යුද හමුදාවට භාර වූවන් අතුරුදහන් කළ බවට කිසිදු සාක්ෂියක් නැතැයි අතුරුදහන් තැනැත්තන් පිළිබද

කාර්යාලයේ අලුත්ම ප්‍රධානියා ජාත්‍යන්තර මාධ්‍ය හමුවේ කළ ප්‍රකාශය 'බයිලාවක්' ලෙසින් දැඩි දෝෂ දර්ශනයට ලක්වී තිබේ.


අතුරුදහන් කළ බවට බහුතරයක් එල්ටීටීඊය විසින් හෝ ඊට තුරු පාර්ශව විසින් පැහැරගෙන ගොස් ඇතැයි රොයිටර්ස් මාධ්‍ය ආයතනයට කියා තිබෙන OMP සභාපති මහේෂ් කටුලන්ද යුද හමුදාවට භාර වීමෙන් පසු  අතුරුදහන් වූ බවට කරන ප්‍රකාශ හෙලා දැක ඇත්තේ එසේ වූ බවට කිසිදූ සාක්ෂියක් නොමැති බව පවසමිනි.



යුද පීඩිතයන් හා ජාත්‍යන්තර මානව හිමිකම් සංවිධාන පමණක් නොව OMP කාර්යාලයම පවා මෙතෙක් පිළිගත් තොරතුරු ප්‍රතික්ෂේප කිරීම එම ආයතනයේ විශ්වසනීයත්වය බිද වැටෙන බවට දිවයිනේ ජ්‍යෙෂ්ඨතම මානව හිමිකම් ක්‍රියාධරයෙක් චෝදනා කරයි.

 

"පනහක් ඉන්නවය පිටරට, සමහර අය එල්.ටී.ටී.ඊ එකෙන්ම මරා දාලා කියලා. මං කියනවා මේවා බයිලා. මොකද බයිලා කියන්නේ ඒ දෙමව්පියෝ ඉතා පැහැදිලිව අතින් දුන්නේ. ඉතින් අතුරුදහන් කාර්යාලයේ සභාපති ඒ වගේ ප්‍රකාශයක් කරනවා නං කොයි මිනිහද මේ කාර්යාලයට පැමිණිල්ලක් කරන්නේ විශ්වාස සහගතව."

අතුරුදහන් වූවන්ගේ පවුල් එකතුවේ සභාපති බ්‍රිටෝ ප්‍රනාන්දු අගෝස්තු 27 වැනි බ්‍රහස්පතින්දා පෙරවරුවේ එම චෝදනාව එල්ල කළේ අතුරුදහන් තැනැත්තන් පිළිබද කාර්යාලය ඉදිරිපිටදී නිහඩ විරෝධතාවක් දියත් කිරීමෙන් පසු ය.


xcgfgඅතුරුදහන්වූවන්ගේ පවුල් වල සාමාජිකයන් පිරිසක් ඊයේ (27) පෙරවරුවේ 'අතුරුදහන්වූවන් පිලිබද කාර්යාලය' ඉදිරිපිට රැස්ව විරෝධතාවයක නිරතවිය.


OMP සභාපති වැඩි දුරටත් සඳහන් කොට තිබුනේ අතුරුදහන් වූ බවට වාර්තා ඇතත්, ඉන් පුද්ගලයන් 50 කු පමණ විදේශගතව සිටින බව සිය කාර්යාලය විසින් අනාවරණය කර ගෙන ඇති බවයි.

ආණ්ඩුවට අවශ්‍ය ප්‍රකාශ OMP සභාපති සිදු නොකළ යුතු බව පෙන්වා දෙන මානව හිමිකම් ක්‍රියාධරයා අවධාරණය කරන්නේ බලයට පත් වු සෑම ආණ්ඩුවක්ම තමන් විසින් සිදු කරන ලද ඝාතන වසං කිරීමට  මෙවැනි ප්‍රකාශ කළ බවයි.

