සෙලින්කෝ සමූහ ව්‍යාපාරයේ අධිපති ලලිත් කොතලාවල මහතාගේ මරණයට සතියක දෙකක කාලයක් තුළ
දිනකට කිහිප වතාවක් නිවිති යෙදූ සුප් සහ
තැඹිලි වතුර බීමට ලබාදුන් බව තමාට දැනගන්නට ලැබුණු බැවින් ඔහුගේ මරණය සම්බන්ධයෙන් සැකයක් ඉපදී ඇතැයි ගෝල්ඩන් කී තැන්පත්කරුවන්ගේ සංගමයේ ඇත්මඩලගේ ජූඩ් මාකෝ පෙරේරා සාක්ෂි ලබාදෙමින් ලබා දෙමින් අධිකරණයේ දී පැවසීය.
ලලිත් කොතලාවල මහතාගේ මරණ පරීක්ෂණ සාක්ෂි විභාගය, කොළඹ අතිරේක මහේස්ත්‍රාත් පසාන් අමරසිංහ ඉදිරියේ ඊයේ (03) පැවැත්වූ අවස්ථාවේ දී මෙම කරුණු ඉදිරිපත් විණි.
එහිදී සාක්ෂි ලබා දුන් පළමු සාක්ෂිකාර පෙරේරා සාක්ෂි දෙමින් සඳහන් කළේ, කොතලාවල මහතාගේ මරණය ස්වාභාවික මරණයක් ලෙස පෙනෙන පරිදි නීතීඥවරුන් කණ්ඩායමක් ඇතුළු කිහිපදෙනෙක් සැලසුම් සහගතව කටයුතු කර ඇති බවට තමා සතුව වාර්තා ඇති බවය.
නීතිඥ නිශ්මි ගොඩැල්ලවත්ත, නීතිඥ සමන් ලියනගේ, නීතීඥ දිනේෂ් ජයවීර, නීතිඥ එස්. පී. එස්. රසිකා, රහස් පොලිසියේ හිටපු නිලධාරියෙකු වන ලලිත් අමරසිංහ, පොලිසියේ විශ්‍රාමික ප්‍රියංජන වන්නිආරච්චි, වත්මන් වත්මන් පොලිස්පති ගේ මස්සිනා කෙනෙකු යැයි කියාගන්නා මහින්ද උපසේන, නීතිඥ සමන් ලියනගේ යන අයගේ සහෝදරිය වන නිරෝශා ප්‍රියදර්ශණී සහ තවත් කිහිප දෙනෙකු සිසිලියා කොතලාවල ගේ දැඩි විරෝධතාව මත ඔවුන් පදිංචි නිවසින් කොතලාවල මහතාව කොළඹ 7 ෆොන්සේකා මාවතේ පිහිටි නිවසකට රැගෙන ගොස් ඇති බවද සාක්ෂිකරු සඳහන් කළේය.
එම නිවසේ දී කොතලාවල මහතා මුලාකරමින් සහ බලහත්කාරයෙන් රුපියල් බිලියන ගණනක් වටිනා දේපල දේපළ මෙම පිරිස විසින් අනීතික ලෙස පවරා ගනු ලැබූ බවත්, මේ සම්බන්ධයෙන් බම්බලපිටිය පොලිසියේ පැමිණිලි ඉදිරිපත් කර ඇති බවත් සාක්ෂිකරු අධිකරණයේදී ප්‍රකාශ කළේය.
මෙම ඉහත කී පිරිස එක්ව කටයුතු කරමින් සැලසුම් සහගතව ස්වාභාවික මරණයක් ලෙසින් පෙනෙන පරිදි වයස්ගත ලලිත් කොතලාවල මහතාට ආහාර පාන ලබා දී රෝගාතුර වීමෙන් අනතුරුව රෝහල් ගත කර ඇති බවත් රෝහලේ දී කිසිවකුට හෝ එතුමා බැලීමට ඉඩ ප්‍රස්ථාව ලබා නොතිබුණු අතර එහිදී එතුමා මිය ගොස් ඇති බවත් සාක්ෂිකරු අධිකරණයට සාක්ෂි ලබාදෙමින් ප්‍රකාශ කළේය.
(lankadeepa.lk)
