පසුගිය ජනාධිපතිවරණ සමයේ දී හිටපු අමාත්‍ය රාජිත සේනාරත්න සමග මාධ්‍ය සාකච්ජාවකට එක්වෙමින්, සුදුවැන් වලින් සිදුකළ පැහැරගැනීමක් හා රත්‍රන් ටොන් 7000ක් ප්‍රවාහනය කිරීමක් සම්බන්ධයෙන් ප්‍රකාශයක් කළ පුද්ගලයින් දෙදෙනා මිට ස්වල්ප මොහොතකට පෙර අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ඇතැයි වාර්තාවේ.
කඩවත මහර පිහිටි ශ්‍රී නමැති රෙස්ටුරන්ට් එකේ සිටියදී ඔවුන් අත්අඩංගුවට ගෙන ඇතැයි පැවසේ.
රාජිත සේනාරත්න සමග පැවති මාධ්‍ය හමුවේදී අදාල රියදුරා මාධ්‍ය හමුවේ දී කියා සිටියේ ගෝඨාභය රාජපක්ෂ ආරක්ෂක ලේකම්ව සිටි සමයේදී සුදු වෑන් වලින් ජනතාව පැහැරගෙන ගොස් මරා දමා කිඹුලන්ට කන්න දැමූ බවත් තමන් එම සුදුවෑන් රථයේ රියැදුරු බවත්ය.
අනෙක් මාධ්‍ය හමුවට සහභාගී වූ අනෙක් පුද්ගලයා කියා සිටියේ ප්‍රභාකරන් ගේ රත්තරන් ටොන් 7000 ප්‍රමාණයක් තමන් කොළඹට ප්‍රවාහනය කළේ ගෝඨාභය රාජපක්ෂට ලබා දීම වෙනුවෙන් බවය.
වීඩියෝ
ඇන්තනී ඩග්ලස් ප්‍රනාන්දු සහ අතුල සංජීව මදනායක යන එම පුද්ගලයන් දෙදෙනාව රාජිත සේනාරත්න විසින් වෙස් ගන්වාගෙන එම මාධ්‍ය හමුවට කැඳවාගෙන පැමිණි බව එවකට විපක්ෂයේ මන්ත්‍රීවරයකුව සිටි ඩලස් අලහප්පෙරුම සඳහන් කර තිබිණ.
එම ප්‍රකාශ සම්බන්ධයෙන් පරීක්ෂණයක් ආරම්භ කළ අපරාධ පරීක්ෂණ දෙපාර්තමේන්තුව පසුගියදා දෙසැම්බර් 02 දා අධිකරණයට කරුණු වාර්තා කරමින් එම ප්‍රකාශයන්ට අදාලව විමර්ශන ආරම්භකර ඇතිබව කියා සිටියේය.
රාජිතට එරෙහිව තවත් පැමිණිල්ලක් !
theleader.lk වෙත වාර්තාවන පරිදි හිටපු අමාත්‍ය රාජිත සේනාරත්නට එරෙහිවද ඉදිරි දින කිහිපය තුලදී අධිකරණ ක්‍රියාමාර්ග ගැනීමට සැලසුම් කර තිබේ.
හිටපු අමාත්‍ය රාජිත සේනාරත්න විසින් රුපියල් ලක්ෂ 30,000 කට අධික රාජ්‍ය මුදල් අවභාවිතයක් සිදු කර ඇති බවට චෝදනා කරමින් ඔහුට එරෙහිව පැමිණිල්ලක් ගොනු කිරීම සඳහා, ජාතික නිදහස් පෙරමුණේ මාධ්‍ය ප්‍රකාශක මොහොමඞ් මුසම්මිල් අද (13) පොලිස් මූල්‍ය අපරාධ කොට්ඨාසයට පැමිණියේය.
කෙසේවෙතත් පොලිස් මූල්‍ය අපරාධ කොට්ඨාසය විසින් අදාළ පැමිණිල්ල භාර නොගත් බැවින්, මොහොමඞ් මුසම්මිල් අපරාධ පරීක්ෂණ දෙපාර්තමේන්තුව වෙත පැමිණ සිය පැමිණිල්ල ගොනු කිරීමට කටයුතු කළේය.
