අලුත් නීති දමා මාධ්‍යවේදීන්ට කරන තාඩන පීඩන ඉදිරියේදී තව දුරටත් උග්‍ර විය හැකි බවට බිය පලකරන උතුරේ දෙමළ මාධ්‍යවේදීන්
දෙදෙනෙක් එම මර්දනය දැනටමත් ආරම්භ වී ඇති බවට අනතුරු අගවා සිටිති.
ඔවුන් විසින් පල කරන ලද වාර්තාවක තොරතුරු ලබා දුන් මුලාශ්‍ර හෙළි කරන ලෙස පොලිසිය කළ බල කිරීම මාධ්‍යවේදීන් දෙදෙනාම ප්‍රතික්ෂේප කර තිබේ.
"මේක බලනකොට මාධ්‍ය මර්දනය වෙන්න පුළුවන්. ඉස්සරහට එන්න තියන නීති වලින් මර්දනය තවත් බරපතල වෙන්න පුළුවන් කියන එක තමයි අපිට තියන ප්‍රශ්නේ. ඒ වගේම මේක ආරම්භක අවස්ථාව වෙන්න පුළුවන් කියන එක තමයි මට කියන්න තියෙන්නේ."
යාපනයේ, නිදහස් මාධ්‍යවේදී තම්බිදුරෙයි ප්‍රදීපන් ජුනි 21 වැනිදා එම අනතුරු ඇගවීම සිදු කළේ තම රාජකාරිය සම්බන්ධයෙන් කිලිනොච්චි නියෝජ්‍ය පොලිස්පති කාර්යාලයේ පැය දෙකක පමණ කාලයක් තිස්සේ ප්‍රශ්න කිරීම්වලට මුහුණ දීමෙන් පසු පළාත් බද මාධ්‍යවේදීන් වෙත අදහස් දක්වමිනි.
ජුනි 2 වැනිදා යාපනයේ නැගෙනහිර වඩමාරච්චි යේ ක්‍රීඩා සමාජයක සාමාජිකයන් සමග පැවති රැස්වීමක් අතරතුර පොලිස් බුද්ධි අංශ සාමාජිකයකු විසින් දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ට පහරදීමට උත්සාහ කරන ආකාරයත්, තවත් අයකු විසින් පිස්තෝලයක් එල්ල කරන අයුරුත් දැක්වෙන වීඩියෝ සමාජමාධ්‍ය තුලද සංසරණය වෙමින් තිබුනි.
යාපනයේ, නිදහස් මාධ්‍යවේදී තම්බිදුරෙයි ප්‍රදීපන් හා කිලිනොච්චියේ, නිදහස් මාධ්‍යවේදී ටී.පරමසිවන් කැඳවා විශේෂ අපරාධ විමර්ශන ඒකකය විසින් ඔවුන් දෙදෙනාගෙන් ප්‍රශ්න කර ඇත්තේ ජුනි 2 වැනිදා මරුදන්කර්නි ක්‍රීඩා පිටියක ඉහත සිදුවීම සම්බන්ධයෙන් තොරතුරු වාර්තා කළ ආකාරය සහ එම සිදුවීම සම්බන්ධයෙන් තොරතුරු ලබා දුන්නේ කවුද යන්න යි.
තොරතුරු මුලාශ්‍රය හෙළි කිරීමට නොහැකි බව ඔවුන් දෙදෙනාම පොලීසිය හමුවේ පවසා තිබේ.
අදහස් පලකිරීමේ නිදහසට ආණ්ඩුව දිගටම බාධා කරන්න යන බව තමන් පොලිසි කැඳවීමෙන් හොඳින් පෙනී යන බව කී ටී.පරමසිවන් තමන් සිදු කළ වාර්තාකරණය සම්බන්ධයෙන් පොලීසිය මෙලෙස ප්‍රශ්න කිරීම එම මර්දනයේම ආරම්භක පියවරක් ලෙස හෙලා දකින ලෙස ඉල්ලා සිටියි.
අලුත් නීති
“රජය විකාශන අධිකාරියක් හරහා මේ රටේ නිදහස් මාධ්‍යය මුළුමනින්ම විනාශ කරන්නට පිඹුරු පත් සකස් කරමින් සිටින බවට චෝදනා කළ විපක්ෂ නායක සජිත් ප්‍රේමදාස එම පනත පසුගියදා හදුන්වා තිබුනේ “අන්තවාදී, ඒකාධිපති, ආඥාදායක, දරදඬු, මුග්ධ විකාශන අධිකාරී පනත” ලෙසයි.
සිංගප්පූරුවේ වගේ
යූ ටියුබ්, ෆේස්බුක් ඇතුළු සමාජ මාධ්‍ය නියාමනය සඳහා සිංගප්පූරුවේ දැනට භාවිත කරන විදුලි සංදේශ හා සමාජ මාධ්‍ය පනතට සමාන වන ආකාරයේ පනතක් මෙරටට හඳුන්වාදීමට ද කටයුතු කරමින් සිටින බව ජනාධිපති රනිල් වික්‍රමසිංහ මේ වසර මුලදී සදහන් කර තිබුනි.
ඒ ජනාධිපති නිල නිවසේදී පුවත්පත් කර්තෘවරුන් සහ විද්‍යුත් මාධ්‍ය ප්‍රවෘත්ති අධ්‍යක්ෂවරුන් සමග 2023 ජනවාරි 6 වැනිදා පැවති සාකච්ඡාවකදී ය.
පුවත්පත් හා විද්‍යුත් මාධ්‍ය සඳහා ශ්‍රී ලංකාව තුළ නීති පැවතිය ද සමාජ මාධ්‍ය නියාමනය සඳහා එවැනි නීති රාමුවක් මෙරට තුළ නොමැති බව එහිදී පැවසු ජනාධිපතිවරයා වැඩිදුරටත් කියා තිබුනේ, සිංගප්පූරුවේ දැනට භාවිත කරන විදුලි සංදේශ හා සමාජ මාධ්‍ය පනත තමන් ගෙන්වා ගත් අතර එය අධ්‍යයනය කර ශ්‍රී ලංකාවට ගැලපෙන ආකාරයේ නීති රාමුවක් සකස් කිරීම සඳහා ඉදිරියේදී කටයුතු කිරීමට බලාපොරොත්තු වන බවයි.
