මණ්ඩතිව් දුපතේ පිහිටා ඇති නාවික හමුදා කඳවුරක් පුළුල් කිරීම සඳහා ඉඩම් කොල්ල කෑමට
තවදුරටත් දරන උත්සාහයට එරෙහිව ජනතා විරෝධය එල්ලවී තිබේ.
දශක ගණනාවක් පුරා මණ්ඩතිව් කොදෙව්ව පාලනයට පිහිටුවා තිබෙන වේළුසුමන නාවික හමුදා කඳවුර තවත් පුළුල් කිරීම සඳහා ඒ ආසන්නයේ පිහිටි ඉඩම් අත්පත් කර ගැනීමට අවශ්‍ය බව නාවික හමුදාව දැනුම් දීමත් සමගින් ඉඩම් මැනීමට අද (12) එහි පැමිණි රජයේ මිනින්දෝරුවන්ට දුපත්වාසි ජනයා, ඉඩම් හිමිකරුවන්, දේශපාලන හා බහුජන සංවිධාන ක්‍රියාධරයන් එක්ව විරෝධය දැක්වූ බව එහි ගිය යාපනයේ මාධ්‍යවේදීහු පවසති.
වේළුසුමන නාවික හමුදා කඳවුර පුළුල් කිරීම වෙනුවෙන් පවුල් 29 කට අයත් ඉඩම් අක්කර 18 ක භූමියක මැනුම් කටයුතු අද (12) සිදු කෙරිණි.
මණ්ඩතිව් නැගෙනහිර මුතුමාරිඅම්මන් කෝවිල ඉදිරිපිට රොක්වූ විරෝධතා කරුවන් දැඩි ලෙස පොලිස් මුරකාවල් යොදා තිබුණු වේළුසුමන නාවික හමුදා කඳවුර ඉදිරිපිටට ගොස් විරෝධය පා තිබේ. මාධ්‍යවේදීන් පවසන්නේ විරෝධතාකරුවන් බිය වැද්දීමට හා තර්ජනාත්මක ලෙස ඔවුන්ව ඡායාරූපගත කිරීමට හා වීඩියෝගත කිරිමට නාවික හමුදා භටයන් ක්‍රියා කළ බවයි.
ඉලංගෙයි තමිල් අරසු කච්චි මන්ත්‍රී ශ්‍රීධරන් පවසන්නේ මණ්ඩතිව් හා අනෙකුත් ස්ථාන රජයේ හමුදා විසින් බලහත්කාරයෙන් අත්පත් කර ගැනීමට සැරසෙන්නේ ඒ තුලින් මරා දැමුණු දෙමළ තරුණ තරුණියන්ගේ සමුහ මිනී වලවල් මතුවේ යැයි බිය නිසා බවයි. දැනටමත් මුලතිව් කොක්කුතුඩුවායි හි දෙමළ සටන්කාමින්ගේ යැයි විශ්වාස කෙරෙන සමුහ මිනිවලක් අහඹු ලෙස සොයා ගෙන කැනීම් අරඹා ඇත.
මණ්ඩතිව් දුපතේ ශාන්ත තෝමස් දේවස්ථානය ඉදිරිපිට ලිඳ ශුද්ධ පවිත්‍ර කළහොත් හමුදා විසින් මරා දැමුණු තරුණයන් අසූවකට වැඩි අයගේ ශරීර කොටස් සොයා ගත හැකි බවද ඉකුත් දිනෙක පාර්ලිමේන්තුවේදී සිවඥානම් ශ්‍රීධරන් මන්ත්‍රීවරයා හෙළිදරව් කළේය.
යාපනයේ තවත් සමූහ මිනී වලක් ගැන මැතිසබේ හෙළිදරව්වක්
නොනවතින කොල්ලය
ඉකුත් වසර කිහිපය පුරාම මෙවැනි බලහත්කාරී ලෙස ඉඩම් අත්පත් කර ගැනීමේ ප්‍රයත්න රැසක් සිදුවිණි.
# 2020 වසරේ අගෝස්තු 28 සිකුරාදා වේලනෛ ප්‍රදේශිය ලේකම් කොට්ඨාශයේ මන්ඩතීවූ පිහිටි පුද්ගලයන් සිව් දෙනකුට අයත් අක්කර හතරකට ආසන්න ඉඩම් ප්‍රමාණයක් වේළුසුමන නාවික හමුදා කඳවුර තවත් පුළුල් කිරීම වෙනුවෙන් ඉඩම් හිමියන්ගේ අකැමැත්ත නොතකා පවරා ගැනීමට උත්සාහ දැරිය.
# 2020 වසරේ නොවැම්බර් 10 අගහරුවාදා නැවත වරක් නාවික හමුදාව විසින් එම උත්සහායම දැරීය.
# දෙසැම්බර් 13 වැනිදා කරෙයිනගර් නිලන්කාඩු ග්‍රාම සේවා වසමේ පදිංචි පවුල් 40 කට අයත් අයත් ඉඩම් අක්කර 51ක භූමියක් නාවික හමුදා කඳවුරක් පුළුල් කිරීම සදහා මැන වෙන් කිරීමට උත්සහා දැරීය.
# 2021 ජනවාරි 18 සඳුදා මන්ඩතිව් හි පෞද්ගලික ඉඩම් මැන වෙන් කිරීමට වෑයම් කළේය.
# පෙබරවාරි 19 වැනිදා කරෙයිනගර් නීලන්කාඩු ග්‍රාම සේවා වසමේ පදිංචි පවුල් 67 ට අයත් ඉඩම් අක්කර 50ක භූමියක් අත්පත් කර ගැනීමට වෙර දැරීය.
# 2022 අප්‍රේල් 26 වැනි අගහරුවාදා යාපනය සංගානෙයි ප්‍රදේශිය ලේකම් කොට්ඨාසයේ පොන්නාලෙයි හංදියේ පිහිටි පෞද්ගලික ඉඩමක් නාවික හමුදාවට බලහත්කාරයෙන් අයිති කරගැනීමට දැරෑ උත්සාහය.
# ඉකුත් අප්‍රියෙල් 04 වැනිදා කයිට්ස් දුපතේ තම්බාටි ජැටිය හරස් කරමින් නාවික හමුදා කඳවුරකට ඉඩම් පවරා ගැනීමට ගත් වෑයමද ඇතුළු මෙකි සියලු ප්‍රයත්නයන් පරාජය කරමින් නාවික හමුදාව පසුබස්වන්නට යාපන අර්ධද්වීපයේ හා සෙසු කොදෙව් වාසි ජනයා මෙතෙක් සමත් වී ඇත.
