බාලවයස්කාර ළමා ලිංගික අපයෝජන සිදුවීම : නිට්ටඹුව පොලිසියේ ක්‍රියාකලාපය ගැන ස්වාධීන විමර්ශනයක් ඉල්ලයි

එම සාමූහිකය නිකුත් කළ මාධ්‍ය නිවේදනයක සඳහන් වන්නේ, අටමස්ථානාධිපති පල්ලේගම හේමරතන හිමියන්ට එරෙහිව එල්ල වී ඇති ව්‍යවස්ථාපිත ස්ත්‍රී දූෂණ සහ බාලවයස්කාර දැරියක් ලිංගික අපයෝජනයට ලක්කිරීමේ චෝදනා සම්බන්ධයෙන් සිදුකළ විමර්ශනවලදී පොලිසිය විසින් නීතිය අපක්ෂපාතීව ක්‍රියාත්මක කර නොමැති බවයි.

විශේෂයෙන්ම වින්දිත දැරිය විසින් අප්‍රේල් 10 වනදා ලබාදුන් ප්‍රකාශයට අනුව කඩිනම් ක්‍රියාමාර්ග ගැනීම වෙනුවට, එම තොරතුරු ජාතික ළමාරක්ෂක අධිකාරියෙන් සඟවා තබාගෙන සති දෙකකට ආසන්න කාලයක් ප්‍රමාදයක් සිදුකර ඇති බවට චෝදනා එල්ල කර ඇත.

ඒ අනුව ගම්පහ සහ නිට්ටඹුව පොලිස් කාන්තා හා ළමා කාර්යාංශයන්හි හැසිරීම පිළිබඳව ස්වාධීන පරීක්ෂණයක් වහාම ආරම්භ කළ යුතු බව එම සාමූහිකය අවධාරණය කරයි.

එමෙන්ම, විමර්ශනවලට බලපෑම් එල්ල කළ බවට සැක කෙරෙන ඉහළ රාජ්‍ය නිලධාරීන් සම්බන්ධයෙන්ද විධිමත් පරීක්ෂණයක් පැවැත්විය යුතු බව ඔවුන් පවසයි.

“දිනන දකුණ” සාමූහිකය වැඩිදුරටත් සඳහන් කරන්නේ, සැකකරුගේ සමාජීය සහ ආගමික බලපෑම් හමුවේ වින්දිත දැරියට සහ ඇයගේ මවට උපරිම සාක්ෂිකරුවන්ගේ ආරක්ෂාව සහතික කිරීම රජයේ වගකීමක් බවයි.

(සටහන | ගිම්හාන් ද සිල්වා)