ජාත්‍යන්තර ප්‍රඥප්තියකට අත්සන් තබා වසර 15 ක් ඉක්ම ගිය ද ආබාධ සහිත පුද්ගලයන්ගේ අයිතිවාසිකම්
සුරැකීමට සමත් වී නොමැති බවට ආණ්ඩුවට චෝදනා එල්ල වී තිබේ.
ජන හා සංඛ්‍යා ලේඛන වාර්තාවන්ට අනුව ලංකාවේ ජනගහනයෙන් සියයට 8.7 ක් යම්කිසි ආබාධිත තත්වයකින් පෙලෙන අයයි. ඔවුන්ගෙන් සියයට 57ක් පිරිමි වන අතර, සියයට 43ක් කාන්තාවන් ය.
ලංකාව ඇතුළු ලෝකයේ රටවල් 160 ක් විසින් එක්සත් ජාතීන්ගේ සංවිධානය සමග 2007 වසරේ දී ආබාධිතයන්ගේ අයිතිවාසිකම් සුරකින බවට ප්‍රඥප්තියකට අත්සන් කෙරිණි.
ආබාධ රහිත පුරවැසියන් හා සමාන ලෙසින් සැලකිය යුතු බවට එමගින් වූ පොරොන්දු අද වන තුරු ඉටු වී නැති බවට ආබාධ සහිත ප්‍රජාව කනස්සල්ල පළ කර සිටී.
''අපේ ඉල්ලීම් සහ අවශ්‍යතා ගැන ශ්‍රේෂ්ඨාධීකරණය ඉහලින්ම පිළිගෙන තිබෙනවා. 2009, 2018, 2019 අවුරුදු වල දිගටම ශ්‍රේෂ්ඨාධීකරණ නඩු තීන්දු දීලා තියෙනවා. 1996 අංක 28 දරන පනත මගින් දෘශ්‍යාබාධිත සහ අනෙකුත් ආබාධ සහිත පුද්ගලයන්ට රැකියා, අධ්‍යාපනය සහ ප්‍රවේශ අයිතිය, අනෙකුත් පුරවැසියන්ට මෙන්ම සමාන විදිහට පැවතිය යුතු බවට නිර්දේශ වී තිබුණත් මේ දක්වා ප්‍රායෝගිකව ක්‍රියාත්මක වීමක් දක්නට නැහැ,'' යැයි විවිධ ආබාධ සහිත පුද්ගලයන්ගේ කොළඹ එකතුවේ නායක ටිකිරි කුමාර ජයවර්ධන පවසයි.
''හරිම කණගාටුයි කියන්න අඩුම වශයෙන් අපේ අග නගරවලවත් රෝද පුටුවෙන් ගමන් කරන්න පුලුවන් පදික වේදිකා නැහැ. අලුතෙනුත් ගොඩනැගිළි හදනවා නමුත් රෝද පුටුවකින් යන්න පුලුවන් වැසිකිළියක් නැහැ. ප්‍රතිකාර ගන්න රෝහලකට ගිහිං නවතින්න විදියක් නැහැ. බස්රථයක ගමන් කරන්න බැහැ. බලධාරිනුත්, සමාජයත් සංවේදි නොවන හින්දා අපි ප්‍රශ්න ගොඩකට මැදිවෙලා.”
ආබාධිතයන්ගේ අයිතිවාසිකම් සුරකින බවට එක්සත් ජාතීන්ගේ සංවිධානයේ සම්මුතියට අත්සන් තබා වසර 15ක් ඉක්ම ගියද, ලංකාව තුල තවමත් එය නීතියක් බවට පත් නොවීම ගැන කණගාටු වන ආබාධිතයන්ගේ සංවිධාන සෑම වසරකම මාර්තු 01 වැනිදාට යෙදෙන රෝද පුටු දිනය මාර්තු 02 වැනිදා සමරමින් ඔවුන්ගේ ඉල්ලීම් ඇතුලත් සංදේශයක් ජනාධිපති කාර්යාලයට මෙන්ම මාතර, කොළඹ, කුරුණෑගල, මොනරාගල, මහනුවර සහ පුත්තලම දිස්ත්‍රික්ක වල රජයේ වගකිව යුත්තන්ට බාර දී තිබේ.
යුද ආබාධිතයන් විශාල සංඛ්‍යාවක් වෙසෙන උතුරු නැගෙනහිර පළාත් අයත් කිසිදු දිස්ත්‍රික්කයක් මෙම 'රෝද පාද චාරිකා'වැඩසටහනට සම්බන්ධ කර ගෙන නොමැත.
''අවුරුදු ගණනාවක ඉඳන් ඉල්ලන අපේ මුලික අවශ්‍යතාව වන ස්ථානයකට ඇතුල්වීමේ පහසුකම් යළිත් ආණ්ඩුවට මතක් කරන්න වුණා. රෝද පුටුවට සිමා වී සිටින ආබාධ සහිත අයගේ විතරක් නොවේ විවිධ ආබාධ ඇති අනෙක් අයත් අවුරුදු ගානක් පුරා ඉල්ලන ගොඩක් ඉල්ලීම් මේ සංදේශයට ඇතුල් කළා,'' යි මහනුවර අයිතීන් උදෙසා සංවිධානයේ සභාපතිනි නීෂා ෂරිෆ් පවසන්නීය.
සියලුම දිස්ත්‍රික් ලේකම්වරුන්ගේ සහභාගිත්වයෙන් මාර්තු 25 වෙනිදා කොළඹ දී පැවැත්වීමට නියමිත සමාජසේවා නිළධාරිවරුන්ගේ වැඩසටහන සඳහා ආබාධිතයන්ගේ විසඳා ගත යුතු අවශ්‍යතා ගැන යෝජනාවලියක් ඉදිරිපත් කරන ලෙසට කොළඹ දිස්ත්‍රික් ලේකම්වරයා විසින් ආබාධිතයන්ගේ සංවිධාන එකතුවට දන්වා තිබේ.
