ශ්‍රී ලංකාවේ රජය මේ වන විට දැවැන්ත පරිසර විනාශයක් සිදු කරමින් සිටින බවට පරිසර සංවිධානයක් චෝදනා කරයි.
පරිසර හා සොබාදහම් අධ්‍යයන මධ්‍යස්ථානය පවසන්නේ ආණ්ඩුව සකසා ඇති 2011 - 2048 ජාතික භෞතික සැලැස්මට අනුව මෙම මහා පරිසර විනාශය සිදු වන බවයි.
" තැන් තැන් වල කැලෑ කපන එක, විශේෂයෙන්ම මිනිරන් වගේ පතල් හාරන එක, පොස්පේට් නිදිය විකුණන එක, ජලය විකුණන්න සැලසුම් කරපු එක මේ සියල්ල මේ සැලසුම ඇතුලේ තියන කාරණයක් විදිහට අපිට දක්වන්න පුළුවන්. "
රජය රටේ ජනතාවගෙන් මෙම වාර්තාව සගවමින් රටේ තැන් තැන් වල විශාල පරිසර විනාශයක් සිදු කරමින් සිටින බව පවසන 'පරිසර හා සොබාදහම් අධ්‍යයන මධ්‍යස්ථානයේ' ජාතික සම්බන්ධිකාරක රවීන්ද්‍ර කාරියවසම් සදහන් කරන්නේ මෙම සැලසුම ක්‍රියාත්මක කිරීමේදී අද වන විට ලංකාවේ එක දවසකට වනාන්තර අක්කර 65 ක් පමන විනාශ වන බවයි.
බොරැල්ල එන්. එම්. පෙරේරා මධ්‍යස්ථානයේදී ජුලි 17 වැනිදා පැවැත්වු මාධ්‍ය හමුවකදී ඔහු වැඩි දුරටත් සදහන් කළේ 2011 - 2048 ජාතික භෞතික සැලැස්මට අනුව ඉදිරියේදී ශ්‍රී ලංකාවේ ගුවන් තොටුපලවල් 19 ක්, වරායවල් 44 ක්, ඇතුළු මහා මාර්ග පද්ධතියක් ඉදි කිරීමට නියමිත බවයි.
" මේකේ විශේෂයෙන්ම මහා නගර 6 ක්. නැත්නම් මහා නගර කලාප 6 ක් ඉදිකරන්න සැලසුම් කරලා තියනවා. මේ අනුව මේ රටේ දැවැන්ත පරිසර විනාශයක් ඉදිරියේදී සිද්ධ වෙනවා කියලා මේ වෙද්දි අපිට කියන්න හැකියාවක් තියනවා. "
කාසි බෝග වගාවන් සදහා කැළැ ඉඩම් ලබා දීම මගින් සිදු වන මහා පරිමාන ඉඩම් කොල්ලය ඇතුළු දැවැත්න පරිසර විනාශය සම්බන්ධයෙන් පරිසරවේදී රවීන්ද්‍ර කාරියවසම් සිදු කරන අනාවරණය පහත වීඩියෝවෙන් නරඹන්න.
