එහි මාධ්‍ය ප්‍රකාශක වෛද්‍ය චමිල් විජේසිංහ පැවසුවේ ගනු ලබන ඉදිරි ක්‍රියාමාර්ග සම්බන්ධයෙන් විධායක රැස්වීමේදී තීරණය කරන බවය.
"අපි ප්‍රකාශ කළ විදියටම අද දින උදෑසන 8ට මෙම වැඩවර්ජනය අවසන් කරනවා. ඒ අනුව අද දින උදෑසන 8න් පසු රට පුරා රෝහල් පද්ධතිය පුරාම සාමාන්‍ය විදියට රාජකාරී නිසි පරිදි සිදුවෙනවා. නමුත් එතනින් එහාට අපි ගන්න තීන්දු තීරණ අලුත් අවුරුද්දෙන් පසු රටට කියන්න බලාපොරොත්තුවෙන් ඉන්නවා. දැන් මෙම ගැටලුව අධිකරණය දක්වා ගිහින් තිබෙනවා." ඔහු වැඩිදුරටත් පැවසිය.
සෞඛ්‍ය අමාත්‍යාං‍ශය සිය සංගමය සමග එකඟ වූ කොන්දේසි කඩකර සීමාවාසික පත්වීම් ලබාදී ඇති බව පවසමින් රජයේ වෛද්‍ය නිලධාරීන්ගේ සංගමය පෙරේදා උදෑසන මෙම වර්ජනය ආරම්භ කළ අතර, එය ඊයේ දෙවන දිනටත් ක්‍රියාත්මක විය.
කෙසේ වෙතත්, වර්ජනය හේතුවෙන් රෝගීන් අපහසුතා රැසකට මුහුණ දුන්හ.
දැඩි මතභේදයට තුඩු දී ඇති පශ්චාත් සීමාවාසික වෛද්‍යවරුන්ගේ පත්වීම් දීමේ ලැයිස්තුව අභියෝගයට ලක් කරමින් සීමාවාසික වෛද්‍යවරුන් දෙදෙනකු ගොනු කර ඇති පෙත්සම විභාගයට ගැනීමට අවසර දෙන්නේද? නැද්ද? යන්න පිළිබඳ නියෝගය මැයි 08 වනදා ප්‍රකාශයට පත් කරන බව අභියාචනාධිකරණය ඊයේ (10) දැනුම් දුන්නේය.
සබැඳි පුවතක් :
සීමාවාසික වෛද්‍ය පත්වීම් වලට එරෙහි පෙත්සම්වල නියෝගය 08 වැනිදා