"මේකෙදී ඇත්ත කියන්න. ආණ්ඩුවට උවමනා දේවල් කියන්න නෙමෙයි. මේ කතාව කියන්නේ ආණ්ඩුව. ආපු හැම ආණ්ඩුවක්ම මේ මගුල තමයි කිව්වේ. ඇයි? තමන් මරා දාපු මිනිස්සු මැරුනා කියන්න මේ ආණ්ඩු වලට කොන්ද නෑ. එහෙව් උන් කියනවා මේ මේ ඕක බොරු කියලා. "

සභාපති මහේෂ් කටුලන්ද පවසන විදේශගත 50 දෙනා හෙළි කරන ලෙස බ්‍රිටෝ ප්‍රනාන්දු එහිදී අභියෝගයක්ද කළේය.

"දැන් අපි ඉල්ලනවා මෙයාගෙන් ඔය පනහ එළියට දාපල්ලා. ගෙන්නපල්ලා."



අතුරුදහන් තැනැත්තන් පිළිබද කාර්යාලය ගමන් ගන්නේ වැරදි පාරක බව පවසන අතුරුදහන් වූවන්ගේ පවුල් එකතුවේ සභාපති මානව හිමිකම් ක්‍රියාධර බ්‍රිටෝ ප්‍රනාන්දු එහිදී වැඩි දුරටත් අවධාරණය කළේ, වසර තිහක අරගලයකින් පසු ලබාගත්  OMP කාර්යාලයට  "බයිලා" කියන්නට ඉඩදී නිහඩව නොසිට එය නිවැරදී මාවතට ගැනීමට උත්සාහ ගන්නා බවයි.



"ඒ නිසා අපි හිතනවා OPM එක යන්නේ වැරදි පාරේ.අපි අවුරුදු 30 ක් දුක් විදලා ගත්තු එක මේ වගේ බයිලා කියන්නනං ඉඩ දෙන්නේ නෑ. අපි ඒක හරි පාරට ගන්න උත්සාහ කරන එක උත්සාහ කරනවාමයි. මේ කියලා තියෙන්නේ බයිලා එකක් කියලයි මට කියන්න තියෙන්නේ. "

OMP කාර්යාලය පිහිටවූ දා පටන් ඒ ගැන කිසිදු විශ්වාසයක් පල කර නැති අතුරුදහන් කරන ලද සිය සමීපතමයන් පිළිබඳ සත්‍යය හෙළි කරගැනීම සඳහා දින 2075 කට වැඩි කාලයක් අඛණ්ඩ අරගලයක යෙදී සිටින දෙමළ මව්වරුන් ප්‍රමුඛ යුද පීඩිතයන් ඉල්ලා සිටින්නේ ජාත්‍යන්තර විමර්ශනයකි.

"සත්‍ය හෙළි කරන පරීක්ෂණ කෝ අතුරුදහන් වුවන්  පිළිබද කාර්යාලය (OMP)නිහඩ ඇයි ?",  " එපා. එපා. එපා අතුරුදහන් කරවීම් තවත් එපා." ,  " ත්‍රස්තවාදය වැලැක්වීමේ පනත අහෝසි කරනු" , "රදවාගෙන සිටින සියළුම දේශපාලන ක්‍රියාකාරීන් වහා නිදහස් කරනු", " සත්‍ය හෙලි කරනු, යුක්තිය ඉටු කරනු, අතුරුදහන් කරවීම් යළි සිදු කිරීම වලක්වනු" , " අතුරුදහන් පවුල් වලට දෙනවා කිව්ව වන්දිය කෝ?, සත්‍යය හෙළි කර යුක්තිය වහා ඉටු කරනු "   බැනර පෙරටු කරගනිමින් අතුරුදහන්වුවන් පිළිබද ජාත්‍යන්තර දිනය වෙනුවෙන් අතුරුදහන්වුවන්ගේ පවුල් වල ඥාතින් සමග ඊයේ පෙරවරුවේ එම කාර්යාලය ඉදිරිපිටදී නිහඩ විරෝධතාවයක්  කළ අතුරුදහන් වූවන්ගේ පවුල් එකතුව සිය ඉල්ලීම් ඇතුලත් ලිපි දෙකක් වන්දි කොමිසමේ අධ්‍යක්ෂ වෙතත්  OMP සභාපති වෙතත් යොමු කිරීමට කටයුතු කර තිබුනි.

