ශාලාවක් තුල ශබ්ද විකාශන යන්ත්‍ර භාවිතයට බලපත්‍රයක් ඉල්ලා බලකරමින් මළවුන් අනුස්මරණයක් සදහා සීමා
පමුණුවන්නට පොලීසිය කටයුතු කර තිබේ.
රජයේ සන්නද්ධ සේනා විසින් තිස් නම වසරකට ඉහතදී සමුල ඝාතනය කොට මේ වනතුරුත් යුක්තිය ඉටු නොවූ දෙමළ වැසියන් තිස් දෙදෙනකු සිහිකරමින් මුලතිව් ඔදියමලෙයි ග්‍රාමයේදී අනුස්මරණය සිදු කරන අවස්ථාවේ පොලීසිය සීමා පැනවීම නිසා අනුස්මරණයට බාධා වු බවයි පළාත් බද වාර්තාකරුවන් පවසන්නේ.
නිරායුධ දෙමළ වැසියන් 32 ක් මුලතිව් ඔදියමලෙයි ග්‍රාමීය සංවර්ධන ශාලාවට කැදවා රජයේ යුද හමුදාව විසින් වෙඩි තබා ඝාතනය කර ඇත්තේ 1984 දෙසැම්බර් 02 දිනයි.
ඝාතන භූමියට මුහුණලා ඉදිකර තිබෙන ඝාතනයට ලක්වුවන්ගේ ස්මාරකවලට ඔවුන්ගේ පවුලේ ඥතීන් 2023 දෙසැම්බර් 2 සෙනසුරාදා මලින් පහනින් හා සුවඳ දුමින් උපහාර දක්වක් අවස්ථාවේ අනුස්මරණ ශාලාවට ඇතුල් වු ඔඩ්ඩුසුඩ්ඩාන් පොලිස් ස්ථානාධිපති රංජිත් බමුණුසිංහ ශබ්ද විකාශන යන්ත්‍ර භාවිතය සදහා ලබා ගත් බලපත්‍රය පෙන්වන ලෙස ඉල්ලමින් බාධා පැමිණවු බවයි පළාත් බද වාර්තාකරුවන් පවසන්නේ.
“මැරිච්ච කට්ටිය අදහන්න, ඒක ප්‍රශ්නයක් නෑ. ඒක අදහන්න අපි ඒපා කිව්වේ නැනේ. මල් මාලා දාලා පත්තුකරන්න, ලවුස්පීකර් පර්මිට් එක දෙන්නකෝ මහත්තයෝ.“
අනුස්මරණයට බාධා කිරීමට පොලිසියට ‘ඉහලින්’ අණ දුන්නේ කවුදැයි කීම පොලිස් නිලධාරියා දිගටම ප්‍රතික්ෂේප කළ බව වාර්තාකරුවෝ පවසති.
පෙරවරුවේ සංගීතය වාදනය කරද්දී නොකළ බාධාවක් අනුස්මරණ අවස්ථාවේ කිරීම ගැන කනස්සල්ල පල කළ සංවිධායකයන් විනාඩි 10 ක කාලයක් ඇතුලත ශබ්ද විකාශනය නතර කිරීමට ඔවුන් පොරොන්දු වීමත් සමග පොලීසිය එම ස්ථානයෙන් ඉවත් විමට කටයුතු කර තිබේ.
මළවුන් සිහි කරමින් ග්‍රාමයේ පිහිටා තිබෙන ගනදෙවි කෝවිලේ පුජාවක් පැවැත්වීමටත් සමුල ඝාතනය වුවන්ගේ ඥාතීන් ක්‍රියා කළ බව පළාත් බද වාර්තාකරුවෝ වැඩි දුරටත් පවසති.
ඝාතන මාලාවක්
ඔදියමලෙයි ජන සංහාරය 1984 දෙසැම්බර් මුල සිට දෙසතියක් තුල මුලතිව්-ත්‍රිකුණාමලය දිස්ත්‍රික්ක මායිමේ පිහිටි දෙමළ ගම්මාන කිහිපයක් ගොදුරු කරගත් ඝාතන මාලාවකින් එකකි.
කෝකිලායි, තෙන්නමරවාඩි, අමරවයල්, කොක්කුතුඩුවායි, අලම්පිල්, නයාරු, කුමුලමුනෙයි සහ මනලාරු ප්‍රහාරයට ලක්වූ අනික් දෙමළ ගම්මානයි.
මේ ජනඝාතන වල අරමුණ වූයේ සිංහල ජනාවාසකරණය බව එවක පාර්ලිමේන්තුවේ සිටි ද්‍රවිඩ එක්සත් විමුක්ති පෙරමුණු මන්ත්‍රීවරු පෙන්වා දුන්හ.
තම මුල් ගම්බ්ම් අත්හැර යාමට බල කෙරුනු දෙමළ වැසියන් ආපසු පදිංචි කරවීමට හෝ සිදුවූ ඝාතන හා දේපල හානිය සම්බන්ධයෙන් තිස් නම වසරක් ගතවීත් යුක්තිය ඉටුවී නැති බව ඔදියමලෙයි අනුස්මරණය ට සහභාගි වූ ප්‍රජා නායකයෝ අවධාරණය කර තිබේ.
මේ සමූහ ඝාතන සමයේ ප්‍රදේශයේ සේනාංකාධිපති ලෙස අණ දුන්නේ පසුව මේජර් ජනරාල් පදවි ලද බ්‍රිගේඩියර් ජානක පෙරේරාය.
ප්‍රහාරයෙන් පසුව පිහිටුවන ලද එක් සිංහල ජනාවාසයක නම ජානකපුරයි.
උතුරු මැද මහ ඇමැති ධුරය සඳහා එක්සත් ජාතික පක්ෂයෙන් 2008 ඔක්තෝබරයේ පළාත් සභා මැතිවරණයේ තරග වැදුණු මේජර් ජනරාල් ජානක පෙරේරා අනුරාධපුර පැවැති එක්සත් ජාතික පක්ෂ මැතිවරණ රැළියකදී මරාගෙන මැරෙන බෝම්බ ප්‍රහාරයකින් මරුමුවට පත්විය.
