකය විවෘත කිරීම මගින් ආර්ථිකය වඩාත් කාර්යක්ෂම කිරීමට සමස්ත ආණ්ඩුවේ ප්රවේශයක් අවශ්ය වෙයි. ආරක්ෂණවාදී බාධක ඉවත්කිරීම, ව්යාපාර කිරීමේ පහසුව වර්ධනය කිරීම, විදේශීය ආයෝජකයින් සමග හවුල්කාරීත්වය මගින් සහ වෙළෙඳ ගිවිසුම් මගින් වෙළෙඳපොළ ප්රවේශයන් ලබා ගැනීමට ව්යවසායන්ට ආධාර කිරීම ආදිය මේ සඳහා වූ පියවර සමහරකි.
මැතිවරණ දේශපාලනයට පිටතින්
තරමක් අසාමාන්ය පුරෝකථන හැකියාවක් තිබියා වුව ද, මංගල දෙවියකු නොවීය. “මංගල සිටියා නම් ඔහු කුමක් කරයිද” කියා ඇසීමට හේතුවක් නැත. කැබිනට් මණ්ඩලයේ සේවය කළ හැක්කේ පාර්ලිමේන්තු මන්ත්රීවරුන්ට පමණකි. එබැවින් ඔහුට සේවය කළ හැකිව තිබුණේ කුමන තනතුරකද වැනි දේ ගැන අනුමාන කිරීමේ වටිනාකමක් නැත. දැන් අවශ්යව ඇත්තේ අලුත් මාදිලියක දේශපාලනයක් ය යන ඔහුගේ ස්ථාවරයට එය ප්රතිවිරුද්ධය.
ජාත්යන්තර මුල්ය අරමුදලේ වැඩ සටහනේ ඇතුළත් සහ ඉන් එහාට ගිය ප්රතිකර්ම ක්රියාමාර්ග වන්නේ, පෙර යෝජනා කළ අවස්ථාවලදී පරාජයට පත් වූ ඒවා ය. 2002-04 කාලයේ රජයේ රැකියා සඳහා බඳවා ගැනීම නවතා තිබු අතර දායකත්වයක් නොමැති විශ්රාම වැටුප් අවසන් කිරීමට උත්සහයක් වී ය. ඉන් පසු පැවති මැතිවරණයෙන් එම ආණ්ඩුව පරාජයට පත් වී ය. රජයට අයත් ව්යාපාර ප්රතිව්යුහගත කිරීමේ සහ වෙළෙඳ ගිවිසුම්වලට ඇතුළත් වීමේ උත්සාහයන් නැවත නැවත අසාර්ථක වී ය. එසේ වුව ද, දැන් ඒවා සිදුවෙමින් පවතියි. කම්කරු නීතිවල බරපතළ ප්රතිසංස්කරණ සඳහා කිසි විටෙක උත්සහ නොදැරීය. එසේ වුව ද, ඒවා පවා දැන් න්යාය පත්රයේ ඇත.
අනුග්රාහක-සේවාදායක සංස්කෘතිය සහ වසර ගණනාවක් තිස්සේ ව්යාජ දේශප්රේමයක් ඇති කිරීමට කරන ලද ප්රචාරණ, ප්රතිසංස්කරණ අඩාල කිරීමට ඒකාබද්ධ වී ක්රියාත්මක වී ය. නමුත් මේ වන විට, තම වරප්රසාද ආරක්ෂා කර ගැනීම සඳහා සටන් කරන වෘත්තීය සමිතිවලට මහජන සහයෝගය නොමැති වීමෙන් පෙන්නුම් කරන පරිදි, තත්ත්වයන් වෙනස් වී ඇත. රජය තුළ සිටින අය ඵලදායී ලෙස ප්රතිසංස්කරණ ක්රියාත්මක කිරීම, ආණ්ඩුවෙන් පිටත සිටින අයගේ සම්බන්ධීකරණය සහ ප්රබල සන්නිවේදනය සමග සම්බන්ධ කරන්නේ නම්, ප්රතිසංස්කරණ සාර්ථක වීමට ඉඩක් තිබිය හැකි ය. අලුත් මාදිලියක දේශපාලනයක් පිළිබඳ මංගලගේ දැක්මෙන් ගම්ය වන ක්රියා මාර්ගය මෙය බව පෙනෙන්නට තිබේ.
(මහාචාර්ය රොහාන් සමරජීව)
දේශපාලන හා සමාජ ක්රියාකාරික