ජොන්ස්ටන්ට එරෙහි දූෂණ නඩු 03ක සාක්ෂි එකවර විමසීම අරඹයි

රජයට පාඩු සිදු කළ බවට චෝදනා කර හිටපු වෙළෙඳ ඇමැති ජොන්ස්ටන් ප්‍රනාන්දු ඇතුළු විත්තිකරුවන් තිදෙනකුට එරෙහිව පවරා ඇති දූෂණ නඩු තුනක සාක්ෂි එකවර විමසීම ඊයේ (12) කොළඹ මහාධිකරණ විනිසුරු මොහොමඩ් මිහායිල් ඉදිරියේ සිදු විය.

නඩුවේ සෙසු විත්තිකරුවන් වන්නේ, සතොස හිටපු සභාපති එරාජ් ප්‍රනාන්දු සහ හිටපු අධ්‍යක්ෂ මොහොමඩ් සාකීර් යන අයයි.

ඊයේ නඩුව කැඳවූ අවස්ථාවේ වරෙන්තු නියමව සිටි පැමිණිල්ලේ 12 වැනි සාක්ෂිකරු වන එස්.පී. ජෝතිපාල යන අය අධිකරණයට භාර වී තිබේ. නීතිඥ ලක්ෂාන් ප්‍රනාන්දු සාක්ෂිකරු පසුගිය නඩු දින රෝගීව සිටි බව දැක්වෙන වෛද්‍ය වාර්තාවක් අධිකරණයට ඉදිරිපත් කර ඇත. ඒ අනුව වරෙන්තු ආපසු කැඳවා තිබේ.

අනතුරුව නඩුවේ 19 වැනි සාක්ෂිකරු වන හිටපු හමුදා කෝප්‍රල්වරයකු වන වික්‍රමාරච්චිගේ අශෝක ඊයේ සාක්ෂි ලබා දී ඇත. ඔහු කාලයක් හිටපු ඇමැතිවරයාගේ පෞද්ගලික ආරක්ෂකයකු ලෙස සේවයකර ඇති අතර පසුව සතොස ආරක්ෂක අංශයේ සේවයට බඳවා ගෙන ඇත.

ඔහුට සතොස මඟින් වැටුප් ගෙවීම පිළිබඳ පැමිණිල්ලේ සාක්ෂි විමසීම සිදු කර ඇති අතර පසුව හරස් ප්‍රශ්න විමසීම ද සිදු කර තිබේ.

ජොන්ස්ටන් ප්‍රනාන්දු වෙළෙඳ ඇමති ලෙස කටයුතු කළ 2010 – 2015 කාලසීමාවේ සතොස ආයතනයේ සේවකයන් 39 දෙනකු ඔවුන්ගේ නිල රාජකාරිවලින් බැහැරව දේශපාලන හා පෞද්ගලික කටයුතුවල යෙදවීමෙන් රජයට පාඩු සිදු කිරීම සම්බන්ධයෙන් මෙම නඩු පවරා ඇත.

අල්ලස් හෝ දූෂණ විමර්ශන කොමිෂන් සභාවේ නියෝජ්‍ය අධ්‍යක්ෂ ජනරාල් ගංගා හෙයියන්තුඩුව සමඟ නියෝජ්‍ය සොලිසිටර් ජනරාල් වසන්ත පෙරේරා පැමිණිල්ල මෙහෙය වන අතර විත්තිය වෙනුවෙන් ජනාධිපති නීතිඥ සම්පත් මෙන්ඩිස්, ජ්‍යෙෂ්ඨ නීතිඥ දමින්ද අතුකෝරල යන අය පෙනී සිට ඇත.

නඩුව යළි ලබන ජූනි 16දා කැඳවීමට නියමිතය.

| lankatruth