කතානායක මහින්ද යාපා අබේවර්ධනට එරෙහි විශ්වාසභංග යෝජනාව පිළිබඳ පාර්ලිමේන්තු විවාදය අඟහරුවාදා (මාර්තු 19) ආරම්භ විය.
ඒ, නියෝජ්ය කතානායක අජිත් රාජපක්ෂගේ ප්රධානත්වයෙනි.
මාර්ගගත ආරක්ෂණ කෙටුම්පත සහ පොලිස්පතිවරයා පත්කිරීමේදී කතානායකවරයා පක්ෂපාතී ආකාරයට කටයුතු කළ බවට චෝදනා කරමින් මෙම විශ්වාසභංග යෝජනාව පාර්ලිමේන්තුවට ඉදිරිපත් කරනු ලැබුවේ, සමගි ජන බලවේගය විසිනි.
විවාදයට දවස් තුනක්
මෙම විශ්වාසභංග යෝජනාව විවාදයට ගැනීම මාර්තු 14 වන දා දින නියම කරනු ලැබුවේ ද, කතානායකවරයාගේ ප්රධානත්වයෙන් පැවති පාර්ලිමේන්තු කටයුතු පිළිබඳ කාරක සභාවේදී ම ය.
මේ අනුව, මාර්තු 19 වන අඟහරුවාදා පෙ.ව. 9.30 සිට ප.ව. 5.30 දක්වා ද, 20 වන බදාදා පෙ.ව. 9.30 සිට ප.ව. 4.30 දක්වා ද විවාදය පැවැත්වීමට නියමිතව තිබිණි.
විවාදයේ දෙවන දිනය වන 20 වන බදාදා ප.ව 4.30ට පමණ විශ්වාසභංග යෝජනාවට අදාළ ඡන්ද විමසීම පැවත්වීමට තීරණය කර තිබුණ ද, අද දිනයේ එහි යම් වෙනසක් සිදුවිය.
අද පැවති පාර්ලිමේන්තු කටයුතු පිළිබඳ කාරක සභාවේදී තීරණය කළේ, විශ්වාසභංග යෝජනාව පිළිබඳ විවාදය 21 වන බ්රහස්පතින්දා දිනයේදීත් පැවැත්වීමට ය.
ඒ අනුව, ඡන්ද විමසීම 21 වන දා පස්වරු 4.30ට සිදු කෙරෙනු ඇත.
වත්මන් කතානායක මහින්ද යාපා අබේවර්ධනට එරෙහිව විවාදයට ගැනෙන විශ්වාසභංග යෝජනාව, ශ්රී ලංකා පාර්ලිමේන්තුවේ කතානායකවරයෙකුට එරෙහිව ඉදිරිපත් වූ පස් වන විශ්වාසභංග යෝජනාව වේ.
ශ්රී ලංකාවේ කතානායකවරුන්ට එරෙහිව ගෙනා විශ්වාසභංග
වත්මන් කතානායක මහින්ද යාපා අබේවර්ධනට එරෙහිව විවාදයට ගැනෙන විශ්වාසභංග යෝජනාව, ශ්රී ලංකා පාර්ලිමේන්තුවේ කතානායකවරයෙකුට එරෙහිව ඉදිරිපත් වූ පස් වන විශ්වාසභංග යෝජනාව වේ.
මීට පෙර, කතානායකවරයෙකුට එරෙහිව අවස්ථා 4කදී ඉදිරිපත් වූ විශ්වාසභංග යෝජනා කිසිවක් ජයග්රහණය කර නැතැයි ශ්රී ලංකා පාර්ලිමේන්තුවේ, සන්නිවේදන දෙපාර්තමේන්තුවේ වැඩබලන අධ්යක්ෂ එච්.ඊ. ජනකාන්ත සිල්වා BBC සිංහල සේවයට පැවසීය.
ඔහු ප්රකාශ කළේ, "කථානායකවරුන් හතර දෙනෙකුට එරෙහිව විශ්වාසභංග යෝජනා පහක් අද වන විට ඉදිරිපත් වෙලා තියෙනවා. ඉන් විශ්වාසභංග දෙකකට මුහුණ දෙන්න එම්. එච්. මොහොමඩ් කතානායකතුමාට සිද්ධ වුණා. නමුත් එකක්වත් ජයග්රහණය කරලා නෑ," යනුවෙනි.
ශ්රී ලංකාවේ පාර්ලිමේන්තු ඉතිහාසයේ කතානායකවරයෙකුට එරෙහිව පළමු වරට විශ්වාසභංග යෝජනාවක් ඉදිරිපත් වූයේ, 1963 වර්ෂයේදී ය.
