යුද පීඩිත මුලතිව් දිස්ත්‍රික්කයේ දෙමළ ජනතාව සතු ඉඩම් බලෙන් ඇල්ලීමට දරන උත්සාහයකට එරෙහිව
ප්‍රදේශවාසීන් දක්වන විරෝධය වාර්තාකරමින් සිටි වන්නියේ ප්‍රවීණ දෙමළ මාධ්‍යවේදියකුට නාවික හමුදාව විසින් කළ හිරිහැරය සම්බන්ධයෙන් පොලිස් විමර්ශන ආරම්භ කර තිබේ.
ශ්‍රී ලංකාවේ වැඩිම හමුදා ගහනයක් සහිත කලාපයේ වාර්තාකරණය නිසා නිරන්තරයෙන් හිරිහැරයට ගොදුරුවන මාධ්‍යවේදියකු සම්බන්ධයෙන් පොලිස් විමර්ශනයක් ආරම්භ වූ දුර්ලභ අවස්ථාවක් සේ මෙය සැලකේ.
වන්නි වාසීන්ගේ සටන් පමණක් නොව කොළඹ ගෝල්පේස් අරගලයද ජාත්‍යන්තර ජනමාධ්‍යය වාර්තා කර ඇති මාධ්‍යවේදී කනපතිපිල්ලේ කුමනන් 2022 දෙසැම්බර් 29 වැනි බ්‍රහස්පතින්දා මුලතිවු සහකාර පොලිස් අධිකාරි කාර්යාලය කැඳවූ පොලීසිය ඔහුගෙන් නාවික හමුදා අඩන්තේට්ටම ගැන පැය තුනහමාරකට ආසන්න කාලයක් ප්‍රකාශ සටහන් කරගෙන ඇත.
මුලතිව්, වට්ටුවාක්කල් ගෝඨාභය නාවික හමුදා කඳවුර තවත් පුළුල් කිරීම සඳහා දෙමළ ජනතාවට අයත් ඉඩම් පැහැරගැනීමට පොලිසිය හා නාවික හමුදාව සමග මිනින්දෝරු දෙපාර්තමේන්තුව දැරූ උත්සාහයක් ජනතාව මැදිහත් වී 2022 ජූනි 7 වැනිදා වලක්වා දමන අවස්ථාව ඡායාරූප ගත කරමින් සිටි කනපතිපිල්ලේ කුමනන්ගේ රාජකාරි හැඳුනුම් පත ලබාගැනීමට නාවික හමුදාවේ පිරිසක් වෙර දැරූ අවස්ථාවේ මාධ්‍යවේදියා ඔවුන්ට පෙන්වා දී තිබුනේ පොලිස් රාජකාරි කිරීමට නාවික හමුදාවට බලයක් නැති බවයි.
එමෙන්ම ප්‍රවෘත්ති දෙපාර්තමේන්තුව විසින් නිකුත් කොට ඇති රාජකාරි හැඳුනුම්පත නාවික හමුදාව අතට පත් වුවහොත් ඊට කවර ඉරණමක් අත්වේදැයි විශ්වාස නැති බව මුලතිව් මාධ්‍ය සමාජයේ ලේකම් ද වන කුමනන් පවසනු ප්‍රදේශයේ අනිකුත් මාධ්‍යවේදීන් රූගත කොට තිබුනි.
නාවික හමුදාවට මාධ්‍යවේදියාගේ හැඳුනුම්පත ලබා ගත නොහැකි වූ තැන පොලිසිය එය ලබාගෙන පරීක්ෂා කර ආපසු දී තිබුනි.
හමුදාකරණයට එරෙහිව දෙමළ ජනතාව ගෙනයන අරගල සහ ඒවා වාර්තා කරන මාධ්‍යවේදීන් සම්බන්ධයෙන් කටයුතු කිරීමේදී යුද හමුදාව සහ නාවික හමුදාව කරන ඉල්ලීම් වලට පොලිසිය අනුගත වීම නීතියේ ආධිපත්‍යයට බාධාවක් මෙන්ම තොරතුරු හෙළිදරව් වීමට අවහිරයක්ව පවතින බවත් පළාතේ බහුජන ක්‍රියාධාරීහු පවසති.
මාධ්‍යවේදියාට සිදු වු හිරිහැරය සම්බන්ධයෙන් පුදුකුඩිඉරුප්පු ප්‍රාදේශිය සභාවේ මන්ත්‍රී මුත්තුසාමි මුගුන්දකජන් එවක අගමැති රනිල් වික්‍රමසිංහ වෙත 2022.06.07 දින පැමිණිලි කර තිබු අතර අග්‍රාමාත්‍ය ලේකම් වෙනුවට ජ්‍යෙෂ්ඨ සහකාර ලේකම් ජී.අයි.සජීවනී පෙරේරා" මුලතිව් දිස්ත්‍රික්කයේ මාධ්‍යවේදියෙකුට තර්ජනය කිරීම" ශිර්ෂය සහිතව 2022.06.27 දින මහජන ආරක්ෂක අමාත්‍යාංශ ලේකම්ට ලිපියක් යොමු කරමින් දැනුම් දී තිබුනේ ලිපියේ සදහන් කරුණු පරීක්ෂා කර, පවත්නා විධිවිධාන ප්‍රකාරව සුදුසු කටයුතු කරන ලෙසයි.
නාවික හමුදාව අතින් තමන් හිංසනයට පත් වීම සම්බන්ධයෙන් මාධ්‍යවේදී කනපතිපිල්ලේ කුමනන් කිසිදු පොලිස්ථානයකට පැමිණිලි කර නොතිබු බව පළාත් බද මාධ්‍යවේදීන් පවසයි.
හඳුනා ගැනීම
හිරිහැරයට පත් දෙමළ මාධ්‍යවේදියාගෙන් ප්‍රකාශ සටහන් කරගත් පොලිසීය ඔහුගෙන් විමසා ඇත්තේ තමන් හිරිහැරයට පත් කළ නාවික හමුදා නිලධාරීන් හදුනා ගත හැකිද යන්නයි.
ඔවුන් ඉදිරිපත් කළහොත් තමන්ට හදුනාගැනීමේ හැකියාව පවතින බව මාධ්‍යවේදියා පොලීසියට පවසා තිබේ.
නාවික හමුදා නිලධාරීන් අතින් තමන් හිරිහැරයට පත් වන අවස්ථාවේ වීඩියෝ දර්ශනද සීඩී තැටියක් මගින් පොලීසිය වෙත ලබා දී ඇත.