අතුරුදහන් තැනැත්තන් පිළිබද කාර්යාලයේ සභාපති වෙත යොමු කළ ලිපිය මගින් කේ.ජේ බ්‍රිටෝ ප්‍රනාන්දු පෙන්වා දී තිබුනේ සිය සංවිධානය දන්නා පරිදි OMP කාර්යාලය වෙත ලැබී ඇත්තේ සන්නද්ධ සේවා සාමාජිකයන්ගේ අතුරුදහන් වීම්ද ඇතුළුව 19000 ට ආසන්න පැමිනිලි සංඛ්‍යාවක් බවයි.



හිටපු ජනාධිපති මහින්ද රාජපක්ෂට අනුව දකුනේ පමණක් 1989 ට අදාල අතුරුදහන්වීම් හැටදාහක් බව පෙන්වා දෙන මානව හිමිකම් ක්‍රියාධරයා එහි  තවදුරටත් එහි සදහන් කර ඇත්තේ හිටපු ජනාධිපතිනි චන්ද්‍රිකා කුමාරතුංග 1996 පත් කළ කොමිසමට වාර්තා වු සංඛ්‍යාව 26000 ට ආසන්න බවයි.



ස්වර්ගස්ථ මන්නාරම් රදගුරු රායප්පු ජෝශප් උගත් පාඩම් හා සංහිඳියා (LLRC)කොමිසමට දුන් ලිඛිත ප්‍රකාශයට අනුව උතුරේ යුද මුක්ත කලාපයට ඇතුල් වු සහ යුද්ධයෙන් පසු ඉන් පිට වු පිරිස අතර වෙනස 147600 ට ආසන්න බවත් අතුරුදහන් වූවන්ගේ පවුල් එකතුවේ සභාපති මානව හිමිකම් ක්‍රියාධර  බ්‍රිටෝ ප්‍රනාන්දු OMP නව සභාපති මහේෂ් කටුලන්දට සිහිපත් කර දී තිබේ.

ආණ්ඩුව මේ වසරේ මාර්තු මසදී නිවේදනය කර ඇති පරිදි මාතර, මන්නාරම, යාපනය, මඩකලපුව සහ කිලිනොච්චි යන ප්‍රදේශවල ස්ථාපිත කර තිබෙන OMP ප්‍රදේශිය කාර්යාල වෙත අතුරුදහන් වීම් සම්බන්ධයෙන් ලැබී ඇති පැමිණිලි ගණන 14988 කි.

යුද්ධයේ අවසාන දින වලදී රජයේ  ආරක්ෂක අංශ භාරයට පත් වීම මෙන්ම සියතින්ම භාරදීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.

ඔවුන්ට අත්වු ඉරණම සෙවීම සදහා මෛත්‍රී-රනිල් ආන්ඩුව විසින් 2018 පෙබරවාරි 28 අතුරුදහන් වූ තැනැත්තන් පිළිබඳ කාර්යාලය (OMP) පිහිටුවන ලද නමුත් ඥාතීන්ට එකම සමීපතමයකු හෝ සොයා දීමට එම කාර්යාලයට මේ තාක් හැකිවී නැත.

මෙරට  අතුරුදහන් කිරීම් පිළිබඳව වැඩිම චෝදනා එල්ලවී තිබෙන්නේ රජයේ ආරක්ෂක අංශ වෙතය.

ශ්‍රී ලංකාවේ අතුරුදහන් වුවන් සිහිපත් කිරීම සදහා සීදුව රද්දොළුව ඉදිකර තිබෙන ස්මාරකය අබියස දී 32 වතාවටත් වාර්ෂික අනුස්මරණය සිදු කිරීමට මානව හිමිකම් ක්‍රියාධර බ්‍රිටෝ ප්‍රනාන්දුගේ නායකත්වයෙන් යුත් අතුරුදහන් වූවන්ගේ පවුල් එකතුව කටයුතු කර තිබුනි. 

 


The LEADER Whatsapp Group එකට එකතුවෙන්න

new logo

subscribeYT

WhatsApp Image 2021 09 13 at 13.49.58

නවතම පුවත්