ඒ, එවකට කතානායකවරයා වශයෙන් කටයුතු කළ ආර්.එස්. පැල්පොළට එරෙහිව ය.
එම විශ්වාසභංග යෝජනාව ඇතුළු සෙසු විශ්වාසභංග යෝජනාවල තොරතුරු මෙසේ ය.
#1963 - ආර්.එස්. පැල්පොළට එරෙහිව - අපක්ෂපාතිව කටයුතු නොකළ බවට ජේ.ආර්. ජයවර්ධන ප්රමුඛ විපක්ෂයේ මූලිකත්වයෙන් යෝජනාව ඉදිරිපත් කරන ලදී. ආර්.එස්. පැල්පොළ යනු නාවලපිටියෙන් ශ්රී ලංකා නිදහස් පක්ෂය නියෝජනය කරමින් පාර්ලිමේන්තුවට තේරීපත්වූ අයෙක් විය.
#1980 - එම්.ඒ. බාකීර් මාකාර් - ආචාර්ය ආනන්ද තිස්ස ද අල්විස්ගේ ඉල්ලා අස්වීමෙන් පසු බාකීර් මාකර් කතානායකවරයා වශයෙන් පත්කරන ලදී. බේරුවල ආසනයෙන් එක්සත් ජාතික පක්ෂය නියෝජනය කරමින් ඔහු පාර්ලිමේන්තු වරම් හිමි කර ගත්තේ ය. 1983 අගෝස්තු මාසයේදී ඔහු කතානායක ධූරයෙන් ඉල්ලා අස් විය.
#1991 - එම්.එච්. මොහොමඩ් - හිටපු ජනාධිපති රණසිංහ ප්රේමදාසට එරෙහිව දෝෂාභියෝගයක් ඉදිරිපත් වූ අවස්ථාවේදී පක්ෂග්රාහීව කටයුතු කළ බවට චෝදනා කරමින් ඔහුට එරෙහිව විශ්වාසභංග යෝජනාවක් ඉදිරිපත් කරන ලදී. කොළඹ දිස්ත්රික්කයෙන් පාර්ලිමේන්තුවට තේරීපත් වූ ඔහු 1989 වසරේ 1994 වසර දක්වා කතානායක ධූරය දැරීය.
#1992 - එම්.එච්. මොහොමඩ් - කලබලකාරී අවස්ථාවක න්යාය පත්රයේ තිබූ අයිතම 17ක් එක දිගට අනුමත කිරීමට එරෙහිව විපක්ෂය විසින් ඔහුට එරෙහිව විශ්වාසභංග යෝජනාවක් ඉදිරිපත් කරන ලදී.
#2024 - මහින්ද යාපා අබේවර්ධන - මාර්ගගත ආරක්ෂණ කෙටුම්පත සහ පොලිස්පතිවරයා පත්කිරීමේදී පක්ෂපාතී ආකාරයට කටයුතු කළ බවට චෝදනා කරමින් සමගි ජන බලවේගය විශ්වාසභංග යෝජනාවක් ඉදිරිපත් කළේ ය.
ඒ අනුව, ශ්රී ලංකාවේ කතානායකවරයෙකුට එරෙහිව විශ්වාසභංග යෝජනාවක් ඉදිරිපත් වී ඇත්තේ, වසර 32කට පසුව ය.
ශ්රී ලංකා පාර්ලිමේන්තුවේ විශ්වාසභංග යෝජනා සංඛ්යා දත්ත
ශ්රී ලංකා පාර්ලිමේන්තුවේ මේ වන විට විවාදයට ගැනෙන කතානායකවරයාට එරෙහි විශ්වාසභංග යෝජනාව පාර්ලිමේන්තු ඉතිහාසයේ 50 වන විශ්වාසභංග යෝජනාව ලෙස ඉතිහාසයට එක් වෙයි.
මීට පෙර, විශ්වාසභංග යෝජනා 49ක් පාර්ලිමේන්තුවට ඉදිරිපත් වී තිබේ.
ඒ අතරින්, 27ක් ආණ්ඩුවකට එරෙහිව ඉදිරිපත් වූ විශ්වාසභංග යෝජනා වේ. අගමැතිවරුන්ට එරෙහිව විශ්වාසභංග යෝජනා 4ක් ඉදිරිපත්ව ඇති අතර, ඇමතිවරුන්ට එරෙහිව විශ්වාසභංග යෝජනා 14ක් ඉදිරිපත්ව තිබේ.
ශ්රී ලංකාවේ කතානායකවරුන්ට එරෙහිව විශ්වාසභංග යෝජනාවක් ඉදිරිපත්ව ඇත්තේ, 5 වන වරට ය.