ඩිජිටල් තාක්ෂණයේ සීඝ්‍ර පිම්ම හමුවේ සාම්ප්‍රදායික සාහිත්‍ය ලෝකය නොසිතූ පෙරළියකට ලක්වෙමින් තිබේ. මෙම දැවැන්ත විවාදයේ කේන්ද්‍රස්ථානය බවට පත්ව සිටින්නේ කෝරල් හාර්ට් (Coral Hart) නමැති හතළිස් වියැති දකුණු අප්‍රිකානු ලේඛිකාවයි.
තම සැබෑ නම සඟවා ආරූඪ නාමයකින් පෙනී සිටින ඇය, 2025 පෙබරවාරියේ සිට මේ දක්වා ගතවූ මාස 20 තුළ කෘත්‍රිම බුද්ධිය (AI) මඟින් නවකතා 370කට අධික සංඛ්‍යාවක් පාඨකයන් අතට පත්කර හමාරය.
මරණ තර්ජන මැද නැඟෙන නිර්භය හඬ
සමාජ මාධ්‍ය ඔස්සේ ඇයට එල්ල වන්නේ සුළුපටු විරෝධයක් නොවේ. "කලාව වනසන වංචාකාරියක" ලෙස හඳුන්වමින් දසදහස් ගණනින් එන වෛරී පණිවිඩ සහ මරණ තර්ජන හමුවේ වුවද ඇය පසුබට වන්නේ නැත.
"ලෝකයේ කතුවරුන් පිරිසක් විරුද්ධ වූ පමණින් මේ තාක්ෂණය ආපසු හරවන්න බැහැ. මේක තමයි අනාගතය. අපි දැන් මේ ගැන විවෘතව කතා කළ යුතුයි," ඇය ජාත්‍යන්තර මාධ්‍ය හමුවේ ප්‍රකාශ කරන්නීය.
තාක්ෂණික සංකලනය සහ නව කර්මාන්තයක්
වසර 14ක් ප්‍රකාශන ක්ෂේත්‍රයේ කටයුතු කර ඇති හාර්ට්, පොතක් ලිවීම සඳහා විවිධ කෘත්‍රිම බුද්ධි මෙවලම් සංකලනය කර ගනී. සංවාද ලිවීමට ChatGPT, කතාවේ ව්‍යුහය හැඩගැස්වීමට Claude මෙන්ම ඇතැම් උණුසුම් ජවනිකා සඳහා Grok මෙවලමද ඇය මාරුවෙන් මාරුවට භාවිත කරයි.
චරිත නිරූපණය සහ කතා තේමාව ඇය විසින් තීරණය කිරීමෙන් පසු පරිගණක පිටපත සැකසේ. පසුව එය අඛණ්ඩතාව පරීක්ෂා කෙරෙන අතර, අවසාන අදියරේදී මානව සෝදුපත් බලන්නෙකු ලවා පරීක්ෂා කරවීම ඇයගේ ක්‍රමයයි.
දැනටමත් ඇය ආරූඪ නාම 10කට වැඩි ගණනකින් පොත් පළකරයි. සිය ක්‍රමවේදය වෙනත් ලේඛකයන් සිය ගණනකට පුහුණු කර ඇති ඇය, AI ලේඛකයන් වෙනුවෙන්ම 'Authorythm' නමින් මෘදුකාංගයක් හඳුන්වා දීමටද සූදානම් වේ.
"AI කුණු" චෝදනාව සහ වෙළඳපොළ යථාර්ථය
සාහිත්‍ය ක්ෂේත්‍රය ඇයව විවේචනය කරන්නේ "AI කුණු" (AI slop) හෙවත් බාල ප්‍රමිතියේ අන්තර්ගතයන් වෙළඳපොළට මුදාහරින බවට චෝදනා කරමිනි. එහෙත් හාර්ට් ඒ සඳහා ගෙන එන්නේ වෙළඳපොළ සංඛ්‍යාලේඛන මත පදනම් වූ දැඩි තර්කයකි.
ඇයගේ එක් කෘතියක් Amazon හි වැඩියෙන්ම අලෙවි වන පොත් 100 අතරට පවා එක්ව තිබේ. ඩිජිටල්, මුද්‍රිත සහ ශ්‍රව්‍ය ආකෘතිවලින් පිටපත් මිලියනයකට වඩා අලෙවි කර ඇති අතර, 2026 වසර තුළ පමණක් උපයා ඇති ආදායම ඇමෙරිකානු ඩොලර් මිලියනය ඉක්මවයි.
"පාඨකයෝ කිසිවිටෙකත් තමන් අකමැති පොත් කියවන්නේ නැහැ, ඒවා ආපසු හරවා යවනවා. පොත් විකිණෙනවා කියන්නේ පාඨකයන් ඒවා වැළඳගෙන ඇති බවයි," ඇය පවසයි.
සාහිත්‍ය සදාචාරය පිළිබඳ අර්බුදය
මෙම සාකච්ඡාව වඩාත් තීරණාත්මක වන්නේ කෘත්‍රිම බුද්ධිය භාවිත කළ බවට තහවුරු වීම නිසා ප්‍රංශයේ කීර්තිමත් ගොන්කෝර්ට් (Goncourt) සම්මාන උළෙලේ නිර්දේශිත නාමලේඛනයෙන් තෙලිසන් ඔරෙලියන්ගේ නවකතාව ඉවත් කිරීමත් සමඟය.
හාර්ට් ඒ පිළිබඳව නගන්නේ සෘජු ප්‍රශ්නයකි:
"කෘතියකට AI ලේබලය ඇලවීමට පෙර විචාරකයන් එය අගය කළා නම්, දැන් ඔවුන් ඇත්තටම වෛර කරන්නේ නිර්මාණයටද, නැතිනම් AI තාක්ෂණයටද?"
මනුෂ්‍ය හැඟීම් සහ නිර්මාණශීලීත්වයේ පරම අයිතිය ලෙස සැලකුණු සාහිත්‍ය කලා ක්ෂේත්‍රය, කෘත්‍රිම බුද්ධියේ ආගමනයත් සමඟ කිසිදා නොසිතූ සදාචාරාත්මක මංසන්ධියකට පැමිණ ඇති බව මෙම සිදුවීම මනාව තහවුරු කරයි.
වැඩිදුර තොරතුරු ඇතුළත් විශ්වාසනීය මූලාශ්‍ර සබැඳියක්
The Straits Times - 370 books in 20 months: South African author defends her use of AI