මංගල: වැඩවසම් රටක ලිබරල්වාදියෙකුගේ ඉරණම -චන්ද්‍රරත්න බණ්ඩාර

 

සුනිල්  පෙරේරාගේ වියෝවට සතියක විරාමයක් තබා මංගල සමරවීර මහතා කල් ඇතුවම මියගියේය.

 

මංගලගේ වියෝවීම දේශපාලනයේ දුර්ලභ උපතක් අහිමි වීමකි. සුනිල් පෙරේරා ද ලාංකික සංස්කෘතියේ එවැනිම අහිමිවීමකි. 

 

එහෙත් දෙදෙනාම සිය ප්‍රධාන විෂය කේෂේත්‍රයන්ගෙන් අනෙකට බලපෑම් කළෝ ය. ඒ මංගල සංස්කෘතික ක්ෂේත්‍රයටත් සුනිල් දේශපාලන ක්ෂේත්‍රයටත් වශයෙනි.

 

මංගල වෘත්තීයවේදියෙකු ලෙස මෝස්තර නිරෑපණ ශිල්පියෙකු විය. මෝස්තර නිර්මාණ ශිල්ප විෂයයේ දී ඔක්ස්පර්ඩ් කේම්බ්‍රිජ් මට්ටමේ කීර්තියක් දිනා සිටි එංගලන්තයේ සෙන්ට්‍රල් මාටිනස් විශ්ව විද්‍යාලයෙනි මංගල මෝස්තර ශිල්පය උගත්තේ. 

 

එතැනදී ඉතාම සාර්ථකව ඔහුගේ ආත්මය දරා සිටි ලිබරල්වාදි සංස්කෘතික සත්වයා ජයග්‍රාහී විය. ඒ ඔහුගේ සේවාදායක ප්‍රජාව වූයේ ලිබරල් වටිනාකම් හි අගය මැනවින් දත් පිරිසකි. 

 

එහෙත් ඔහුට දේශපාලනයේ දී මුණ ගැසෙන්නේ එයාකාර සේවා දායකයින් පිරිසක් නොවේ. කප්පරක් වැඩවසම් මතවාදයන්ගෙන් පිරිණු මනස් සහිත පිරිසක් තමන්ගේම ක්‍රමයකට තනාගත් දේශපාලන විලාසයක සිරි අසිරි බලන්නට මංගලට සිදුවිය. 

 

බල දේශපාලනයේ දී චන්ද්‍රිකා කුමාරතුංග හා රනිල් වික්‍රමසිංහ හැරුනු කොට මංගලගේ නූතනත්ව අදහස් තේරුම් ගත හැකි කිසිවෙකු සිටියාදැයි සැක සිතේ.

 

ලංකාවේ බල දේශපාලනයේ ස්වරූපය නම් එය ගලා යන ආකාරයට අකමැති උදවිය පවා බැහැර නොවී එහිම ඇලී ගැලී සිටීමයි. ඇතමුන් ඒ නරා වලේම ගිලෙමින් බලයම රසයක් කොට ගනිමින් ජීවත් වෙති. සමහරු එය නිවරැදි කරන්නට යත්න දරමින් ම ඒ බලය භුක්ති විඳිති. 

 

මංගල අයත් වන්නේ දෙවැනි ගොනුවටය. එහෙයින් මංගලගේ හැසිරීමෙන් ලංකා සමාජයේ ලිබරල් හා නිදහස්කාමී චලනයන් සිදුවිය. අප ඔහුට ගරු කරන්නේ සීමා මායිම් තිබුණ නමුත් ඒ උත්සාහයටය.

 

 

 

 

 

 

 

 

 

 

 

---